INNHALD

Brukarane av heimesjukepleie får ivaretatt grunnleggjande behov. På sjukeheimen er situasjonen svært vanskeleg, grunnleggjande behov blir ikkje ivaretatt og bemanninga er ikkje forsvarleg.

Helsetenestene til eldre i Øygarden kommune er svært sårbare, og risiko for svikt er til stades. Øygarden kommune er komen kort i arbeidet med å etablere internkontrollsystem og har betydelege utfordringar i høve til å sikre at alle pasientar får forsvarleg helsehjelp.

Innan dei reviderte områda er det påpeikt følgjande avvik:

• Pasientar ved Øygarden sjukeheim får ikkje ivaretatt grunnleggjande behov.
  Avvik frå Lov om helsetenesta i kommunane § 2-1, jf § 6-3 og lov om statleg tilsyn § 3.
• Bemanninga ved Øygarden sjukeheim er ikkje fagleg forsvarleg.
  Avvik frå Lov om helsetenesta i kommunane § 6-3, tredje ledd, jf § 3-3 og Forskift for sjukeheim og buform for heildøgns omsorg og pleie § 3-2 c og d.
• Legetilsynet ved Øygarden sjukeheim tilfredsstiller ikkje kravet til fagleg forsvarleg verksemd ved at pasientane ikkje systematisk blir vurderte av lege ved inn- og utskriving og minimum ein gong i året
  Avvik frå Lov om helsetenesta i kommunane § 2-1, jf § 6-3, tredje ledd, jf lov om legar § 43 og forskrift om leges og helseinstitusjons journal for pasient § 6 og § 7.
• Det er ikkje etablert system som sikrar forsvarleg føring og oppbevaring av pasientopplysningar ved Øygarden sjukeheim. Føring og oppbevaring av pasientopplysningar er ikkje forsvarleg.
  Avvik frå Lov om statleg tilsyn § 3 og Lov om legar § 43, jf forskrift om leges og helseinstitusjons journal for pasient §§ 5, 6, 7, 9 og 10.
• Det er ikkje etablert system som sikrar forsvarleg føring og oppbevaring av pasientopplysningar i heimesjukepleien. Dokumentasjon av helsetilstand og iverksett behandling av pasientar er ikkje forsvarleg.
  Avvik frå Lov om statleg tilsyn § 3 og Lov om legar § 43, jf Forskrift om leges og helseinstitusjons journal for pasient § 5, første ledd, §§ 6 og 7.
• Kommunen oppfyller ikkje krav til forsvarleg sakshandsaming ved tildeling av og avslag på søknad om helsetenester.
  Avvik frå Lov om helsetenesta i kommunane §§ 2-1, fjerde ledd og Lov om behandlingsmåten i forvaltningssaker §§ 11a og 25.
• Øygarden kommune er komen svært kort i arbeidet med å etablere internkontrollsystem for helsetenestene.
  Avvik frå Lov om statleg tilsyn med helsetenesta § 3 og Forskrift om kvalitet i pleie- og omsorgstenestene § 3.

Fylkeslegen har gitt følgjande merknad:

• Organisasjonen er ikkje klar på alle nivå

Dato: 7. mars 2000

Formålet med tilsynet er todelt: For det første å bidra til kvalitetsutvikling. For det andre å vurdere korleis verksemda oppfyller krav som følgjer av lover og forskrifter for helsetenesta.

Tilsynet omfatta mellom anna:

• om internkontroll i verksemda er formålstenleg og dekkjande
• om aktivitetar blir utførte slik dei er framstilte skriftleg og muntleg.
• om verksemda når måla sine og driv verksemda innanfor rammene som styresmaktene har sett.

Tilsynet blei gjennomført ved gransking av dokument, ved intervju, synfaring ved Øygarden sjukeheim og verifikasjonar, jf punkt 6. Rapporten omhandlar avvik og merknader som blei avdekte ved tilsynet.

Avvik er definert som mangel på oppfylling av krav som styresmaktene stiller.

Merknad er tilhøve som ikkje blir omfatta av definisjonen for avvik, men der tilsynet med utgangspunkt i krav som styresmaktene har sett, avdekkjer potensial for betring.

• Aktuelle lover og forskrifter:
• Lov av 30. mars 1984 nr 15 om statleg tilsyn med helsetenesta (tilsynslova)
• Lov av 19. november 1982 nr 66 om helsetenesta i kommunane (kommunehelsetenestelova)
• Lov av 13. juni 1980 nr 2 om legar (legelova)
• Lov om behandlingsmåten i forvaltningssaker av 10. februar 1967 (forvaltningslova)
• Lov av 25. september 1992 nr 107 om kommunar og fylkeskommunar (kommunelova)
• Forskrift av 17. mars 1989 nr 277 om leges og helseinstitusjons journal for pasient (journalforskrifta)
• Forskrift av 14. november 1988 nr 932 for sjukeheim og buform for heildøgns omsorg og pleie (sjukeheimsforskrifta)
• Forskrift av 27. februar 1997 nr 358 om kvalitet i pleie og omsorgstenestene (kvalitetsforskrifta)
• Korrespondanse mellom Øygarden kommune og Fylkeslegen.
• Dokumentasjon frå Øygarden kommune, jf vedlegg 1.
• Verifikasjonar, jf punkt 6.

• Internkontroll.
  Lov om statleg tilsyn med helsetenesta av 30. mars 1984 nr 15, § 3.
  Forskrift om kvalitet i pleie og omsorgstenestene av 27. februar 1997, § 3.
• Saksbehandling ved tildeling av tenester og ved avslag på søknad om tenester.
  Lov om behandlingsmåten i forvaltningssaker av 10. februar 1967.
  Lov om helsetenesta i kommunane av 19. november 1982 nr 66, § 2-1 og § 2-4, jf §§ 1-1 og 1-3.
  Lov om kommunar og fylkeskommunar av 25. september 1992 nr 107, § 23.
• Dekking av grunnleggjande behov.
  Lov om helsetenesta i kommunane av 19. november 1982 nr 66, §§ 1-1 og 2-1, jf § 1-3, § 3-3 og § 6-3, tredje ledd.
  Forskrift om kvalitet i pleie- og omsorgstenestene av 27. februar 1997 nr 358, § 1 og 3.
  Forskrift for sjukeheim og buform for heildøgns omsorg og pleie av 14. november 1988 nr 932.
  Lov om legar av 13. juni 1980 nr 42, § 43.
  Forskrift om leges og helseinstitusjons journal for pasient av 17. mars 1989.

Melding om tilsyn blei sendt til Øygarden kommune 12. november 1999. Dokumentasjon som Fylkeslegen ba om, blei mottatt i ekspedisjon av 17. desember 1999. Framlegg til program blei oversendt 7. januar 2000. Endeleg program blei sendt 25. januar 2000.

I opningsmøtet 3. februar blei det gitt informasjon frå Fylkeslegen om formålet med og gjennomføringa av tilsynet. Det blei gjennomført 12 intervju, synfaring ved Øygarden sjukeheim og verifikasjonar, jf punkt 6. I sluttmøtet ga Fylkeslegen ei oppsummering og presentasjon av resultat. I vedlegg 2 er det gitt eit oversyn over deltakarane ved tilsynet.

Fylkeslegen fekk tilgang til møtebok frå siste møte i inntaksnemnda 18. januar 2000. Dei fem siste søknadane om plass i sjukeheimen og dei fem siste vedtaka om tildeling, dei fem siste søknadane om heimesjukepleie og vedtak om tildeling og dei to siste avslaga på høvesvis sjukeheimsplass og heimesjukepleie blei verifiserte. Søknadsskjema blir nytta rutinemessig. Eit av søknadsalternativa er "institusjon". I skjemaet er det ikkje skilt mellom søknad til sjukeheim og aldersheim.

Saksbehandlingstida varierte mellom ei veke og fleire månader. Det går ikkje alltid fram av søknaden eller vedtaket kva vedkommande meinte å søkje om.

I vedtaket får alle søkjarar informasjon om klagerett. Ein som har søkt om og får avslag på søknad om plass i institusjon, får opplyst om klagerett etter kommunehelsetenestelova dersom inntaksnemnda har vurdert søknaden i høve til behov for sjukeheimsplass. Tilsvarande får søkjar informasjon om klagerett etter sosialtenestelova dersom nemnda gir avslag på plass i aldersheim. Ein som til dømes har søkt om og får avslag på søknad om plass i institusjon, kan i staden få tildelt heimesjukepleie utan at det er søkt om dette.

Avslag er grunngitt, men ikkje alltid medisinsk-fagleg. Ti pasientar var "godkjende" for plass i sjukeheimen, men var sett på venteliste. I dei vedtaka som blei gjennomgått av Fylkeslegen, var "godkjenning for inntak" og plassering på venteliste grunngjeve med mangel på plass i institusjon. Det var ikkje opplyst om ventetid.

Delegasjonsreglementet av 12. mai 1996 blei verifisert. Alle vedtak av ikkje prinsippiell art er delegert til rådmannen. Det går ikkje fram av framlagt dokumentasjon at rådmannen har delegert vidare til inntaksnemnda (vedtak om plass i institusjon) eller til omsorgsleiar (vedtak om heimesjukepleie). Fylkeslegen ba i samband med tilsynet kommunen legge fram dokumentasjon på slik delegasjon.

Legevisittboka inneheld i kronologisk rekkefølgje frå juli 1998 til dato for tilsynet, namn på pasientar, problemstilling(ar) og notat om tiltak som lege har bestemt skal setjast i verk. Det blei ikkje funne døme på at svar som legen hadde gitt ikkje var overført til kardex.

Fem pasientjournalar og kardex blei verifiserte. Det blei sett etter om journalane oppfyller krav til journalføring, jf legelova § 43 og journalforskrifta §§ 5, 6, og 7.

Pasientjournal frå det kommunale legekontoret blir rutinemessig overført til sjukeheimen. Journalane på sjukeheimen går difor til dels svært langt tilbake i tid. Journalarka er ikkje nummererte og det er vanskeleg å få oversikt. Innkomst- og eventuell utskrivingsdato er vanskeleg eller uråd å finne. I nokre tilfelle er det opplysningar om dette i kardex, men ved å samanhalde opplysningane i kardex med journalen, går det fram at opplysningane ikkje er samanfallande.

Opplysningar om diagnose ved innkomst eller endringar i diagnose er ufullstendige eller ikkje tilgjengelege. Status ved innkomst er ikkje alltid ført (1 av 5 journalar). Årleg status blei ikkje funne.

Notat i legejournalen frå dei siste to åra er daterte og oftast, men ikkje alltid, signerte. I kardex er notat signerte og ført med dag og månad, men ikkje alltid med årstal. Medikamentkort er datert og signert og er i samsvar med opplysningane i kardex.

Legevisittboka inneheld i kronologisk rekkefølgje frå juni 1999 til dato for tilsynet, namn på pasientar, problemstilling(ar) og notat om tiltak som lege har bestemt skal setjast i verk. Opplysningane var ikkje overførte til kardex.

Kardex for fem pasientar blei grundig gjennomgått. Kardex var ikkje oppdatert. I to av kardexane var siste notat frå 1998. Dei fleste notat var signerte, men ikkje alle. Ikkje alle notat var daterte med årstal. Diagnose var ikkje alltid registrert.

Ved å samanlikne namn på pasientar i kardex og i denne permen gjekk det fram at det ikkje var vedtak for alle pasientane. Vedtaka var generelle og ga ikkje informasjon om dei konkrete sjukepleietenestene pasientane skulle få hjelp med.

Følgjande observasjonar ligg til grunn for avviket:

• I intervju er det gitt motstridande opplysningar i høve til om alle som kan kome opp kjem opp i helgene og etter middagskvilen.
• Det er rutine at pasientane badar/dusjar kvar 14. dag. Dersom pasientar ønskjer eller treng å bade/dusje oftare går det ut over tilbodet til dei andre pasientane.
• Det er ikkje tid til å kartleggje interessane til pasientane og å la dei sjølve gjere det dei klarar. Oppdaterte, individuelle pleieplanar manglar.
• Det blir opplyst at pasientane sjeldan får hjelp til å kome ut, og at det i løpet av dagen sjeldan er høve til sitje hos, prate med eller aktiviser pasientane.
• Det blir opplyst at personalet ikkje har tid til å følgje opp ofte nok pasientar som treng hjelp til å få nok drikke.
• Det er ikkje faste rutinar for å vege pasientane.
• 16 pasientar brukar rullestol. Ein av pasientane kan stå opp eller legge seg utan nokon form for hjelp. Dei andre (21) må ha meir eller mindre hjelp til alt.
• Det blir opplyst at det ikkje er tid til målretta og systematisk arbeid.
• Det er ikkje særskilt tilrettelagt tilbod til alders demente. Alders demente som treng tilsyn og oppfølging ein til ein, kan ikke få det.
• Eksklusive styrar er pleiebemanning på dagvakt minimum 6 (4-5 hjelpepleiarar og 1-2 ufaglærte. Sjukepleiar ca. 1 dag i veka.). På kveldsvaktene er der minimum 4 personar, og det er sjukepleiar på vakt ca ein kveld i veka. Om natta er det 2 personar på vakt; 0-1 sjukepleiar (ein sjukepleiar tilsett i 50% stilling), ein hjelpepleiar og/eller ein ufaglært.

Følgjande observasjonar ligg til grunn for avviket:

• Styrar fyller i praksis funksjonar både som styrar, avdelingssjukepleiar, sjukepleiar og kontorhjelp.
• I tillegg til styrar er det sjukepleiar på dagvakt ca 1 dag i veka.
• Det er sjukepleiar på kveldsvakt ca 1 kveld i veka.
• Meir enn 50% av nattevaktene er det ikkje sjukepleiar på vakt.
• Det er ikkje sjukepleiar i bakvakt når det ikkje er sjukepleiar på vakt på sjukeheimen.
• Det er regelmessig hjelpepleiarar som går ansvarsvakter.
• I intervju blei det opplyst at hjelpepleiarane har stort ansvar, både i stell og observasjon av pasientane.
• Det er omfattande bruk av ufaglærte vikarar ved Øygarden sjukeheim. Vikarane går nokre vakter "på topp" for å sjå korleis oppgåver blir utførte. Det er ikke organisert opplæring eller oppfølging av vikarane ut over dette.
• Det blir opplyst at utilstrekkeleg informasjon/opplæring og lite erfaring kan medføre at endringar i tilstanden til pasientane ikkje blir observerte og rapporterte.

Følgjande observasjonar ligg til grunn for avviket:

• I intervju blei det opplyst at det ikkje er rutine for å ta opp innkomst status eller årleg undersøking av langtidspasientar, jf journalforskrifta § 7.
• Ved verifikasjon av pasientjournalar går det fram at innkomststatus og årleg status ikkje var ført.
• Status ved utskriving vart ikkje funne i dei verifiserte journalane sjølv om det av andre opplysningar i journalane kunne sjå ut til at pasienten hadde vore innlagt/utskriven tidlegare.

Følgjande observasjonar ligg til grunn for avviket:

• Øygarden sjukeheim har ikkje skriftlege rutinar for føring av journal/kardex.
• I "legevisittboka" som går attende til juli 1998, er det kronologisk føring av medisinske opplysningar om enkeltpasientar.
• Ved verifikasjon av journalar er det vanskeleg å få oversikt over nødvendige opplysningar om helsetilstanden til pasientane. Journalarka er ikkje nummererte. Innkomstdato kan som hovudregel ikkje finnast. Diagnose ved innkomst er ikkje ført og endringar i diagnose går ikkje fram av journalen. Det er ikkje alltid samanfallande opplysningar om diagnose i pasientjournal og kardex.
• Det følgjer av observasjonar under avvik 3 at det ikkje er tatt innkomststatus av pasientar eller årleg status av langtidspasientar.
• Det blei opplyst i intervju at journalar rutinemessig blir overførte frå det kommunale legekontoret til Øygarden sjukeheim når pasienten blir innlagt.

Følgjande observasjonar ligg til grunn for avviket:

• Ved verifikasjon av kardex og ei eiga "legevisittbokbok" i heimesjukepleien går det fram at ikkje alle opplysningar om enkeltpasientar blir overførte frå denne legevisittboka til kardex.
• Det blei opplyst i intervju at kardex ikkje er oppdatert og heller ikkje blir regelmessig lesen av pleiepersonalet. Manglande føring blei verifisert.
• Det er ikkje skriftleg rutine eller fast praksis for føring av kardex i heimetenestene.
• Rapportering baserer seg i all hovudsak på muntleg melding.
• Det blei opplyst i intervju at dei tilsette i heimesjukepleien er oppmoda om å lese vedtak om tildeling av tenester for å kjenne til kva pasientar/brukarar skal få hjelp med.
• Permen "Vedtak om heimesjukepleie" inneheld ikkje vedtak for alle pasientar, og vedtaka er for generelle til at dei kan brukast som grunnlag for behandling og pleie.

Kommentar: Praksis som blir følgd inneber betydeleg risiko for svikt i samband med manglande overføring av viktig informasjon til kardex og til pleiepersonell. Vedrørande "legevisittboka" heiter det i rundskriv frå Helsedirektoratet, IK - 1/91 mellom anna: "Blant annet på grunn av personregisterlovens regler, vil en sykepleier ikke selv ha anledning til å oppbevare notatene slik at de utgjør et register/arkiv med personidentifiserbare opplysninger. Nedtegnelser som ikke makuleres må oppbevares i pasientjournalen." Jf Personregisterlova § 6.

I rundskrivet heiter det vidare: "...det er viktig at journalen gir best mulig inntrykk av den totale behandling og pleie av pasienten. Alle observasjoner og tiltak foretatt av sykepleier som kan være av betydning for et slikt helhetsinntrykk skal nedtegnes. Det vil være behandlende leges oppgave å vurdere hvilke opplysninger som er av en slik art at de skal oppbevares i pasientjournalen." (Vår understreking.)

Følgjande observasjonar ligg til grunn for avviket:

• Det går fram av dokumentasjon tilsendt før tilsynet og det blei opplyst i intervju at inntaksteamet fattar vedtak om plass i sjukeheim eller avslag på slik søknad og at områdeleiar fattar vedtak om tildeling av heimesjukepleie.
• Ved verifikasjon av delegasjonsreglement går det fram at mynde til å fatte vedtak ikkje er delegert vidare frå rådmannen til høvesvis inntaksteamet og områdeleiar. Kommunen la ikkje fram anna dokumentasjon på slik delegasjon.
• Sakshandsamingstida kan variere frå 1 veke til fleire månader.
• Ved verifikasjon gjekk det fram at avslag ikkje alltid var grunngitt fagleg. I nokre tilfelle blir søkjar godkjent for inntak til sjukeheimen, men blir sett på venteliste på grunn av mangel på plass i institusjonen. Søkjar blir ikkje informert om at dette i realiteten er eit avslag og får heller ikkje informasjon om ventetid. Ventetida kan vere over eit år.
• Ein som til dømes har søkt om og får avslag på søknad om plass i institusjon, kan i staden få tildelt heimesjukepleie utan å ha søkt om dette.

Følgjande observasjonar ligg til grunn for avviket:

• I intervju blei det opplyst at ansvar og oppgåver for framdrift og gjennomføring ikkje er delegerte frå rådmannen.
• Kommunen har ikkje utarbeidd plan for arbeidet med å etablere internkontrollsystem for helsetenestene. Nokre av dei tilsette har likevel tatt ansvar utan at dette har resultert i planar på verksemdnivå. Eit initiativ frå Øygarden sjukeheim i 1999 for å følgje opp kravet i kvalitetsforskrifta om system av skriftlege prosedyrar, er ikkje vidareført. Då tilsynet blei gjennomført var to prosedyrar under arbeid i heimetenesta.
• Korkje kvalitetsforskrifta eller dei prosjekta for kvalitetsarbeid som er i gang er kjent for alle tilsette i pleie- og omsorgstenesta.
• Både i heimetenestene og ved Øygarden sjukeheim er det få skriftlege prosedyrar. System av skriftlege prosedyrar, jf kvalitetsforskrifta, er ikkje etablert.
• Ein perm på vaktrommet på sjukeheimen inneheld nokre helsefaglege prosedyrar. Desse er ikkje daterte eller signerte, og er heller ikkje kjende for alle tilsette.

Følgjande observasjonar ligg til grunn for merknaden:
Ingen av dei tilsette ved Øygarden sjukeheim eller i heimetenestene har stillingsbeskriving/stillingsinstruks. Fleire av dei tilsette ønskjer dette. Ønskjet er rapportert og kjent for leiarane. Fleire av dei tilsette har også meir ansvar enn dei har tid og kompetanse til å ivareta, jf avvik 2.

• Styrings- og informasjonshjulet for helse- og sosialtenesta i kommunane. Samanlikningstal for kommunane 1999, kommune 1259 Øygarden.
• Angåande personalmangel ved Øygarden sjukeheim. Brev av 21.10.99 frå tilsynslege Ingrid Rebnord til Pleie- og omsorgssjef.
• Tilhøva ved Øygarden sjukeheim. Brev av 10.11.99 frå rådmann Ingolf Solsvik til Fylkeslegen i Hordaland.

Dokumentasjon frå Øygarden kommune i ekspedisjon av 17. desember 1999

• Pleie- og omsorgsplan for Øygarden kommune
• Øygarden kommune, pleie- og omsorgsetaten, årsmelding 1998 for planområde 3B pleie og omsorg
• Organisasjonskart for pleie- og omsorgsetaten, udatert
• Instruks for leiarar av pleie- og omsorgstenesta i Øygarden kommune, gjeld frå 1. janauar 1994
• Utlysing av stilling for pleie- og omsorgssjef
• Metodebok, 2 - prosedyre for behandling av søknad om korttidsopphald ved sjukeheimen, udatert, ikkje godkjent
• Metodebok, 3 - prosedyre for behandling av søknad om avlastningsopphald ved sjukeheimen, udatert, ikkje godkjent
• 4 - Prosedyre for behandling av søknad om fast plassved sjukeheimen, udatert, ikkje godkjent
• Metodebok, prosedyre for behandling av søknad om heimesjukepleie av 10.12.99, ikkje godkjent
• Øygarden kommune, utskrift av møtebok saknr. FPO, arkiv 330 "Evt. melding til søkjar vedlagt "Erklæring om klage"
• Øygarden kommunen, heimetenesta, standardbrev "Melding om vedtak – innvilga søknad om heimesjukepleie
• Øygarden kommunen, heimetenesta, standardbrev "Melding om vedtak – tilbod om heimesjukepleie- endring"
• Øygarden kommunen, heimetenesta, standardbrev "Melding om vedtak – avslag på søknad om heimesjukepleie
• Øygarden kommunen, heimetenesta, "Retningsliner for legemiddelhandtering i heimetenesta i Øygarden kommune", 09.12.99, ny gjennomgang 01.06.2000, ikkje godkjende
• Øygarden kommune, heimetenesta, "Delegert løyve for hjelpepleiar/omsorgsarbeidarar tilsett i heimetenesta i Øygarden kommune til å ta del i legemiddelhandteringa"
• Øygarden kommune, heimetenesta, "Delegert løyve for hjelpepleiar som skal gje behovs medisin som på førehand er ordinert av lege"
• Øygarden kommune, heimetenesta, "Delegert løyve for hjelpepleiar som skal gje insuling til pasientar i heimetenesta i Øygarden"
• Øygarden kommune, heimetenesta, "Avtale om legemiddelhandtering mellom brukar av heimesjukepleien og heimesjukepleien i Øygarden"
• Øygarden kommune, heimetenesta, "Samtykke til lagring av medikamenter utanfor heimen mellom brukar av heimesjukepleien og heimesjukepleien i Øygarden"
• Kvittering for istandgjering av legemidler i vekedosett
• Evt. medikamenter gitt
• Metodebok, Prosedyrar for legemiddelhandtering ved Øygarden sjukeheim, godkjent av tilsynslege 30.03.98
• Delegert løyve for hjelpepleiar tilsett ved Øygarden sjukeheim til å ta del i legemiddelhandtering
• Prosedyrar for eingongsordinasjon ved Øygarden sjukeheim
• Kvitteringsskjema for istandgjering av vekedosettar
• Liste, legemiddel til injeksjon eller infusjon
• Legemiddelhandtering, registering av avvik , rettleiing i samband med registrering av avvik
• Delegert løyve for hjelpepleiar som skal gi insulin til pasientar ved Øygarden sjukeheim
• Øygarden kommune, heimetenesta, "Prosjektarbeid – dokumentasjon
• Øygarden kommune, pleie- og omsorgsetaten, opplæringsplan for perioden 1997 – 2001
• Kvalitetssikringsprosedyrar, tema, tiltak, ansvar.
• Stillingar ved Øygarden sjukeheim, av 21.10.99.
• Oversikt over tilsette i heimetenesta, av 10.12.99

Til stades frå Fylkeslegen:
Anne Grete Robøle, rådgjevar, revisjonsleiar
Elisabeth Moen, fylkessjukepleiar
Agnes Maria Stafsnes, ass. fylkeslege, sekretær
Børt-Eivind Lid, førstekonsulent