Foto: Nasjonalbiblioteket

Overgangen frå 10 til 13 siffer kjem som ein direkte konsekvens av ein auka bokproduksjon verda over og fordi nye format, som til dømes nettdokument, òg skal ha ISBN. I Noreg og mange andre land kunne vi klart oss med dei 10-sifra nummera i mange år framover, men fordi ISBN er eit internasjonalt system, må vi endre det over heile verda samtidig.

Metadata
Her i landet er det Nasjonalbiblioteket som har hatt ansvaret for å planleggje, informere og leggje til rette for overgangen frå 10 til 13 siffer. I tillegg til dei tre nye sifra, inneheld den reviderte standarden òg sterkare tilrådingar om å samle inn metadata frå utgjevarane (opplysningar om forfattar, tittel, utgjevingsår og liknande) i samband med tildelinga av ISBN.

Automatisk konvertering
ISBN-endringa verkar inn på alle ledd i bokbransjen. Bestillings- og registreringssystema må bli sette i stand til å handtere det, og forlaga må konvertere dei eksisterande nummera sine. Ein skal sjølvsagt ikkje trykkje nye nummer i bøker som allereie har komme ut, og i katalogane til biblioteka vil framleis alle 10-sifra ISBN vere søkbare og synlege. Når vi no bestiller ei eldre bok, vil vi i dei fleste tilfella framleis kunne gjere det ut frå eit 10-sifra ISBN. Systema vil som regel kunne konvertere automatisk. Biblioteksystema i Noreg har lenge vore i stand til å handtere ISBN med både 10 og 13 siffer og å konvertere mellom dei. Forlaga har det siste året kunna bruke både 10 og 13 siffers ISBN som ei overgangsordning.

Meir informasjon finn du her