Ovddasvástádus ja doaimmat

Sámi arkiivvas lea ovddasvástádus almmolaš arkiivvain main lea mearkkašupmi sámi servodahkii, historjái ja kultuvrii. Sámi arkiivvas lea maiddái ovddasvástádus sámi priváhtaarkiivvain. Dat leat arkiivvat maid priváhtaolbmot, organisašuvnnat, searvvit ja ealáhusat leat ráhkadan. Arkiiva galgá váldit vuostá, áittardit ja lágidit sámi servodagaid arkiivamateriála oaidninláhkái. Ulbmilin lea earet eará sihkkarastit čálalaš historjjálaš gálduid mat sáhttet čuvget sámi historjjá, ja lágidit daid nu ahte olbmot daid oláhit. Dat lea maiddái deaŧalaš vuođđun sámi giella-, historja- ja kulturbarggus.

Sámi arkiiva galgá nappo ohcat ja lágidit boares arkiivvaid oaidninláhkái. Maiddái ođđaset arkiivvat fertejit sihkkarastojuvvot maŋit áigái. Ovdamearkan ođđa gálduide mat fertejit seailluhuvvot, leat sámi organisašuvnnaid arkiivvat mat leat deaŧalaš vuođđun go sápmelaččaid ođđaset historjá galgá čállojuvvot.

Samisk Arkiv/Sámi Arkiiva, Ájastealli 3, 9520 Guovdageaidnu, Tlf: 78 48 50 11
E-poasta: os@arkivverket.no