HI401407 Intensivsjukepleie Emne 2

Intensivsjukepleie Emne 1 må vere bestått.

Emnet vil vidareføre intensivsjukepleie til ulike pasientgrupper. I dette semesteret blir det forventa at studenten utviklar forståing for den kompleksiteten og dei individuelle uttrykka som ulike sjukdomstilstandar kan ha. Intensivsjukepleie ved spesielle behandlingsformer og prosedyrar vil også vere eit tema.

Intensivsjukepleiaren har eit stort ansvar i forhold til informasjon og veiledning til pasient og pårørande. Intensivsjukepleiaren som pedagog vil vere tema i dette semesteret.

Ved fullført emne skal studenten ha:

• forståing for og kompetanse i å utøve intensivsjukepleie med utgangspunkt i pasient og pårørande sine ressursar og rettar til medverknad
• forståing for dei juridiske rammene for yrkesutøvinga
• kunnskap om og forståing for ulike medisinske tilstandar i intensivavsnitta
• kompetanse i klinisk observasjon under intensivbehandling og iverksetting av tiltak i samsvar med eigen kompetanse og ansvarsområde
• kompetanse i å gi individuelt tilpassa sjukepleie
• kunnskap om og kompetanse til å støtte menneske i krise og sorg
• kunnskap om og kompetanse i å gjennomføre delegert medisinsk behandling
• kompetanse i å bruke medisinsk-teknisk utstyr på ein sikker måte
• kompetanse i å informere, undervise og rettleie pasientar, pårørande og medarbeidarar.
• kompetanse i å understøtte pasientar og pårørande si meistring av sjukdom og medisinsk behandling

Delemne 1: Intensivsjukepleie ved ulike sjukdomstilstandar/behandlingsformer

Delemne 2: Intensivsjukepleie ved spesielle behandlingsformer og prosedyrar som til dømes:

• respiratorbehandling, CPAP og BIPAP, oksygenbehandling
• terapeutisk hypotermibehandling
• dialyse
• defibrillering/elektrokonvertering
• avansert monitorering
• avansert kirurgisk og medisinsk behandling

Delemne 3: Intensivsjukepleiaren sine pedagogiske funksjonar

• ulike tilnærmingar til læring
• munnleg og skriftleg informasjon/veiledning
• oppgåveskriving

Arbeidsformer

Det vil bli veksla mellom forelesing, arbeid i grupper og deltaking i systematisk undersøkande arbeid. Det vil bli lagt opp til ulike former for forskingsbasert undervising. Dette medfører mellom anna at undervisinga vil vere i samsvar med dei nyaste forskingsresultata knytt til sentrale tema i utdanninga. I tillegg vil studentane få undervising og trening i vitskaplege metodar. Det blir forventa at studentane er aktive og medansvarlege i undervisinga. 10 veker praksisstudium er ein del av dette emnet.

Studentane skal individuelt eller i gruppe utvikle informasjonsbrosjyre knytt til eit aktuelt tema. Brosjyra skal presenterast for samla klasse, og godkjennast av fagleg ansvarlege.

Individuell heimeeksamen over 1 veke. Oppgåva skal ha eit omfang på om lag 5000 ord.