Namn på studiet
TRENARUTDANNING
Studiepoeng
30
Organisering
Høgskulen i Sogn og Fjordane står som fagansvarleg for heile studiet medan Norges Skiforbund ansvarleg for gjennomføringa av dei ulike trenarkursa i alpint. Trenarutdanninga er bygd opp med 15 sp. idrettsfagleg basis for trenarar (fysiologi, treningslære) og 10 + 5 sp i alpint. For ein detaljert oversikt over innhaldet, sjå omtale av det enkelte emne. Det vil bli lagt vekt på å integrere teori og praksis.
Studiet kan takast i sin heilskap som 30 studiepoeng eller som modular. Studentar som tidlegare har gjennomført årseining i kroppsøving (60 studiepoeng) treng ikkje gjennomføre emnet som omhandlar idrettsfagleg basis for trenarar. Dei vil då få godkjent 15 sp alpint som kan nyttast i oppbygging av utdanningsgrad eller som vidareutdanning.
For studentar som ynskjer å halde fram med utdanning i idrett kan delar av dette studiet godkjennast på 1. år idrett bachelor.
Studiet er eit betalingsstudium.
Studenten må sjølv dekke utgifter til reise, opphald og materiell til dette i tillegg til studieavgifta.
Kompetanse / formell grad
Studiet gjev kompetanse som Trenar 1,2 og 3 i skidisiplinen alpint. Studiet er ei sjølvstendig eining, og delar kan godkjennast i oppbygging av ein bachelorgrad.
Målgruppe
Ungdomar og vaksne som ynskjer trenarkompetanse
Mål for studiet
Siktemålet med studietilbodet er å tilføre idrettsorganisasjonane og skuleverket trenarkompetanse på høgt nivå. Studiet gjev såleis grunnlag for arbeid som trenar og instruktør. Studiet tek sikte på å gjere studentane godt kvalifisert til alpine aktivitetar i den frivillige idretten og skulen på alle nivå.
Kroppsøvingsfaget og idrettsorganisasjonane på alle nivå etterspør spesialkompetanse. Studiet tek særleg sikte på å utdanne praktisk kompetente trenarar og instruktørar.
Studiet har også som hovudmålsetjing å bidra til å sameine kompetansegjevande utdanning i kroppsøvingsfaget med idretten sine instruktør- og trenarkurs. Å få samla innsyn i verdiar, forståingsramme og metodikk som skule, idrett og andre interesseorganisasjonar representerar, meiner ein vil tene alle som skal arbeide med barn og unge.
Opptakskrav / krav til forkunnskapar
Opptakskrav til studiet er generell studiekompetanse eller realkompetanse. Opptakskrav til fordjupingskurs er godkjente grunnleggande kurs.
Undervisnings- og læringsformer
Hovudarbeidsforma i dei teoretiske emna vil vere førelesingar, gruppe- og individuelt arbeid. I dei praktiske timane vil det metodiske grunnlaget vere sentralt, saman med eigendugleik og meistring av sentrale rørslemønster. Praktisk og teoretisk lærestoff blir integrert i timane.
Praksis
Sjå emneomtalane
Arbeidskrav
Arbeidskrava går fram av emneomtalane.
Sluttvurdering
Sluttvurdering går fram av emneomtalane.
Pensum
Førebels pensumliste skal ligge føre ved studiestart.