Foto: Morten Krogvold

Nasjonalbiblioteket har ansvaret for å samle inn alt materiale som blir publisert i Noreg. Dette gjeld òg musikk og andre lydfestingar. Produsentar av dette materialet er, i følgje pliktavleveringslova, pålagde å sende inn to eksemplar vederlagsfritt til Nasjonalbiblioteket.

Målet med pliktavleveringa er å tryggje bevaring og attfinning, no og i framtida. Avleverte lydopptak gjer vi òg tilgjengelige for dokumentasjonsarbeid, studium og forsking. Nasjonalbiblioteket formidlar òg materialet sitt gjennom utstillingar og andre kunnskaps- og kulturarrangement.

Ny organisering av mottak
Frå måndag 2. juli har Nasjonalbiblioteket sin monografiseksjon ansvaret for inndriving og mottaksregistrering av avleveringspliktig innspela musikk.
Ny avleveringsadresse for lydopptak er heretter 8607 Mo i Rana.

I tida før denne omlegginga vart det gjennomført ein større informasjonskampanje. Over 400 norske plateselskap og distributørar har motteke både e-postar og brev saman med ein ny informasjonsbrosjyre. I tillegg er det etablert ei ny nettside for pliktavlevering av lydopptak under www.pliktavlevering.no.

Nasjonalbiblioteket vil følgje opp kampanjen til hausten gjennom eit samarbeid med fleire større organisasjonar innan musikkfeltet, samt oppslag i ulike bransjetidsskrift.