PE3-301/PE3-302 Læring og tilpassa opplæring

Emnet skal vidareutvikle studentens didaktiske kompetanse i arbeid med ulike strategiar for læring og med tilpassa opplæring i skulen. I tillegg skal det arbeidast med innovative prosessar i klasserommet og i skulemiljøet der ikt skal ha ei viktig rolle som verktøy.

Arbeidet med denne delen skal gi studenten auka kompetanse på metodar, arbeidsformer og vurdering av ulike pedagogiske tiltak. Eit særleg perspektiv vil vere ei tydleg lærarrolle med vekt på samspelskompetanse og dialogkunnskap i eit klasserom prega av kompleksitet og variasjon.

Studentar må fylle opptakskravet til masterutdanninga.

Emnet er delt i to hovuddelar:

Del 1: Perspektiv på læring (arbeidsmengde tilsvarande 10 studiepoeng) og eleven i læringsmiljøet (arbeidsmengde tilsvarande 5 studiepoeng)
Emnet tek sikte på at læraren skal kvalifiserast til å utvikle ein stadig betre tilpassa opplæring for alle elevar i sine grupper, også med vekt på elevar med særskilde behov. Læraren sin kompetanse på dette feltet vert knytt opp mot fordjupingsfaget og fagdidaktikken der. Her dreier det seg om å kunne gjere seg nytte av eksisterande spesialpedagogisk kompetanse i vanlege klasseromssituasjonar.

Del 2: Tilpassa opplæring (arbeidsmengde tilvarande 10 studiepoeng) og innovasjon (arbeidsmengde tilsvarande 5 studiepoeng)

Perspektiv på læring og eleven i læringsmiljøet må sjåast på som verktøy i samanheng med innovasjonsarbeid i klasserommet og i skulemiljøet som heilskap.

I delen perspektiv på læring, skal eit hovudfokus vere dei mange didaktiske utfordringane læraren har for å få i gang utviklande læringsprosessar i klasserommet. Studentane skal få innsikt i nyare teoretisk grunnlag for utvikling av strategiar for læring, i særleg grad knytt til læringsarbeid i dei sentrale skulefaga. Eit eige område vil vere bruken av digitale verktøy i læringsprosessar. Studentane skal også utvikle evne til å planlegge og leggje til rette for strategiar for læring i samarbeid med kollegaer, elevar og foreldre.

Eit sentralt poeng for å lukkast med differensiert og tilpassa opplæring er å involvere elevane i læreprosessen slik at dei tek ansvar i læringsarbeidet. Dette er hovudinnhaldet i den siste delen eleven i læringsmiljøet. I denne delen vil det bli arbeidd med omgrep som identitet, motivasjon og kjønn som særleg viktige faktorar for å leggje til rette for eit positivt læringsmiljø.

Tilpassa opplæring og innovasjon er sett saman av to delar, som heng nøye saman ved at tilpassa opplæring må vere den fyrste studentane tek, og delen innovasjon byggjer direkte på denne.

I delen tilpassa opplæring vil utdanningspolitiske utfordringar med vekt på lov, regelverk og offentlege utgreiingar, danne bakgrunn for analyse og drøfting av innhaldet i omgrepet tilpassa opplæring. Målet skal vere at studentane får god innsikt i og forståing av intensjonane med retten til ei tilpassa opplæring.

Skular som lukkast med å differensiere og tilpasse opplæringa, gjer det fordi det finst lærarar eller grupper av lærarar som gjennomfører tiltak som fungerer. Arbeidet med denne delen skal gi studenten auka kompetanse på metodar, arbeidsformer og vurdering av ulike pedagogiske tiltak. Eit særleg perspektiv vil vere ei tydleg lærarrolle med vekt på samspelskompetanse og dialogkunnskap i eit klasserom prega av kompleksitet og variasjon.

Utfordringane med å tilpasse og differensiere opplæringa er ikkje berre eit individuelt læraransvar, heile skulefellesskapet har ansvar. I delen innovasjon vert det lagt vekt på ei forståing av at tilpassa opplæring for alle i ein inkluderande skule med likeverdig opplæring, krev eit målretta innovasjonsperspektiv. Ein skule som skal nærme seg ideelle mål må ha i seg potensiale for kontinuerleg forbetring. Studentane skal gjennom studiet sikre seg:

• • Kunnskap og ferdigheiter når det gjeld endringsstrategiar
  • Kunnskap om barrierar og motstand mot endringar
  • Kunnskap om kontinuerleg kompetanseheving i form av lærande organisasjonar

Studiet er bygd opp rundt samlingar med førelesingar, diskusjonar, seminarpresentasjonar og gruppearbeid. På samlingane vil studentane møte varierte og problemorienterte arbeidsformer. Ei gjennomgåande arbeidsform er skriving av større og mindre fagtekstar, med tilhøyrande rettleiar- og studentrespons. Studiet stiller krav om sjølvstendig pensumgjennomgang og aktiv tilnærming til dei problemstillingar studentane vert presenterte for.

Fronter vert nytta aktivt som lærings- og kommunikasjonsplattform.

Arbeidskrava må vera gjennomført og godkjende før studenten får gå opp til eksamen. Eksamensspråket er norsk.

Arbeidskrav:

Del 1: 2 skriftlege oppgåver - ei individuell- og ei gruppeoppgåve.

Eksamen:

Læring og tilpassa opplæring, del 1, første semester. 15 studiepoeng:
PE3-301:Munnleg individuell eksamen

Læring og tilpassa opplæring, del 2, andre semester. 15 studiepoeng:
PE3-302 002: ei skriftleg, individuell oppgåve
Vekting: 50%
PE3-302 001: Individuell, skriftleg eksamen. Tid: 4 timar
Vekting: 50%

Karakterskala:

Arbeidskrava vert vurdert til greidd/ikkje greidd. På eksamen vert det nytta ein gradert karakterskala på fem trinn frå A til E for greidd med A som beste karakter, og F for ikkje greidd.

Omlag 2200 sider