Naturfag til glede og nytte - få inspirasjon til undervisninga er utarbeidd i samarbeid mellom utdanningsdirektøren og Høgskulen i Sogn og Fjordane. Bakgrunnen er Kunnskapsløftet sitt krav til auka kompetanse i naturfag.

Studiet er ei målretta satsing på kompetanseheving i naturfag ved skulane i Sogn og Fjordane. Lærarar som ønskjer å ta vidareutdannninga må vere knytte til skular som skal delta i denne satsinga. Dei får rolla som prosjektleiar ved eigen skule. Det kan vere ein eller fleire prosjektleiarar ved kvar skule. Andre lærarar ved same skule kan delta i etterutdanninga utan å ta eksamen.

Undervisninga vil gå føre seg på fellessamlingar med tilbod av ulike fagbaserte verkstader der alle deltakarane skal delta på ulike sjølvvalde verkstader.

Mellom samlingane vert studentane organisert i geografisk baserte studieringar.

Høgskulen i Sogn og Fjordane har ansvar for rettleiing av studentane gjennom to ulike rettleiingsgrupper; rettleiingsgruppe FAG og rettleiingsgruppe PROSJEKT.

Vidareutdanning i naturfag, 30 studiepoeng.

Lærarar i grunnskule og vidaregåande skule som underviser i naturfag.

Studiet skal gje fagleg og didaktisk vidareutdanning i naturfag tilpassa kompetansemåla i den nye læreplanen (Kunnskapsløftet).

Fullført allmennlærarutdanning eller minimum 3 år høgre utdanning og praktisk- pedagogisk utdanning.

Studenten skal undervise i naturfag ved eigen skule i heile tidsrommet studiet går.

Prosjekt

• Studenten er prosjektleiar for prosjektet. Prosjektet skal i tillegg ha andre deltakarar frå kollegiet ved eigen skule og skal involvere heile skulen i endringsprosessen. T.d. kan ein kople undervisning i norsk-, matematikk, kroppsøving, kunst og handtverk, og etikk i KRL faget til naturfagundervisninga.
• Prosjektet har som mål å styrke naturfagundervisninga ved eigen skule ved å gjennomføre fornying i fagleg og didaktisk innhald. Prosjektet skal ha fokus på fagleg innhald, undervisningsformer og bruk av naturfagrom, newtonrom og utstyr.
• Prosjektet skal vere forankra i kompetansemåla i naturfag i læreplanen (Kunnskapsløftet) og vere med i skulen sin utviklingsplan.

Fagleg innhald

Det faglege innhaldet vert presentert og gjennomgått på ulike verkstader på fellessamlingane.

Følgjande hovudemne inngår i studiet sin fagdel:

a) Forskarspiren – barne- og ungdomstrinnet og Vg1 (gjennomgripande stoff)

b) Fenomen og stoff – barne- og ungdomstrinnet

c) Mangfald i naturen – barne- og ungdomstrinnet

d) Kropp og helse – barne- og ungdomstrinnet

e) Verdsrommet – barne- og ungdomstrinnet

f) Teknologi og design – barne- og ungdomstrinnet

g) Berekraftig utvikling – Vg1

h) Ernæring og helse – Vg1

i) Stråling og radioaktivitet – Vg1

j) Energi for framtida – Vg1

k) Bioteknologi – Vg1

Verkstader

• Kvar student får eit individuelt tilpassa studieopplegg der det inngår deltaking på minimum 20 verkstadar.
• Studenten har ansvar for å melde seg på verkstadar som tek opp tema der ein meiner ein treng meir kunnskap.

Studieringar

• Studeringane startar med å legge fram og drøfte prosjektplanane til dei ulike skulane. Deretter drøftar studieringane korleis ein kan legge opp undervisninga knytt til dei ulike hovudemna i læreplanen, t.d. fenomen og stoff, kropp og helse, mangfald i naturen, teknologi og design, bioteknologi m.m.
• Studentane arbeider med fagstoffet sjølvstendig og i studieringar. Spørsmål skal drøftast i studieringane.
• Studieringane skal utfordre kvarandre i faglege og didaktiske spørsmål.
• Studieringane kan melde faglege spørsmål til rettleiingsgruppe FAG og spørsmål om utviklingsarbeidet på eigen skule til rettleiingsgruppe PROSJEKT.
• Studieringane skal ein gong i semesteret levere og få tilbakemelding på oppgåver frå Høgskulen i Sogn og Fjordane.

Gjennoføring av prosjektet

• Ei førebels prosjektskisse skal føreligge til samlinga 18. april -07. Rettleiingsgruppe Prosjekt vil gje tilbakemelding på prosjektskissa på samlinga.
• Endeleg prosjektskisse skal vere klar innan 15. juni 2007.
• Rettleiingsgruppe PROSJEKT ved Høgskulen i Sogn og Fjordane skal godkjenne prosjektskissa frå kvar deltakande skule.
• Endeleg prosjektskisse skal leverast rettleiingsgruppe Prosjekt ved Høgskulen i Sogn og Fjodane for godkjenning.

Rapportar

• Prosjektleiar skal levere ein milepelrapport på maksimum 5 sider om prosjektet ein gong per semester. Her skal framdrifta på prosjektet vurderast i høve prosjektet sine mål og delmål.
• Milepelsrapportane skal godkjennast av skulen si leiing og deretter oversendast rettleiingsgruppe PROSJEKT ved Høgskulen i Sogn og Fjordane for endeleg godkjenning.
• Vinteren 2009 skal studenten levere ein endeleg prosjektrapport som dokumenterer alle sider ved prosjektarbeidet, m.a. ein eigen vurdering av endringar i naturfag-undervisninga ved skulen frå 2007-2009.

Rettleiing

• Rettleiingsgruppene svarer på spørsmål frå studieringane.

For 2007 er det sett av 30 rettleiingstimar, i 2008 er det sett av 40 rettleiingstimar, og i 2009 er det sett av 20 rettleiingstimar i året til kvar studiering. Totalt vil kvar studiering i løpet av studiet få tilbod om 90 rettleiingstimar fordelt på prosjekt og fagdel

• Studenten skal delta på minimum 20 verkstader
• Studenten skal delta aktivt i ein studiering som leverer i alt fem rapportar til godkjenning
• Studenten skal levere fire milepelsrapportar og ein sluttrapport frå prosjektet ”Utviklingsarbeid i naturfag”
• Studenten skal gjennomføre ei skriftleg vurdering av eigne læreverk i forhold til supplerande og alternative læringsressursar, og i forhold til det ein har lært på samlingane

• Den endelege prosjektrapporten skal danne grunnlag for ei munnleg evaluering av prosjektet vinteren 2009.

• Det kan vere fleire studentar frå same skule som tek studiet som vidareutdanning. Desse vil samarbeide om prosjektet, men skal gå opp til ei individuell munnleg eksamen på prosjektet vinteren 2009.

• Det vert arrangert munnleg eksamen våren 2009. Her vert studenten prøvd i faglege og didaktiske moment knytt til kompetansemåla i Kunnskapsløftet

• Studenten må kunne gjere greie for korleis han/ho vil legge opp undervisninga i eitt av hovudemna i læreplanen.

• Studenten skal kunne svare for kva som kan gå galt og kvifor det gjekk galt, dersom forsøk ikkje går som planlagt.

• Karakteren på fagdelen utgjer 2/3 av den samla karakteren på studiet.

• Litteratur frå dei verkstadane ein deltek på (minimum 20).
• Felleslitteratur: Naturfag 5 (utvalte kapittel) av H. Brandt, T. Fodstad, O.T. Hushovd og C.W. Tellefsen. Aschehoug 2006.
• Referanselitteratur: Læreverk i naturfag, fysikk, kjemi og biologi for vidaregåande skule og læreverka i naturfag for grunnskulen.