(06.11.2002) Ein fersk rapport frå OECD som tek
for seg dei einskilde landa sine måtar å løyse
forvaltningsoppgåvene på, bruker nemninga «best
practice» om Brønnøysundregistra. Rapporten
framhevar spesielt Einingsregisteret og Oppgåveregisteret
som gode reiskapar for samordning og gjenbruk, og at registra
speler ei nøkkelrolle i arbeidet med å måle
og redusere næringslivet si innrapporteringsbyrde.
 |
|
Brønnøysundregistra har fått
status som fyrtårn innan samordning og gjenbruk
i offentleg sektor.
|
Kamp mot byråkratiet
OECD, organisasjonen for økonomisk samarbeid og utvikling,
er eit samarbeidsforum kor industriland frå heile verda
drøfter saker av felles interesse, med mest vekt på
det som gjeld økonomi og handel.
Organisasjonen har i lengre tid jobba med tiltak som kan redusere
administrative byrder. Eit breitt program om reguleringsreformer
som starta i 1995, har i tur og orden vurdert kor langt dei
einskilde medlemslanda er komne på dette området.
På denne måten kan landa vurdere kor langt reformarbeidet
er kome samanlikna med dei andre. I tillegg til vurderinga
gir OECD også tilrådingar om nye tiltak og forbetringar.
Ros for forenkling
Som det 18. landet i rekkja har no Noreg blitt vurdert. Rapporten
slår fast at Noreg er kome langt, ikkje minst på
grunn av dei nemnde registerløysingane. Blant mange
positive tiltak får etatane sitt samarbeid om førebuing
av elektronisk innrapportering ei stjerne i margen. Dette
er eitt av elementa i handlingsplanen «Eit enklare Noreg».
Vil bli enda betre
Direktør Erik Fossum er ikkje overraska over OECD
sin konklusjon.
– Vi har lenge visst at vi har det mest avanserte systemet
på dette området, men det er sjølvsagt
hyggjeleg at resten av verda blir gjord kjend med det på
denne måten. Nærings- og handelsdepartementet
har sagt seg svært godt fornøgd med rapporten,
som gjer at vi haustar ekstra velvilje derifrå.
Men sjølv om vi med det vi no har i drift blir vurdert
som best, er vi langt frå i mål. Store utfordringar
ventar oss framover – ikkje minst i Oppgåveregisteret
og Einingsregisteret – ved overgang til elektronisk forvaltning,
seier Fossum.
|
