Studiehandbok 2004/2005

HIT 220 926
Nordisk historie/lokalhistorie, 
påbyggingsstudium 30 studiepoeng

Halvårsstudium i nordisk historie/lokalhistorie utgjer eit studieprogram på 30 studiepoeng med normert studietid på eitt semester. Til vanleg går studiet i haustsemesteret. Haustsemesteret 2003 vert det berre undervist nordisk historie, og det er ikkje høve til å ta lokalhistorie.
Halvårsstudiet er eit påbyggjingsstudium i høve til historie årsstudium, sjå nærare om dette i eigen omtale. Halvårsstudiet kan likevel takast som særskild fageining saman med anna høveleg utdanning (jfr. nedanfor).

Fagkombinasjonar, nivå og kompetanse
Halvårsstudiet byggjer på historie årsstudium eller eit tilsvarande studium. Historiestudia kan kombinerast med andre studium ved høgskolar og/eller universitet i ein bachelorgrad. I ein overgangsfase kan det framleis byggjast inn i ein cand.mag.-grad. Ein kan òg nytte studiet som del av eit fjerde år i ei allmennlærarutdanning. Etter eldre ordning er studiet godkjent som tilleggsutdanning for lærarar med lærarprøve i høve til reglane om lønnsopprykk og adjunktkompetanse.
Dei to studia, årsstudiet og påbyggjingsstudiet, gjev til saman 90 studiepoeng. Påbyggingsstudiet inngår i bachelorprogrammet BA i historiske fag med fordjuping i historie. Kombinasjonen oppfyller òg kravet til den spesifikke historiedelen i ein bachelorgrad for dei som ønskjer å gå vidare til eit masterstudium i historie ved eit av universiteta.
Ein kan likeeins nytte ein bachelorgrad med fagleg fordjuping i historie som grunnlag for hovudfaget i kulturstudiar ved Høgskolen i Telemark.

Historie i arbeidslivet
Historiestudium vil for mange inngå i ein bachelorgrad (jfr. ovanfor). Historie gjev da etter nærare reglar, m.a. om praktisk-pedagogisk utdanning eller innpassing i fireårig allmennlærarutdanning, kompetanse for undervisning i skoleverket. Historiefaget høver òg godt innanfor ei medieutdanning, t.d. saman med journalistutdanning eller anna medieutdanning. Saman med andre samfunnsfag, kulturfag eller økonomiske fag kan historiefaget gje arbeid innanfor offentleg og privat administrasjon. Går ein vidare i historiestudiet til mastergrad (tidlegare hovudfag), har ein ei sjølvstendig historieutdanning på høgt nivå som kan høve for undervisning, arbeid i museum, arkiv o.l., og i andre samanhengar. Forskarutdanning i historie byggjer på mastergrad.

Opptaksgrunnlag
Opptaksgrunnlaget er samla karakter på historie årsstudium. Studentar som er i gang med årsstudiet og som har stått ved minst ein eksamen (gammal studieordning t.o.m. 2002-03), kan ta til med studiet på dette grunnlaget, men får først vitnemål for påbyggjingsstudiet når dei har teke heile årsstudiet. Andre søkjarar som har individuelle kvalifikasjonar, og/eller vil kombinere studiet med anna høveleg høgre utdanning, kan søkje om opptak på individuelt grunnlag. Kvalifikasjonar må kunne dokumenterast. Kunnskapar i norsk historie som om lag svarer til kravet for årsstudium historie, må reknast som naudsynt startgrunnlag. Studentar som ikkje skal/kan nytte studiet som påbyggjingsstudium, vil få karakterutskrift for bestått studium i "30 studiepoeng nordisk historie".

3507 Nordisk historie - oppbygging og gjennomføring
Historieforskinga i dei nordiske landa har tradisjonelt vore mest oppteken av nasjonalstatane. Halvårsstudiet tek utgangspunkt i at Norden kan oppfattast som ein heilskap med kulturelle, sosiale og politiske særdrag. Studiet vil lyfte fram det nordiske perspektivet, og gje innsyn i kva den nordiske samanhengen har hatt å seie i historia, og i korleis vi kan forstå viktige forskjellar og likskapar mellom dei nordiske landa. Studiet vil vidare gjere studentane kjende med historisk arbeidsmåte og grunnlaget for historisk kunnskap.
Påbyggjingsstudiet vil normalt utgjere eitt semesters arbeid. Det totale pensumet er på om lag 2300 sider. Det er sett saman av fire delar: 1) Metode/teori med eit pensum på ca. 400 sider. 2) Nordisk historie oversyn med eit pensum på ca. 550 sider. 3-4) To emne med eit pensum på ca. 700 sider kvar. Emna gjev høve til meir inngåande studium. Dei er først og fremst tematisk avgrensa, og det kronologiske spennet vil kunne variere. Dei vil ta for seg problemstillingar som ligg særleg til rette for eit nordisk perspektiv. Historiografisk stoff vert integrert i emnestudia. Tilbodet av emne vil kunne variere frå det eine året til det neste.
Det er høve til å velje individuelle pensa eller pensumdelar som alternativ i samråd med faglærar(ar).
Hausten 2003 vil det bli undervist i emna "Politisk kultur, normer og sosial kontroll i Norden 1500-1800" og "Nordisk politisk kultur og 'den nordiske modellen'. Tida etter ca. midten av 1800?talet".

Undervisnings- og arbeidsformer
Undervisningsformene vil veksle mellom forelesingar og seminar. Undervisninga er i regelen ikkje obligatorisk, og i slike høve kan studentane melde seg opp til eksamen utan å ha følgt undervisning. Ein rår likevel til at undervisninga blir følgt regelfast. Dersom delar av undervisninga er obligatorisk, vil dette gå fram av semsterkatalogen.
Studentar som ikkje følgjer undervisninga (heilt eller delvis), kan få pålegg om ei eller fleire oppgåveinnleveringar som obligatoriske arbeidskrav og vilkår for å gå opp til eksamen (sjå nedanfor). Faglærar er ansvarleg for slike pålegg. Normal frist for innlevering av oppgåver vil vere om lag to veker.
Ved sida av undervisninga vil studentane ha stor nytte av å samtale om pensum og studieproblem i eigne kollokviegrupper.
I tillegg til undervisninga på høgskolen vil studiet omfatte ein ekskursjon på 4-7 dagar. Ekskursjonen vil normalt kome i oktober. Ekskursjonen må sjåast på som i prinsippet obligatorisk, og studentar som har grunnar til ikkje å vere med, må melde frå om dette tidleg i semesteret.

Obligatoriske arbeidskrav
Det kan bli fastsett obligatoriske arbeidskrav, m.a. innlevering av oppgåver, som gjeld alle studentane. Opplysningar om slike krav vil ein finne i semesterkatalogen. Oppfylling av obligatoriske arbeidskrav er eit vilkår for å gå opp til eksamen i emnet.
Obligatoriske arbeidskrav vert ikkje evaluerte i eksamenssamanheng og kjem i tillegg til obligatoriske heimeoppgåver som inngår i eksamen/evaluering.
Faglærar kan kalle studenten inn til samtale før endeleg godkjenning av innleverte oppgåver.

Evaluering/eksamen
Eksamen består av a) undervegsprøve i metode/teori og nordisk historie oversyn (skoleeksamen første halvdel av oktober), b) sluttprøve i dei to emnestudia (heimeeksamen pluss munnleg prøve seint november-desember). Det blir gjeve karakter etter ein femtrinns bokstavskala frå A til E for bestått og F for ikkje bestått. Prøva i metode/teori/oversyn tel ein tredjedel og prøva i emnestudia tel to tredjedelar av samla karakter for halvårsstudiet.
Ved kontinuasjonseksamen seinare semester vert heimeoppgåva i dei to emnestudia på visse vilkår erstatta av skoleeksamen.
Sjå elles nærare utgreiing nedanfor under omtalen av dei einskilde kursa.
Studentane har plikt til sjølve å gjere seg kjende med og rette seg etter dei opplysningane som kjem i semesterkatalogen om eventuell emneregistrering, oppmelding til eksamen, krav om pensummelding, innlevering av oppgåver o.l.

Dei einskilde kursa

Metode/teori

Undervisning
Forelesing/seminar

Målsetjing
Det vil bl.a. bli lagt vekt på komparasjon og bruk av kvantitative og kvalitative metodar. Omgrepet "Norden" vil bli drøfta spesielt.

Vurdering/eksamen
Metode/teori og Nordisk historie oversyn vert prøvt i ein skoleeksamen (4 timar) i første halvdel av oktober (undervegsprøve). Bestått prøve er eit vilkår for å gå opp til sluttprøve i emnestudia (sjå nedanfor).

Ekstraordinær prøve
Studentar som ved sensur ikkje består undervegsprøva i metode/teori/oversyn, kan likevel gjennomføre eksamen same semester gjennom ei ekstraordinær delprøve, svarande til undervegsprøva, i slutten av semesteret (like før eller etter ordinær sluttprøve/heimeoppgåve). Delprøve og sluttprøve/heimeoppgåve vert sensurerte saman, og ein må bestå begge prøvene (ikkje-bestått i ei prøve tyder òg ikkje-bestått i den andre). Ekstraordinær delprøve er berre open for studentar som ved sensur ikkje bestod undervegsprøva eller hadde gyldig forfall. Den kan ikkje nyttast av studentar som trekte seg frå undervegsprøva eller leverte blankt. Den kan heller ikkje nyttast for å forbetre karakteren i ei bestått undervegsevaluering.

Kontinuasjonseksamen, sjå særskilt orientering til slutt i planen.

Nordisk historie oversyn

Undervisning
Forelesing/seminar

Målsetjing
Kurset skal gje studentane ei kort innføring i hovudtrekka i nordisk historie frå mellomalderen til 1900-talet, med ei viss tematisering.

Vurdering/eksamen
Kurset blir evaluert saman med kurset i metode/teori i ei undervegsprøve, sjå ovanfor.

Politisk kultur, normer og sosial kontroll i Norden 1500-1800

Undervisning
Forelesing/seminar

Målsetjing
Statssystema og dei sosio-økonomiske tilhøva var ulike i dei nordiske landa i tidleg nytid. Emnet vil ta opp i kva grad dette kjem til uttrykk i den politiske kulturen og i sosialiseringa av folket.

Innhald
Emnet har to tyngdepunkt. For det første skal ein studere den politiske kulturen som omfattar deltaking, ytringsformer, avgjerdsprosessar og avgjerdsprinsipp. På kva måte hadde bondestanden høve til å øve innverknad og bli høyrt gjennom ulike administrative og politiske kanalar? Dernest skal ein studere korleis den offisielle kontrollen og den uoffisielle disiplineringa av folket fungerte, og korleis konfliktar, normer og lovbrot blei handterte, først og fremst slik det kjem til uttrykk ved domstolane og i rettsmaterialet. Emnet blir behandla over eit lengre tidsspenn ut frå eit politisk, sosial- og kulturhistorisk perspektiv, der det blir lagt vekt på endringar over tid og på samanlikning mellom grupper, mellom kjønn og mellom dei nordiske landa. Fokus blir retta mot menneska som aktørar i deira relasjon til styresmaktene og til kvarandre.

Vurdering/eksamen
Det vert halde ein eksamen i dei to emnestudia i slutten av semesteret (heimeoppgåve to veker pluss munnleg prøve). Heimeoppgåva vert gjeven av faglærar/faglærarar og skal ha nær tilknyting til undervisninga. I tillegg til pensum i emna kan òg annan relevant litteratur (t.d. ein artikkel) og/eller kjeldestoff dragast inn. Slike tillegg får studentane utlevert i kopi. Heimeoppgåva kan vere knytt til berre det eine eller til begge emnestudia.
Den munnlege prøva supplerer den skriftlege. Berre studentar som har bestått den skriftlege prøva, blir kalla inn til munnleg prøve. Pensum i begge emnstudia kan prøvast ved den munnlege prøva. Det vert gjeve ein samla karakter for begge prøvene.

Kontinuasjonseksamen, sjå særskilt orientering til slutt i planen.

Nordisk politisk kultur og 'den nordiske modellen'. Tida etter ca. midten av 1800?talet

Undervisning
Forelesing/seminar

Målsetjing
I dette emnet vil ein sjå nærare på utviklinga av og grunntrekk ved ein nordisk politisk kultur og vurdere kor særmerkt han er sett i ein større samanheng, om det t.d. finst ein særnordisk variant av velferdsstaten.

Innhald
I før?industriell tid var dei nordiske landa ulike både når det gjaldt økonomiske og politiske system. Trass i dette utvikla dei system med sterke ytre likskapar (sterk offentleg sektor, sterkt folkeleg engasjement, kompromiss? og konsensuspolitikk, korporatisme). I dette emnet vil ein sjå nærare på viktige faktorar i denne utviklinga og også koma inn på forskjellar dei nordiske landa imellom. I tillegg til økonomiske og sosiokulturelle strukturar vil ein sjå på betydninga av politiske ideologiar. Mellom anna vil det bli lagt vekt på gjensidige relasjonar mellom stat og næringsliv (landbruk, industri etc).

Vurdering
Det vert halde ein eksamen i de to emnestudia, sjå nærare ovanfor.

KONTINUASJONSEKSAMEN

Kontinuasjonseksamen i vårsemesteret vert berre halden for studentar som hadde gyldig forfall eller ikkje bestod eksamen siste haustsemesteret. Det er eit vilkår for kontinuasjon i vårsemesteret at studenten i haustsemesteret oppfylte alle obligatoriske arbeidskrav, og også leverte heimeoppgåva (med mindre det låg føre gyldig forfall).
Kontinuasjonseksamen i undervegsprøva (metode/teori/oversyn) vert halden i byrjinga av mai som ein skoleeksamen på 4 timar, lik undervegsprøva i haustsemesteret.
Kontinuasjonseksamen i sluttprøva (dei to emnestudia) vert halden som ein skoleeksamen på 8 timar (utan munnleg prøve) i byrjinga av juni. Studentar som har ei bestått undervegsprøve frå eit tidlegare semester, treng berre gå opp til sluttprøva.
I haustsemesteret må kontinuantar (studentar frå eit tidlegare studieår) ta undervegsprøva saman med dei ordinære studentane og på same vilkår som dei. Dei tek sluttprøva som ein skoleeksamen på 8 timar (utan munnleg prøve). Dei skal leggje opp dei same emnestudia som i det opphavlege semesteret.
Kontinuanter som ikkje består undervegsprøva, kan nytte ordninga med ekstraordinær prøve (sjå ovanfor) på same vilkår som dei ordinære studentane.
Det er eit vilkår for å nytte kontinuasjonsforma nemnd ovanfor at studenten i det opphavlege studieåret oppfylte alle obligatoriske arbeidskrav, og også leverte heimeoppgåva (med mindre det låg føre gyldig forfall). Desse kontinuantane vert då fritekne frå nye obligatoriske arbeidskrav.
Studentar som ikkje fyller vilkåra for å kontinuere etter denne ordninga, skal gjennomføre heile det ordinære studie- og eksamensløpet i haustsemesteret. Dei må leggje opp emne som står på undervisningsprogrammet det aktuelle semesteret, og levere oppgåver på vanleg måte.

Høgskolen i Telemark
Studiehandbok 2004/2005