Sjukepleie, bachelorstudium, rammeplan 2000

Studieplanen er utarbeidd i høve Rammeplan og forskrift for sjukepleiarutdanning fastsett av Kyrkje-, utdannings- og forskingsdepartementet 7 januar 2000, med heimel i § 46, nr 2 i lov av 12. mai 1995 nr 22 om Universitet og Høgskular. Studieplanen er vedtatt av Styret for Høgskulen i Sogn og Fjordane den 02.05.02. Sist revidert juni 2005

Fullført studium gjev rett til vitnemålet ”Bachelorgrad i sjukepleie” og danner grunnlag for autorisasjon som sjukepleiar.

Studiet kan danne grunnlag for opptak til mastergrad ved høgskule og universitet. Fullført studium og minimum 1 års yrkespraksis gjev grunnlag for opptak på vidareutdanning i sjukepleie.

Personar med generell studiekompetanse og søkjarar med realkompetanse.

Mål for studiet er å utdanne sjukepleiarar som:
• utøver etisk, juridisk og fagleg forsvarleg sjukepleie basert på kunnskapar, forskingsresultat og kritisk vurdering av eigen praksis
• har innsikt i sjukepleiefaget si utvikling i eit historisk perspektiv og utøver sjukepleie basert på grunnleggande omsorgsverdiar
• har eit reflektert og heilskapleg syn på mennesket som utgangspunkt for utøving av sjukepleie.
• utøver sjukepleie som tek omsyn til pasienten sine individuelle omsorgsbehov i ulike fasar i livet
• har yrkesidentitet som er grunna på sjølvstende og ansvar i utføringa av den direkte pasientretta, administrative, undervisande og fagutviklande sjukepleiefunksjonen.
• tek samfunns- og fagansvar ved å ha ei kritisk haldning til helsetenesta og ved å samarbeide med andre yrkesgrupper i løysinga av helseproblem

Verdigrunnlag
Høgskulen i Sogn og Fjordane, Avdeling for helsefag, byggjer på felles verdiar med andre helse- og sosialfaglege utdanningar og tek utgangspunkt i det verdisyn som kjem til uttrykk i Rammeplan og forskrift for 3 - årig sykepleierutdanning (KUF 2000). Rammeplanen trekk fram følgjande moralske prinsipp: respekt for at livet ikkje skal krenkast, respekt for mennesket sitt eigeverd og solidaritet med dei svakstilte.

Sjukepleiarutdanninga legg vekt på kunnskap og haldningar i høve til menneskesyn, menneskeverd og menneskerett. Høgskulen i Sogn og Fjordane, avdeling for helsefag, legg til grunn eit heilskapeleg syn på mennesket. At den einskilde tenesteytar tek omsyn til fysiske, psykiske, sosiale, kulturelle og åndelege sider ved mennesket er avgjerande for eit godt tilbod. Helseproblem og sosiale problem må og sjåast i samanheng med samfunnsmessige faktorar.

Sjukepleiehandlingar har som mål å fremje helse og lindre liding. Sjukepleie som pleie av det sjuke mennesket har som grunnlag forståing av sjukdommen sine konsekvensar for den sjuke, og kunnskap om opplevingsaspektet ved det å vere sjuk. Dette krev evne til innleving og deltakande haldning. Sjukepleie kan vere knytt til individ, mot grupper av menneske eller mot omgivnader, og sjukepleiekunnskapen skal setje mennesket i stand til å førebyggje eller meistre sjukdom.

Sjukepleiarkompetanse
Føremålet med utdanninga er at studentane skal tileigne seg sjukepleiarkompetanse. Med dette meiner ein evne til å nytte og utvikle sjukepleiekunnskapar, holdningar og ferdigheiter på ein god og tenleg måte i møte med pasient, pårørande og medarbeidarar. Å ha sjukepleiarkompetanse inneber at ein er fagleg kvalifisert og utfører yrket i samsvar med gjeldande lover, reglar og yrkesetiske retningslinjer.

Sjukepleiekunnskap skal setje ein i stand til å ivareta den sjuke på ein heilskapleg måte ut frå forståing av individet si oppleving av helsesvikt og trussel om helsesvikt. Sjukepleiaren skal ha kunnskap om og vidareutvikle kliniske metodar for pleie og omsorg ved ulike sjukdoms-tilstandar. Sjukepleiekunnskapen inneber at sjukepleiaren har eit sjølvstendig ansvar i høve iverksetting og oppfølging av forordna behandling, legemiddelhandtering og informasjon, herunder observasjon, vurdering og rapportering av effekt.

For å synleggjere kva forventningar arbeidsgjevar stiller til nyutdanna sjukepleiarar skil rammeplanen mellom handlingskompetanse og handlingsberedskap (Rammeplan og forskrift for 3-årig sjukepleieutdanning s.30).

Handlingskompetanse
Handlingskompetanse er knytt til område der det vert forventa at sjukepleiar etter utdanninga skal kunna fungere sjølvstendig. Den nyutdanna sjukepleiar skal ha handlingskompetanse til å ivareta og utøve oppgåver som er sentrale i yrkesfunksjonen. Kompetansen er i hovudsak retta mot pasientar og pårørande og ivaretek grunnleggjande funksjonar i sjukepleie.

Handlingsberedskap
Handlingsberedskap omfattar kunnskap som etter opplæring, rettleiing og praksiserfaring kan verte vidareutvikla til sjølvstendige funksjonar innan leiing, undervisning, rettleiing og fagutvikling.

Krav til fagleg forsvarleg og omsorgsfull hjelp
Lov om helsepersonell av 1.1. 2001 skisserer følgjande krav til fagleg forsvarleg og omsorgsfull hjelp. Bestemmingane i lova gjeld også studentar i klinisk praksis.

• Krav til å kjenne og innrette yrkesutøvinga etter faglege avgrensingar
• Plikt til å halde seg fagleg oppdatert
• Plikt til å innhente nødvendig informasjon om pasienten
• Plikt til å innhente samtykke til behandlinga
• Plikt til å involvere pasienten i behandlinga
• Teieplikt
• Plikt til avhald frå rusmidlar
• Plikt til å delta i undersøkingar i høve straffbare forhold og ved smittefare
• Plikt til å dokumentere verksemda
• Opplysing og meldeplikt
• Plikt til å yte øyeblikkelig hjelp som gjeld uansett arbeidsstad og i fritida

Opptakskrav skjer på grunnlag av generell studiekompetanse eller realkompetanse.

Utdanninga er delt opp i fire hovudemne som tek utgangspunkt i sjukepleiefaget sitt kunnskapsgrunnlag. Som ein ser av skissa nedanfor er kvart hovudområde delt opp i delemne. Delemna blir gjentekne i auka grad av kompleksitet gjennom studiet, noko som gjev fagleg kontinuitet og sikrar progresjon. Det blir lagt vekt på at studentane lærer å forstå samanhengar mellom dei ulike fagområda i utdanninga og utviklar evne til å forstå og handle på bakgrunn av dette i møte med pasientar.

* studiepoeng frå generell del (30 studiepoeng felles innan helse- og sosialfag)**desentralisert deltidsutdanning vil gå over fire år, det vil seie 45 studiepoeng pr. studieår. Skisse over deltidsutdanninga viser korleis dette er fordelt (sjå www.hisf.no/ahf/studieside/dok.htm)

Utdanninga er lagt til rette slik at ein kan gjennomføre studiet over tre år på heiltid eller fire år på deltid. Ein fylgjer same studieplan.

Utdanninga vil legge tilhøva til rette for varierte læringsformer med høg grad av studentaktivitet, både individuelt og i grupper. Læring er ein aktiv prosess og både den sosiale samanheng læring skjer innanfor og studenten sine personlege erfaringar vil påverke læreprosessen. Erfaringar frå praksis og teori er grunnlaget for all læring. Det er eit overordna mål at studenten utviklar personleg kunnskap og har eit aktivt forhold til eigne erfaringar og ny kunnskap. Dette krev ein aktiv studiedeltaking gjennom heile studiet med drøfting undervegs av både faglege og pedagogiske sider ved studiet. Studiekvalitet vert drøfta i fagutval og studienemnd ved avdelinga.

Arbeids- og undervisningsformene vil variere i dei ulike emna og vil gå fram av emneomtalen for dei einskilde emna. Forventa studieinnsats er 40 timar kvar veke, derav vil lærarstyrt undervisning/rettleiing utgjere i snitt 15 til 20 timar i teorivekene. I praksisperiodane skal studenten arbeide gjennomsnittleg 30 timar kvar veke.

Informasjons- og kommunikasjonsteknologi (IKT) er viktig for gjennomføring av studiet og i utøving av sjukepleie. Dette krev kunnskapar om og ferdigheiter i metodar for innhenting, kritisk utveljing, handsaming, strukturering og formidling av munnleg og skriftleg informasjon. Studenten vil tidleg i studiet få opplæring i bruk av IKT og bibliotektenester. Høgskulen sitt elektroniske læringsstøttesystem, Classfronter, vert nytta til all skriftleg informasjon og som pedagogisk verktøy.

Demonstrasjonsundervisning og aktiv trening på sjukepleiesenteret er nødvendig for å synleggjere grunnleggande sjukepleieferdigheiter og førebu seg til møte med pasientane i praksisfeltet.

Ved desentralisert deltidsstudium vil ein gjere nytte av fleksible undervisningsmetodar knytt opp til lokale studiegrupper og fellessamlingar ved avdeling for helsefag i Førde. I teoriperiodane vil det vere fire til seks fellessamlingar. I starten av studiet vil det bli oppretta grupper som basis for vidare samarbeid gjennom studiet. Gruppesamansetninga bør vere basert på geografisk tilknyting. Arbeidet i gruppene vil vere sjølvstyrt og bestå av skriftlege oppgåver, dialog og diskusjon der ein tek kontakt med faglærar etter behov. Ein tilrår gruppene å møtast ein gong kvar veke og at gruppene utarbeider ei skisse over korleis ein vil legge opp arbeidet.

Praksisstudia vil bli gjennomført på same måte som for heiltidsstudentar. Ein tek sikte på å legge til rette praksisstudia i kommunehelsetenesta i nærleiken av studenten sin bustadadresse innanfor Sogn og Fjordane. I spesialisthelsetenesta vert institusjonane i Sogn og Fjordane nytta.

Praksisstudium utgjer 90 studiepoeng (60 veker). Av desse utgjer 75 studiepoeng direkte pasientretta praksisstudium, og 15 studiepoeng trening i praktiske ferdigheitar, førebuing til og refleksjon over praksisstudium. Sjå emneomtale om praksisstudiar.

Praksisstudia er rettleia. Avdeling for helsefag legg vekt på rettleiing av studentar i praksisstudiar. Høgskulen sine fagtilsette har eit overordna ansvar i høve til å rettleie studentane og legge til rette gode læresituasjonar i praksis. Studentane skal i praksisstudia ha kontinuerleg rettleiing av sjukepleiar som bør ha rettleiingskompetanse og minst eit års erfaring som sjukepleiar. Sjukepleiarane på praksisplassen har ansvar for å rettleie studentane i høve praksisplassen sin spesialitet og eigenart.

Høgskulen i Sogn og Fjordane, Avdeling for helsefag nyttar praksisplassar i heile Sogn og Fjordane. Det er utarbeida eige reglement for tildeling av praksisplassar (Classfronter).

Studentane må vere førebudd på kostnader i samband med praksis. Det er utarbeid eige reglement for dekking av bu og reiseutgifter knytt til praksis: "Felles reglement for dekking av bu og reiseutgifter for studentar ved Høgskulen i Sogn og Fjordane".

Høgskulen i Sogn og Fjordane, Avdeling for helsefag, har tilbod til studentar som ynskjer å ta delar av utdanninga ved ein utanlandsk institusjon. Vi ynskjer at våre studentar skal sikrast eit kvalitetsmessig godt studieopphald i utlandet. Vi har inngått samarbeidsavtaler med utanlandske universitet og høgskular, og vi deltar i utvekslingsprogram. Informasjon om studieopphald i utlandet innanfor dei program og avtaler Høgskulen i Sogn og Fjordane har finn du ved å gå inn på www.hisf.no/ahf/international/.

For å kunne ta delar av studie i utlandet må studenten vise til gode faglege resultat frå både teori og praksis. Intervju av studenten vil og bli vektlagt.

Mange av emna har obligatoriske arbeidskrav. Arbeidskrav kan omfatte (frammøteplikt), målsetjing og arbeidskrav i praksis, gruppeoppgåver, skriftlege arbeid, gjennomføring av trening i prosedyrar, undervisningsopplegg, kasustikk med meir.

Emneomtala gjev nærmare informasjon om arbeidskrav.

Krav om studieprogresjon
Studenten må ha karakter ”greidd” i fylgjande fag/eksamenar for å gå vidare i studiet:

• SK106 Mikrobiologi og SK107 Anatomi/fysiologi/biokjemi må vere greidd før studenten kan starte i praksis i spesialisthelsetjenesta.
• SK110 Sjukepleie 1.studieår og SK115 Prosjekt i førebyggjande helsearbeid må vere greidd før studenten kan starte i 2. praksisperiode i spesialisthelsetjenesta.
• SK120 Sjukdomslære/farmakologi, SK125 Sjukepleie 2.studieår, SK128 Heimeeksamen i sjukepleie og SK135 Lovgjeving må vere greidd før studenten kan starte på fordjupingspraksis og avsluttande eksamen i sjukepleie.

Studenten må ha greidd kvart praksisstudium for å kunne halde fram utdanninga og gå opp til eksamen.

Arbeidskrav i dei ulike studieåra må vere gjennomført/godkjend for å gå opp til aktuelle eksamenar og praksis.

Vurderingsordninga går fram av omtalen av dei einskilde emna.

Vurdering i praksisstudiane
Vurdering er ein kontinuerlig og obligatorisk del av praksisrettleiinga. For kvar rettleia periode skal ein gjere ei avsluttande vurdering i høve til måla for praksisperioden. Ein rettleia praksisperiode reknast som eksamen jmf Forskrift om eksamen ved Høgskulen i Sogn og Fjordane.

Vurderingane vert skrive på fastlagt skjema der hovudpunkta er like for alle praksisstudia. Kriteria for greidd/ikkje greidd praksis og reglement som regulerar praksisstudiane ligg ved vurderingsskjemaet. Ein tek utgangspunkt i nivået studenten er på gjennom mål for praksisperioden, kriteria for greidd/ikkje greidd praksis og studentane sin plan for praksis. Student, kontaktsjukepleiar og lærar skal vere med på vurderingane. I prosjekt er student, ein sjukepleiar frå avdelinga, studentansvarleg sjukepleiar og lærar med på vurderingane.

Pensum går fram av omtalen av dei einskilde emna.