(02.01.2003) Det har vore ein sterk auke i talet på
konkursar i året som gjekk. Det blei registrert 4 445
konkursar i 2002 mot 3 547 i 2001. Det er ein auke på
heile 25,3 prosent. Talet tvangsavviklingar har i same periode
gått ned med 17,6 prosent, frå 1 680 i 2001 til
1 385 i 2002.
- Sannsynlegvis har årsaka til den store auken i talet
konkursar samanheng med den generelt vanskelege situasjonen
for næringslivet vi opplever for tida, seier avdelingsdirektør
Eirik Kristiansen ved Brønnøysundregistra.
Flest private AS
Det største talet konkursar skjer i private aksjeselskap
der 2 757 selskap gjekk konkurs. Det tilsvarar 62 prosent
av alle konkursane i 2002. 1 601 av konkursane er personlege
konkursar, og utgjer 36 prosent. Med unnatak av to fylke,
Oppland og Telemark, som har hatt ein svak nedgang, har den
vore auke i talet konkursar i alle fastlandsfylke i 2002.
Vestfold har den største prosentvise auken i talet
på konkursar.
Gjengangarar
Gruppert på næringskode er det butikk- og handelsverksemd,
byggje- og anleggsverksemd og hotell- og restaurantnæring
som har hatt flest konkursar og tvangsavviklingar. Når
ein grupperer på ansvarskapital er det er selskap med
låg eller utan ansvarskapital som har høgast
tal konkursar og tvangsavviklingar.
Konkurskarantenar
I 2002 blei det registrert 376 nye konkurskarantenar og 710
personar med løpande konkurskarantenar. Dei fleste
nye og løpande konkurskarantenane er registrerte i
Oslo. Skifteretten kan gi konkurskarantene dersom ein person
med skilleg grunn blir mistenkt for ei straffbar handling
i samband med sjølve konkursen eller verksemda som
har ført til konkursen. Skifteretten kan også
dømme karantene dersom vedkomande ved uforsvarleg forretningsførsle
er funne uskikka til å stifte, vere dagleg leiar eller
styremedlem i eit nytt selskap.
|
