Parlamentssalen i Bosnia-Hercegovina gjenåpna

Jørgen Kosmo avslutta sine fire år som Stortingspresident med å åpne den gjenoppbygde parlamentssalen i Sarajevo, Bosnia og Hercegovina, fredag 30. september 2005.

”Bombinga av parlamentet i Sarajevo var ei frykteleg, og samtidig ei svært medviten politisk handling under krigen”, seier Jørgen Kosmo. ”Når alle tre folkegrupper no skal innvie sin nye, felles parlamentssal, er symbolverdien desto større. Slik eg ser det, ti år etter Dayton-avtalen, er dette verkeleg det endelege politiske punktum for krigen.”

I talen understreka Kosmo m.a. at “den politiske, økonomiske og sosiale freden i Bosnia Hercegovina – sjølve framtida for landet – er avhengig av at parlamentet fungerer som det skal; som ei åpen, folkevald forsamling, der politisk makt er fordelt gjennom demokratiske val og blir utøvd i full åpenheit, etter klare spelereglar. Denne salen tilhøyrer heile folket i Bosnia og Hercegovina, uansett kva side ein stod på under krigen.”

Parlamentet i Sarajevo var mellom dei mange offentlege bygningar som vart bomba under krigen på starten av 90-talet. Sjølve salen fekk omfattande brannskadar og har ikkje vore i bruk sidan. Dei utvendige skadane på parlamentet er framleis svært synlege. Forsoningsprosessen mellom dei tre folkegruppene i landet pågår framleis, og felles demokratiske og administrative institusjonar vert etablert. Som eit positivt eksempel vedtok statsparlamentet same dag som åpninga av parlamentssalen ei ny forsvarslov som inneber at Bosnia-Hercegovina vil ha eitt felles forsvarsdepartement og èin felles kommandostruktur over dei væpna styrkane i landet.

Utanriksdepartementet har dei siste åra bevilga til saman 7,5 millioner kroner for å gjenoppbygge og samtidig modernisere fleire funksjonar ved parlamentet i Bosnia-Hercegovina. Gjenoppbygginga av parlamentssalen er det største enkelttiltaket, og arbeidet med sjølve salen har pågått i heile 2005. Utanriksdepartementet og ambassaden i Sarajevo har vore sentrale partnarar under heile prosessen.

”Ein ny, moderne parlamentssal er den flotteste gåva det norske folk kunne gi folket i dette vakre landet. Som Stortingspresident er det eit privilegium å få lov til å åpne denne salen. Eg kunne ikkje tenke meg ei flottere avslutning på mi tid i rikspolitikken enn denne seremonien,” avsluttar Kosmo.