Stipendiatstilling i anvendt og utrekningsorientert matematikk retta mot modellering av geologisk lagring av CO2 – fornya utlysing
Ved Matematisk institutt er det ledig ei stilling som stipendiat i anvendt og utrekningsorientert matematikk for 3 år.
Kandidaten vil arbeide innan prosjektet "Geological Storage of CO2: Mathematical Modelling and Risk Assessment", eit samarbeid mellom Universitetet i Bergen og SINTEF Anvendt Matematikk i Oslo. Prosjektet har som målsetting å styrke det vitskaplege grunnlaget for forståing av risiko knytt mot geologisk lagring av CO2 for å redusere utslepp av klimagassar. Undersøkingane er knytte til studiet av ikkje-lineære partielle differensiallikningar som oppstår ved fleirfasestrømming i porøse medium. Metodar i utrekningsorientert matematikk skal bli brukt, dvs. undersøkingane skal involvere matematiske og numeriske modellar, numeriske simulasjonar og deira fysiske og matematiske tolking.
Kandidaten ventast å arbeide i prosjektet sitt tverrfaglege miljø (anvendt matematikk, berekningsvitskap, og engineering). Det forventast at kandidaten tilbringer 3 til 6 månader i utlandet i samarbeid med internasjonale partnarar.
Søkjarar må ha oppnådd master-/cand.scient.-grad i matematikk eller fysikk eller tilsvarande utdanning, eller ha levert master-/cand.scient.-oppgåva til vurdering innan søknadsfristen er ute. Det er likevel ein føresetnad at sensur ligg føre innan 4 veker etter innleveringsfristen for master-/ cand.scient.-oppgåva.
Nærare opplysningar om stillinga kan ein få ved å vende seg til:
Helge K. Dahle, +47-555 84856, helge.dahle@mi.uib.no
Klaus Johannsen, +47-555 84314, klaus.johannsen@bccs.uib.no eller
Jan M. Nordbotten, Jan.Nordbotten@mi.uib.no
Stipendiaten skal gå inn i eit godkjend opplegg for ein PhD-grad innanfor ei tidsramme på 3 år. Søkjarar må difor fylle krava for opptak til PhD-studiet ved Universitetet i Bergen. Søknad om opptak til PhD-studiet, inkludert plan for gjennomføring av forskarutdanninga, vil verte utarbeidd i samråd med aktuell faggruppe.
Løn etter lønssteg 43 (kode 1017) ved tilsetjing. Vidare opprykk skjer etter tenesteansiennitet i stillinga (lønssteg 43/47).
Kvinner vert spesielt oppmoda om å søkje. Dersom dei sakkunnige finn at fleire søkjarar har tilnærma like kvalifikasjonar, vil reglane om kjønnskvotering i personalreglementet for vitskaplege stillingar verte følgde.
Den statlege arbeidsstyrken skal i størst mogleg grad spegle mangfaldet i befolkninga. Det er difor eit personalpolitisk mål å få ei balansert alders- og kjønnssamansetjing og rekruttere personar med innvandrarbakgrunn. Personar med innvandrarbakgrunn vert oppmoda om å søkje stillinga.
Universitetet i Bergen nyttar "meroffentlighet" ved tilsetjing i vitskaplege stillingar.
Den som vert tilsett må rette seg etter dei retningslinene som til kvar tid gjeld for stillinga.
Elektronisk søknad må innehalde CV, innskanna kopiar av vitnemål og karakterutskrift, publikasjonar, liste over publikasjonar og anna relevant arbeid, samt 2-3 referansar.
Søknad skal sendast til post@cipr.uib.no
Søknaden skal merkast: 07/7412
Søknadsfristen: 16. november 2007.
