Professor /førsteamanuensis /universitetslektor i medisin (klinisk ernæring) - heil eller delstilling(ar) ved Institutt for indremedisin
UNIVERSITETET I BERGEN
Det medisinsk-odontologiske fakultet
PROFESSOR/FØRSTEAMANUENSIS/UNIVERSITETSLEKTOR I MEDISIN (KLINISK ERNÆRING) – HEIL ELLER DELSTILLING(AR) – VED INSTITUTT FOR INDREMEDISIN
Ved Universitetet i Bergen, Institutt for indremedisin, er det ledig ei stilling som professor i medisin (klinisk ernæring). Dersom det ikkje er kvalifiserte søkjarar til stillinga som professor kan det tilsetjast førsteamanuensis eller universitetslektor i medisin (klinisk ernæring). Den som vert tilsett, må vera klinisk ernæringsfysiolog eller ha tilsvarande utdanning. Det er aktuelt å vurdere delstilling(ar) ved Universitetet og/eller kombinasjonsstilling(ar) ved Haukeland Universitetssjukehus. Søkjaren må oppgje slike ønskje. Delstilling kan variere frå 20-50 %. Fleire tilsetjingar i delstillingar kan verte aktuelt. Tilsetjing i delstilling 20 % vil gjelde for 5 år med høve til forlenging.
Professor vert løna etter lønssteg 68/76 (kode 1013), i lønsregulativet til Staten. Førsteamanuensis vert løna etter lønssteg 57 (kode 1011/LR24.1) ved tilsetjing. Vidare opprykk skjer etter tenesteansiennitet i stillinga (lønssteg 57/63). Universitetslektor vert løna etter lønssteg 45/56 (kode 1009/LR25.1 etter tenesteansiennitet). For stillingar i meir enn 50 % vert det trekt 2 % pensjonsinnskot til Statens pensjonskasse. For særleg kvalifiserte søkjarar kan det verte aktuelt å vurdere høgare løn.
Ein stillingsomtale med nærare presisering av fagkrins og ansvarsområde, særlege plikter og andre tilhøve som det vert lagt vekt på ved tilsetjinga, og ei rettleiing for søkjarar til stillinga, kan ein få frå sekretariatet for Det medisinsk-odontologiske fakultet, tlf. 55 58 25 50.
Utfyllande opplysningar om stillinga kan ein få ved å vende seg til professor Alfred Halstensen ved Institutt for indremedisin, tlf. +47 55 97 30 70/ 93219980 eller administrasjonssjef Ove Botnevik, tlf. 55 97 29 58.
Den tilsette pliktar å ta del i undervisning og eksamen etter dei studieordningane som gjeld til kvar tid, og til utan godtgjersle å rette seg etter dei endringane som gjennom lov måtte bli vedtekne om fagkrins, pensjonsordning og aldersgrense.
Undervisningsspråket er til vanleg norsk.
Kvinner vert spesielt oppmoda om å søkje. Dersom dei sakkunnige finn at fleire søkjarar har tilnærma like kvalifikasjonar, vil reglane om kjønnskvotering i Personalreglementet for vitskaplege stillingar verte følgde.
Den statlege arbeidsstyrken skal i størst mogleg grad spegla mangfaldet i befolkninga. Det er difor eit personalpolitisk mål å få ei balansert alders- og kjønnssamansetjing og rekruttere personar med innvandrarbakgrunn. Personar med innvandrarbakgrunn vert oppmoda om å søkje stillinga.
Universitetet i Bergen nyttar "meroffentlighet" ved tilsetjing i vitskaplege stillingar.
Den som vert tilsett må rette seg etter dei retningslinene som til kvar tid gjeld for stillinga.
Søknaden skal sendast i 4 eksemplar og må innehalde eit fullstendig oversyn over utdanning, tidlegare stillingar og anna verksemd, og ei fullstendig liste over vitskaplege arbeid med opplysning om kvar dei er offentleggjort. Søkjarar må gje opp dei vitskaplege arbeida eller delar av arbeida som det skal leggjast særleg vekt på ved vurderinga. Desse bør ikkje vere fleire enn 15 for professor og 10 for førsteamanuensis. Søknaden må innehalde oversyn over vedlegg som dokumenterer søkjaren sine pedagogiske kvalifikasjonar.
Søkjarane må sende inn 3 eksemplar av vitskaplege arbeid - trykte eller utrykte - som dei ønskjer det skal verte teke omsyn til ved vurderinga og ei liste over desse i 4 eksemplar med opplysning om kvar dei er offentleggjort. Dei vitskaplege arbeida skal vere nummererte og sortert i 3 bunkar, og skal sendast til sekretariatet for Det medisinsk-odontologiske fakultet, Universitetet i Bergen, innan ein månad etter søknadsfristen.
Ein syner elles til "Midlertidige regler om framgangsmåten ved tilsetting i professorat ved Universitetet i Bergen".
Søknad med vedlegg (4 eksemplar/vitskapleg arbeid 3 eksemplar) skal sendast til Det medisinsk-odontologiske fakultet, Universitetet i Bergen, Postboks 7804, 5020 Bergen, innan 7. juni 2008.
Søknaden skal merkast: 08/3992
