Introduksjon
Studiet er ei nettbasert vidareutdanning i pedagogisk bruk av informasjons- og kommunikasjonsteknologi (IKT) for lærarar i den vidaregåande skulen i Hordaland. Studiet vert utvikla og blir gjennomført i eit samarbeid mellom Høgskolen Stord/Haugesund (HSH) og Høgskolen i Bergen (HIB). 

Omfanget av studiet er gitt i ECTS-poeng, der 3 poeng tilsvarar 1 vekttal. Studiet skal omfatta 30 poeng, fordelt på 5 modular, kvar på 6 poeng. Studiet vert gjennomført som eit nettstudium, i tillegg er det ei oppstartsamling og ei vurderingssamling for kvar modul.

Studiet er skulebasert og vert gjeve som tilbod til dei  vidaregåande skulane i Hordaland. Studiet er eit alternativ til  første 10-vekttalseining ”IT for lærarar” i gjeldande fagplanar ved HSH og HiB, og kvalifiserer for opptak til andre 10-vektalseining ved desse institusjonane.

Mål 
Studiet skal auka den formelle og reelle IKT-kompetansen til lærarar i den vidaregåande skulen. Studiet skal gi lærarane grunnlag for å bruka og integrera IKT i eige arbeid. Det krev teknisk kompetanse og praktisk kjennskap til bruk av ny teknologi og grunnleggjande forståing av spørsmål knytt til bruk av IKT og læring, m. a. i dei ulike faga.

Innhald
Dei obligatoriske modulane skal omfatta ei innføring i bruk av aktuelle IKT-verktøy (IKT-1), refleksjon omkring nye arbeidsmåtar som oppstår i møte mellom teknologi og læringsteori (IKT-2) og utprøving i eige arbeid (IKT-3). Dei valfrie modulane skal omfatta fordjuping innan IKT og læring i relevante fag eller emne.

Organisering og arbeidsmåtar
Studiet skal organiserast i 6-poengsmodular. Kvar modul skal omfatta to samlingar, ei oppstartsamling og ei vurderingssamling til slutt. I mellom dei to samlingane skal det vera rettleiing via elektroniske nettverk. Kvar 6-poengssmodul skal strekkja seg over eitt semester, og tilsvara ei arbeidsmengd på ein (1) vekedag. For lærarar i full stilling vil det vera normalt å ta desse 30 poenga over fem (5) semester. Slik vil kursdeltakarane kunna oppleva kontinuitet i læringsprosessen. Det er vesentleg i denne type utdanning at læraren får høve til å bruka ny kunnskap i eige arbeid.

I studiet skal ein bruka eit nettbasert samarbeidsverktøy for å sikra god kommunikasjon mellom studentar og mellom studentar og rettleiarar.

Vurdering
Kvar modul vert avslutta med ei vurderingssamling der kvar studentgruppe skal presentera det obligatoriske arbeidet sitt (moduloppgåve eller prosjektarbeid) for ei ekstern sensorgruppe. Det vert utarbeidd kriterium for den obligatoriske oppgåva som er knytt til kvar modul, både når det gjeld fagleg innhald, korleis arbeidet skal brukast i praksis og korleis gruppa skal presentera det for sensorgruppa. Det vert gjeve karakter for arbeidet og for presentasjonen. Karakterar vert gitt etter ECTS-skalaen frå A til F. Dersom eit arbeid ikkje vert godkjent (karakteren F), får gruppa ny frist på seg til å levera moduloppgåva inn til ny vurdering.

Denne sida er oppdatert av Anders Grov Nilsen 06.02.02 .