Finnmárkkuopmodaga dárkkistanlávdegoddi lea nammaduvvon

Kristin Normann lea stáhtaráđis bearjadaga ođđajagemánu 10. beaivvi nammaduvvon Finnmárkkuopmodaga dárkkistanlávdegotti jođiheaddjin. Professor dr. juris Hans Petter Graver lea Kristin Normanna várrelahttun nammaduvvon. Dárkkistanlávdegoddi galgá bearráigeahččat Finnmárkkuopmodaga stivrra doaimma.

Normann lea advokáhtta dr. juris, ja sus lea dál virgelohpi vuosttašamanuensavirggistis Oslo Universitehtas. Sus lea doavttirgráda čielggadeamis ” Styremedlemmers erstatningsansvar i aksjeselskaper" (Stivramiellahtuid buhtadusovddasvástádus oasusservviin). Normann lea ee. leamaš miellahttun Forbrukerkjøpslovutvalget (Geavaheaddjeoastinláhkalávdegottis) ja Borettslovutvalget (Ássanriekteláhkalávdegottis), stivralahttun Oslo Børsas, ovdaolmmožin Norske Finansanalytikeres Forening (Norgga finánsaanalytihkkáriid Searvvi), Etisk Komité (Ehtalaš lávdegottis) 1999 rájes, ovdaolmmožin Eksportfinans ASA ja Kommunekreditt AS dárkkistanlávdegottiin, ovdaolmmožin Gjensidge NOR ASA, Gjensidige NOR Sparebank ASA ja Gjensidige NOR Spareforsikring ASA dárkkistanlávdegottiin.

Graveris lea doavttirnákkus čielggadusain ”Den juristskapte virkelighet” (Juristaásahan duohtavuohta). Gravera dutkansuorgi lea vuosttažettiin gilvo- ja márkanriekti, hálddašanriekti ja EEO-riekti. Graver lea ovttas professoriin Geir Ulfstein maid álbmotrievttálaččat árvvoštallan Bondevik II-ráđđehusa Finnmárkkulága evttohusa.

Normann ja Graver leaba nammaduvvon guovvamánu 10. beaivvi 2006 rájes juovlamánu 31. beaivvi 2009 rádjái.

Finnmárkku fylkkadiggi lea nammadan dárkkistanlávdegotti miellahttun Hasvik Utvikling KF beaivválaš jođiheaddji Eva Danielsen Husby, Goahteluovttas eret, ja Deatnulačča Einar Johansena várrelahttun. Sámediggi lea nammadan professora Ole Henrik Magga Sámi allaskuvllas Guovdageainnus miellahttun, ja Wiebke Slåttsveen Davvisiiddas várrelahttun.

Dárkkistanlávdegotti doaibman lea:

dárkkistit ahte Finnmárkkuopmodaga doaibma jođihuvvo Finnmárkkulága ja eará lágaid mielde,
válljet ovtta dahje eanet stáhtaautoriserejuvvon revisoraid dárkkistit Finnmárkkuopmodaga rehketdoalu,
dohkkehit Finnmárkkuopmodaga jahkerehketdoalu, jahkedieđáhusa ja revišuvdnadieđáhusa
dohkkehit stivrra buhtadusaid,
dohkkehit loatnaváldimiid ja dáhkidemiid

dohkkehit buorrinbázu juohkima