Helsetilsynet i Rogaland (HtilRo) gjennomførde tilsyn med Ryfylke DPS Randaberg 1.12.06 – 4.12.06. Senteret har 18 sengeplassar. 10 av desse vert disponerte av Stavanger DPS. Ambulant team er organisert som ein del av sengeposten.

Tilsynet omfatta ikkje poliklinikken.

Tilsynet kom i stand etter at HtilRo tidlegare i år mottok bekymringsmelding frå dåverande tilsynspsykiater og frå Kontrollkommisjonen. Bekymringsmeldingane gjekk på om drifta var fagleg forsvarleg pga manglande tilgang på psykolog og psykiater.

Tilsynet har teke for seg fylgjande område:

• Mottak og vurdering av henvisningar
• Utgreiing
• Behandling
• Avslutning av behandling

Ryfylke DPS Randaberg er ein del av eit distriktspsykiatrisk senter, og skal kunna gje eit allmennpsykiatrisk tilbod innan utgreiing, behandling og rehabilitering til befolkninga dei har ansvar for. I dokumentasjonen og ved tilsynet kom det fram at senteret ikkje har tilsett overlege eller klinisk psykologspesialist. Senteret har psykiatrisk tilsynslege i 30 % stilling og somatisk tilsynslege i 20% stilling. Stillingane som overlege og klinisk psykolog er lyste ut. I tillegg til dette har senteret psykiater i 10 % stilling. Sistnemnde arbeider i hovudsak på poliklinikken.

Under tilsynet kom det fram at senteret berre tek i mot nye pasientar for innlegging som først har vore innlagde ved Stavanger universitetssjukehus, Psykiatrisk klinikk. På grunn av for lite behandlingspersonell, kan senteret ikkje gje tilbod om direkte mottak og utgreiing av pasientane.

Desse pasientane har fått diagnose og behandlingsopplegg ved sjukehuset. Sjukehuset kjenner senteret sine sterke og svake sider, og tilviser nye pasientar ut frå dette. I tillegg har senteret eit tilbod om korttidsopphald til kjende pasientar som har behandlingstilbodet sitt på poliklinikken eller i kommunen. Søknaden om innlegging vert vurdert av styrar og tilsynspsykiater. Ingen får avslag, men ventetida for plass kan variera noko.

Om lag 50 % av dei innlagde pasientane har vore innlagt i fleire år og er utskrivingsklare og samarbeid med kommunen med tanke på utskriving er starta opp.

Det ambulante teamet har ikkje tilbod om vurdering ved psykiater eller psykolog. Arbeidsoppgåvene er stort sett oppfølging av tidlegare innlagde pasientar.

Av dokumentasjonen (journalar) og intervjua kjem det fram at tilsynspsykiater sitt arbeidsområde i hovudsak er vurdering og justering/endring av behandlinga med psykofarmaka og vurderingar av pasientar som er lagde inn til tvunge psykisk helsevern (formelle vedtak etc.). Ved intervjua kom det fram at det ikkje er klart for alle kven som har det faglege ansvaret for pasientane.

Innlagde pasientar får ikkje tilbod om behandlingssamtaler hos psykiater eller psykolog. Enkelte av pasientane går til samtale på poliklinikken mens dei er innlagde.

Miljøterapien er i hovudsak retta mot rehabilitering Under intervjua kom det fram at miljøpersonellet treng å få tilført ny kompetanse dersom dei skal få behandlingsansvar for pasientar med vanlege psykiatriske problemstillingar. Arbeid med dette er satt i gang.

Ved tilsynet vart det peika på eit avvik :

Avvik
For liten tilgang på psykiater og ikkje tilgang på psykolog, gjer at pasientane ved Ryfylke DPS Randaberg ikkje alltid får fagleg forsvarleg behandling.

Stavanger 16. februar 2007

Dagfinn Carlsen Revisjonsleiar

Anne Barkve Andersen Revisor

Rapporten er arbeid ut etter tilsyn med Ryfylke DPS Randaberg 1. og 4. desember 2006. Tilsynet kom i stand etter at HtilRo tidlegare i år tok i mot bekymringsmelding frå dåverande psykiatrisk tilsynslege og Kontrollkommisjonen. Bekymringa gjekk på om drifta ved senteret var fagleg forsvarleg pga manglande psykiater og psykologkompetanse.

Helsetilsynet i Fylket er gitt myndigheit til å føra tilsyn med helsetenesta etter Lov om statlig tilsyn med helsetjenesten § 2.

Tilsynet vert gjennomført som ein systemrevisjon. Det betyr dokumentgransking og intervju av ein del av dei tilsette.

Føremålet med tilsynet er å vurdera om verksemda kan ivareta ulike krav i lovgjevinga gjennom internkontrollen sin. Det vert undersøkt om:

• Verksemda har tiltak for å avdekka, retta opp og førebyggja lovbrot innan dei områda som tilsynet handlar om.
• Tiltaka vert fylgde opp i praksis og korrigerte dersom det er behov for det.
• Tiltaka er tilstrekkelege til å sikra at ein held lova.

Rapporten handlar om avvik og merknader som er avdekka under tilsynet, og gir derfor ikkje ei fullstendig tilstandsvurdering av arbeidet ved verksemda innan tilsynsområdet.

• Avvik er mangel på oppfylling av krav gitt i eller i medhald av lov eller forskrift.
• Merknad er tilhøve som ikkje er i strid med krav fastsett i eller i medhald av lov eller forskrift, men der tilsynsmyndigheiten finn grunn til å peila på at forbetring er mogleg.

Ryfylke DPS Randaberg er saman med Ryfylke DPS Strand eit distriktspsykiatrisk senter under Stavanger Universitetssjukehus Helse Stavanger. Verksemda ligg i sentrum av Randaberg kommune og har ansvar for kommunane Randaberg, Kvitsøy, Rennesøy og Finnøy. Ryfylke DPS Randaberg var tidlegare eit psykiatrisk senter under Stavanger Universitetssjukehus Psykiatrisk klinikk. Senteret er mellombels godkjend for behandling av pasientar innlagt til tvunge psykisk helsevern.

Senteret har atten døgnplassar. Til ti av desse tek dei i mot pasientar frå Stavanger DPS sitt ansvarsområde. Om lag 50 % av plassane er belagt med pasientar som er utskrivingsklåre og ventar på tilbod i kommunen. Senteret har ein akuttplass som vert brukt til avtalte korttidsopphald for utskrivne pasientar. Nye pasientar kjem frå sjukehuset (Psykiatrisk klinikk), der dei har vore innlagde til utgreiing, diagnostisering og oppstart av medikamentell behandling.

Senteret har tilsett miljøpersonell med helsefagleg bakgrunn. Miljøpersonellet har særleg retta fokus mot rehabilitering, og i mindre grad behandling.

Senteret har tilsett tilsynspsykiater i 30 % stilling. Ein annan psykiater i 10 % stilling er tilsett med arbeidsområde poliklinikken. Stillinga som overlege er lyst ut. Senteret er utan psykolog. Stillinga er lyst ut. Somatisk tilsynslege er i 20 % stilling.

Det er oppretta ambulant team. Teamet har ikkje tilgang på psykolog eller psykiater. Arbeidsområdet til teamet er stort sett oppfølging av tidlegare innlagde pasientar.

Melding om tilsynet vart send ut den 11.9.2006. For dokumentoversyn sjå kap. 7.

Dokumentgjennomgang på senteret 1.12.2006.

Opningsmøte vart halde 4.12.2006.

Intervju av seks av personalet.

Sluttmøte vart halde 4.12.2006.

Tilsynet tok for seg fire område. Desse var:

Formålet med tilsynet var å avdekka om verksemda sikrar at pasienten får ei forsvarleg vurdering av helsetilstanden innan 30 dagar etter motteken henvisning, jf spesialisthelsetenestelova § 2-1 og pasientrettighetslova § 2-2.

Formålet med tilsynet var å avdekka om verksemda sikrar at det skjer ei forsvarleg utgreiing av pasienten sitt behov for psykiatrisk hjelp, jf. spesialisthelsetenesetelova § 2-2.

Formålet med tilsynet var å avdekka om verksemda sikrar at det skjer ei forsvarleg behandling av pasienten, jf. spesialisthelsetenesetelova § 2-2.

Formålet med tilsynet var å avdekka om verksemda sikrar at det skjer ei forsvarleg utskriving etter at behandlinga er avslutta, jf. spesialisthelsetenesetelova § 2-2.

Avvik:
Liten tilgang til psykiatrisk og psykologisk kompetanse, gjer at pasientane ved Ryfylke DPS Randaberg ikkje alltid får fagleg forsvarleg behandling.

Avvik frå Lov om spesialisthelseteneste § 2-2

Avviket byggjer på:

• Ut over 30 % stilling som tilsynspsykiater er det ikkje psykiaterkompetanse og ikkje psykologkompetanse på sengeposten.
• Nokre av pasientane får tilbod om oppfølging ved poliklinikk.
• Av journal og intervju går det fram at psykiater ikkje har pasientar til samtalebehandling, men gjer nødvendige vedtak i høve til pasientar under tvunge psykisk helsevern og oppfølging av den medikamentelle delen av behandlinga.
• Pga manglande tilgang på psykiater / psykolog kan ikkje senteret ta imot pasientar med behov for utgreiing og behov for behandling i tillegg til medikamentbehandling.
• Det er ikkje lege knytt til ambulant team
• Det er ikkje klart for alle tilsette kven som har det medisinskfaglege ansvaret for innlagde pasientar.

• Lov av 30. mars 1984 nr. 15 om statleg styring med helsetenesta.
• Lov av 2. juli 1999 om etablering og gjennomføring av psykisk helsevern
• Lov av 2. juli 1999 nr. 61 om spesialisthelsetenesta.
• Lov av 2. juli 1999 nr. 64 om helsepersonell.
• Forskrift om internkontroll i sosial- og helsetenesta

Verksemda si dokumentasjon knytta til drifta som vart motteke før revisjonen:

• Organisasjonskart
• Bemanning lagt til grunn for godkjenning til å ha ansvar for pasientar under tvunge psykisk helsevern.
• Faktisk bemanning per dato.
• Stillingsoversikt med namn, tittel, arbeidsoppgåver, vidareutdanning, ansvar og stillingsstorleik.

Frå Helsetilsynet i Rogaland deltok
Dagfinn Carlsen, ass. fylkeslege (revisjonsleiar)
Anne Barkve Andersen, fylkessjukepleiar (revisor)
Paul Grude, seniorrådgjevar/jurist (revisor)