vil lieber friunt, daz sol geschehen.
ich wil dir gerne hie verjehen
mīnes hōchgelobten namen.
dun darft dich niemer des geschamen
daz dū mir undertęnic bist.
mir dienet swaz ūf erden ist
hordes unde guotes,
ich bin sō hōhes muotes
daz keiser unde küneges kint
under mīner crōne sint,
grāven, frīen, herzogen
habent mir ir knie gebogen
und leistent alle mīn gebot.
ich fürhte niemen āne got,
der ist gewaltic über mich.
diu Werlt bin geheizen ich,
der dū nu lange hāst gegert.
lōnes solt du sīn gewert
von mir als ich dir zeige nū.
hie kum ich dir, daz schouwe dū.

Sus kźrtes im den rucke dar:
der was in allen enden gar
bestecket und behangen
mit unken und mit slangen,
mit kroten und mit nātern;
ir līp was voller blātern u
nd ungefüeger eizen,
fliegen unde āmeizen
ein wunder drinne sāzen,
ir fleisch die maden āzen
unz ūf daz gebeine.
si was sō gar unreine
daz von ir blden lībe wac
ein alsō egeslicher smac
den niemen kunde erlīden.
ir rīchez cleit von sīden
vil übel wart gehandelt:
ez wart aldā verwandelt
in ein vil swachez tüechelīn;
ir liehter wünneclicher schīn
wart vil jāmerlich gevar
bleich alsam ein asche gar.
Hie mit schiet si von dannen.

von wībe und von kinden
schiet er sich aldā zehant;
er nam das criuze an sīn gewant
und huop sich über daz wilde mer
und half dem edeln gotes her
strīten an die heidenschaft.