 (05.07.2004)
No kan utøvarar av alternativ behandling registrere
seg i eit eige register i Brønnøysund.
Den frivillige ordninga skal vere med på å ivareta
pasientvern og forbrukarrettar for den som oppsøkjer
ein registrert alternativ behandlar.
- Dette registeret gir ei fin oversikt i jungelen av utøvarar
av alternativ behandling, seier avdelingsdirektør i
Helsedepartementet, Elisabeth Salvesen.
Frivillig
Registeret er frivillig og det finst dermed ingen krav om
at den einskilde utøvaren må registrere seg for
å praktisere alternativ behandling.
- Å vere registrert som alternativ behandlar inneheld
ikkje ei offentleg godkjenning av slike verksemder, påpeikar
avdelingsdirektør Eirik Kristiansen ved Brønnøysundregistra.
- Registreringa inneber at forbrukarane kan vere tryggje på
at utøvaren er medlem av ein godkjend utøvarorganisasjon,
at dei er forsikra og at dei har ei verksemd som er registrert
i Einingsregisteret.
Kven kan registrere seg?
Den einskilde utøvaren må ha ein fagleg bakgrunn
som er i samsvar med den einskilde utøvarorganisasjonen.
Etter søknad kan Sosial- og helsedirektoratet godkjenne
utøvarorganisasjonar for registrering. Utøvaren
forpliktar seg dermed til å drive forsvarleg verksemd.
Elisabeth Salvesen i Helsedepartementet trur at denne ordninga
skal bidra til auka seriøsitet og til foretningsmessig
ordna forhold.
Markering av ordna forhold
Salvesen håper at registerordninga også vil føre
til ei auka bevisstgjering blant utøvarane. Ho synest
det å registrere seg er ei grei markering av ordna forhold.
- Formålet med registreringa er å skilje mellom
dei seriøse og dei useriøse alternative behandlarane.
Samtidig håper eg at det ikkje blir eit stort skilje
mellom dei som vel å registrere eller ikkje. Det kan
vere mange årsaker til at utøvarane vel å
ikkje registrere seg, og dei kan vere fullt ut like seriøse.
Konkurransefordel
Avdelingsdirektør Eirik Kristiansen trur at mange
utøvarar kjem til å registrere seg. Han meiner
det vil vere ein konkurransefordel å vere registrert,
men påpeiker at mykje er avhengig av publikum.
- Det er forbrukarane som er siktemålet, og det kjem
an på om dei synest denne registerordninga er formålstenleg,
avsluttar Kristiansen.
Les
pressemelding
|
