Akvakultur, bachelorstudium, h 2006

Det 3-årige bachelorstudiet i akvakultur ved HSF er primært ei sjølvstendig yrkesutdanning, men det kan og danne grunnlag for ein mastergrad ved andre høgskular og universitet. Studiet legg vekt på bruksretta akvakulturfag basert på grunnleggande naturfaglege emne. Andre studieår kan studentane velje mellom økonomiske fag, IKT eller ein kombinasjon av slike emne med studieopphald i utlandet med fordjupning innan akvakultur. I tredje året skal studentane skrive ei bacheloroppgåve basert på utviklingsprosjekt i samarbeidande bedrifter på aktuelle problem-stillingar innan akvakultur.

Fullført studium gir rett til vitnemålet "Bachelorgrad i akvakultur". Studiet kan danne grunnlag for opptak til mastergrad i akvakultur ved andre høgskular og universitet t.d. Universitetet i Bergen (UiB), Universitetet i Tromsø (UiT) eller Universietet for miljø- og biovitenskap på Ås (UMB).

Studiet høver godt for dei som ynskjer å ta ei utdanning tilpassa ei framtidsretta næring i sterk vekst både nasjonalt og internasjonalt.

Studiet er ei sjølvstendig yrkesutdanning som førebur kandidatane for akvakulturrelaterte stillingar både i privat og offentleg sektor. Kandidatane tevlar om mange ulike stillingar innan t.d. kommersielle oppdrettsanlegg, fôr- og utstyrsproduksjon, foredlings- og salsverksemder, faglege organisasjonar, skuleverket, offentleg forvalting, forskings- og utgreiingsinstitusjonar. Studiet legg vekt på at drift av akvakultur vert gjort mest mogeleg i harmoni med naturen. Studiet kvalifiserer for å søke om oppdrettskonsesjonar.

Opptakskravet er generell studiekompetanse og 2MX eller 2MY eller 3MZ, og 3MX eller 3FY eller 3KJ eller 3BI eller 2KJ + 3BT eller 2BI + 3BT. Realkompetanse.

Studiet er bygd opp av emne på 10 studiepoeng som varer inntil eit semester. Fleire av emna vert gitt som blokkundervising over ein kortare periode (om lag 6 veker) med påfølgande sluttvurderering. Bachelorstudiet består av emne tilsvarande 180 studiepoeng (60 studiepoeng pr. år). Nærare omtale av dei einskilde emna er å finne i emneoversikta.

Arbeids- og undervisningsformer varierer frå emne til emne. Nærare omtale av emna finst i emneregisteret. Det vil bli lagt stor vekt på studentaktive læringsformer. Mange av emna inneheld ekskursjonar, laboratorieøvingar eller feltarbeid i tillegg til førelesingar. I mange av faga er det i tillegg praktisk arbeid i laboratorium, i naturen eller på akvakulturanlegg.

Ved ekskursjonar og feltarbeid må studentane vere budde på å betale ein eigendel for reise og opphald, jmf. HSF sitt reglement for dekning av bu- og reiseutgifter til studentane.

I løpet av studiet vert det praksisundervisning på akvakulturanlegg.

Det vert arbeidd med å etablere samarbeidsavtaler med utanlandske universitet slik at studentar som ynskjer det, kan ta delar av studiet i utlandet i 3. og/eller 4. semester.

Mange av emna har obligatoriske arbeidskrav i form av laboratorieøvingar, semesteroppgåver, feltarbeid eller ekskursjonar. Emneomtalane gjev nærare informasjon om arbeidskrav. For dei emna dette gjeld, er godkjende arbeidskrav eit vilkår for å få gå opp til eksamen.

Vurderingsordninga går fram av omtalen av dei einskilde emna.

Pensum er ført opp under kvart einskild emne.