Vår ref: 01/990

INNHALD

Innhald i rapporten

• Saksbehandling ved tildeling av og avslag på søknad om plass i sjukeheim
• Medisinsk utgreiing av eldre ved mistanke om mental svikt
• Medbestemming og individuell tilrettelegging av pleie- og omsorgstenester til alders- demente pasientar for å førebyggje bruk av tvang
• Dekking av grunnleggjande behov
• Avviksbehandling

Hovudkonklusjon

Fylkeslegen har sett at fast tilsett helsepersonell ved sjukeheimen strekkjer seg langt for å dekkje pasientane sine behov, men at arbeidsoppgåvene er omfattande og mange tilsette er slitne.

Det har vore overbelegg ved sjukeheimen i fleire år. Fleire av pasientane har omfattande behov for behandling, pleie og tilsyn. Ved sjukeheimen er det mangel på kvalifisert personell og omfattande bruk av ufaglærte vikarar. Ein slik situasjon krev at kommunen har eit styringssystem (internkontrollsystem) som både kan fange opp og førebyggje svikt i tenestene.

Tilsynet har avdekt vesentlege manglar ved internkontrollsystemet. Dei grunnleggjande behova til pasientane blir ikkje alltid ivaretekne. Pasientar på avdeling for aldersdemens blir låst inne utan tilsyn og manglar tilbod i høve til sine særlege behov. Samtykkereglane i Lov om pasientrettigheter er ikkje kjende og samtykkekompetanse blir ikkje vurdert. Rutinar for avviksbehandling og system av skriftlege prosedyrar som skal søkje å sikre at pasientane sine grunnleggjande behov blir dekte, ligg ikkje føre.

Pasientjournalar manglar relevante og naudsynte opplysningar, mellom anna er ikkje grunnlaget for diagnosen aldersdemens alltid dokumentert. Utgreiing av pasientar med mistanke om mental svikt blir hovudsakleg utført i spesialisthelsetenesta.

Vedtak om avslag på tildeling av helsehjelp er ikkje alltid grunngitt.

Ved tilsynet blei det påpeikt seks avvik. Fylkeslegen gav to merknader.

Avvika er:

Avvik 1 Det går ikkje fram av vedtak om avslag på søknad om plass i sjukeheim kva faktiske forhold som ligg til grunn for avgjerda.

Avvik frå:Forvaltningslova § 25 jfr. kommunehelsetenestelova § 2-1, 4. ledd

Avvik 2 Pasientane sine grunnleggjande behov blir ikkje alltid ivaretekne.

Avvik frå: Kommunehelsetenestelova § 1-3a, § 6-3 og § 2-1 jfr. kvalitetsforskrifta § 3

Avvik 3 Pasientar på avdeling A (demensavdeling) blir låst inne utan at det er personale til stades, og tilbodet i avdelinga er ikkje tilrettelagt i høve til dei særskilde behova som pasientane har.

Avvik frå: Kommunehelsetenestelova § 1-3a og § 6-3, 3. ledd, jfr. tilsynslova § 3

Avvik 4 Pasientjournalane inneheld ikkje alltid relevante og naudsynte opplysningar om pasientane og helsehjelpa som er gitt. "Legevisittbok" inneheld personidentifiserbare opplysningar om ulike pasientar.

Avvik frå:Helsepersonellova §§ 39 og 40 jfr. pasientjournalforskrifta

Avvik 5 Vurdering av samtykkekompetanse hos pasientar ved sjukeheimen blir ikkje utført.

Avvik frå: Pasientrettslova kapittel 3 og 4

Avvik 6 Internkontrollsystem for helsetenestene manglar viktige element. System av skriftlege prosedyrar som skal søkje å sikre at pasientane sine grunnleggjande behov blir dekte, ligg ikkje føre.

Avvik frå: Tilsynslova § 3 og kvalitetsforskrifta § 3

Merknadene er:

Merknad 1: Tid avsett til tilsynslege ved sjukeheimen er knapp og arbeidsforholda er lite tilrettelagde

Merknad 2: Rutinar for tverrfagleg samarbeid og samarbeid med pårørande ved utgreiing av pasientar ved mistanke om mental svikt er mangelfulle

Dato: 22. februar 2002

1. Innleiing

Rapporten er utarbeidd etter tilsyn ved Velferdssenteret (sjukeheimen) i Radøy kommune, 24. januar 2002.

Formålet med tilsynet er å få stadfest at verksemda oppfyller krav som følgjer av lover og forskrifter for helsetenestene.

Tilsynet omfatta mellom anna:

• om styringssystemet i verksemda er formålstenleg og dekkjande.
• om aktivitetar blir utførte slik dei er framstilte skriftleg og muntleg.
• om verksemda når måla sine og om verksemda blir driven innanfor rammene som styresmaktene har sett.

Tilsynet blei gjennomført som systemrevisjon, ved gransking av dokument, intervju og verifikasjonar. Verifikasjonar inneber mellom anna å undersøke om rutinar, prosedyrar og instruksar blir følgde i praksis. Rapporten omhandlar avvik og merknader som er avdekte ved tilsynet.

• Avvik er definert som mangel på oppfylling av krav som styresmaktene stiller.
• Merknad er tilhøve som ikkje blir omfatta av definisjonen for avvik, men der tilsynet med utgangspunkt i krav som styresmaktene har sett, avdekkjer potensial for betring.

2. Spesielle forhold

Sjukeheimen ved Velferdssenteret har 25 enkeltrom. Det har i fleire år har vore innlagt fleire pasientar, inntil 32. Då tilsynet ble gjennomført var det 26 pasientar, sju på avdeling A (demensavdeling ), ti på avdeling B (tung pleie) og ni på avdeling C (korttid, avlasting og rehabilitering).

Det er to leiarnivå i kommunen. Avdelingssjukepleiar er administrativ og fagleg leiar ved Velferdssenteret og rapporterer til rådmannen.

Ved sjukeheimen er det utanom avdelingssjukepleiar, to sjukepleiarar som går turnus på dag- og kveldsvakt. Den eine har full stilling, den andre har 60 % stilling. Det er to sjukepleiarar på natt, kvar i 50% stilling. Det er ikkje sjukepleiar på alle kveldsvakter, helge- og nattevakter. Det er inngått avtale mellom kommunen og Norsk sjukepleiarforbund om at sjukepleiarar ved sjukeheimen og i heimetenestene har bakvakt med ansvar for heimetenestene og sjukeheimen når det ikkje er sjukepleiar på vakt.

3. Dokumentunderlag

Dokumentunderlaget for tilsynet var:

• Aktuelle lover og forskrifter:
  Lov av 30. mars 1984 nr. 15 om statlig tilsyn med helsetjenesten (tilsynslova).
  Lov av 19. november 1984 nr. 66 om helsetjenesten i kommunene (kommunehelsetenestelova).
  Lov av 10. februar 1967 om behandlingsmåten i forvaltningssaker (forvaltningslova).
  Lov av 2. juli 1999 nr. 63 om pasientrettigheter (pasienrettslova).
  Lov av 2. juli 1999 nr. 64 om helsepersonell (helsepersonellova).
  Forskrift av 21. desember 2000 om pasientjournal (pasientjournalforskrifta).
  Forskrift av 27. februar 1997 om kvalitet i pleie- og omsorgstjenestene (kvalitetsforskrifta).
  Forskrift av 14. november 1988 nr. 932 for sykehjem og boform for heldøgns omsorg og pleie (sjukeheimsforskrifta).
• Korrespondanse mellom Radøy kommune og fylkeslegen jfr. kapittel 5.
• Dokumentasjon frå Radøy kommune jfr. vedlegg 1.
• Verifikasjonar jfr. kapittel 6.

4. Omfang

Tilsynet var avgrensa til følgjande tema:

• Saksbehandling ved tildeling av og avslag på søknad om plass i sjukeheim
• Medisinsk utgreiing av eldre ved mistanke om mental svikt
• Medbestemming og individuell tilrettelegging av pleie- og omsorgstenester til aldersdemente pasientar for å førebyggje bruk av tvang
• Dekking av grunnleggjande behov
• Avviksbehandling

5. Gjennomføring

Tilsynet blei gjennomført som systemrevisjon og omfatta følgjande aktivitetar:

Melding om tilsynet blei sendt 9. mai 2001 og var planlagt gjennomført 29. eventuelt 30. juni 2001. Dokumentasjon frå Radøy kommune blei motteken i ekspedisjon av 28. mai 2001. På grunn av ferieavvikling i kommunen blei det avtalt å utsetje tilsynet til september 2001. Dette let seg ikkje gjennomføre på grunn av ferie. Etter avtale med kommunen 6. desember 2001 blei ny dato for tilsynet sett til 24. januar 2002. Melding om ny dato og framlegg til program blei sendt 6. desember 2001.

Kommunen svara i telefonsamtale 4. januar 2002 at tilsynet kunne gjennomførast som planlagt 24. januar 2002. Program for tilsynet blei sendt 10. januar 2002.

Utfyllande dokumentasjon frå kommunen blei motteken i ekspedisjon av 10. januar 2002.

I opningsmøtet 24. januar blei det gitt informasjon frå fylkeslegen om formålet med og gjennomføringa av tilsynet. Det blei gjennomført åtte intervju. I sluttmøtet ga fylkeslegen ei oppsummering og presentasjon av resultat. I vedlegg 2 er det gitt eit oversyn over deltakarane ved tilsynet. Verifikasjonar som blei utførte går fram av kapittel 6.

6. Resultat av verifikasjon

6.1 Søknader om plass i sjukeheim og vedtak

Tre søknader og vedtak om tildeling av sjukeheimsplass og seks søknader og vedtak om avslag på sjukeheimsplass (med saksmapper) blei verifiserte. Det blei sett etter om:

• vedtaka var grunngitt
• om det gjekk fram av vedtaka kva tenester som blei tildelte, eventuelt om det blei gitt avslag.

Resultat av verifikasjonar:

• Det går klart fram av vedtaka om søknaden er innvilga eller om det er gitt avslag.
• To av seks avslag var grunngitt med at søkjar ikkje hadde medisinsk grunnlag for å få tildelt plass i sjukeheimen.
• I fire avslag var grunngjevinga at pasienten kunne få dekt sitt behov for naudsynt helsehjelp frå den heimebaserte omsorga i kommunen.
• Kva faktiske forhold som ligg til grunn for avslaget gjekk ikkje fram av vedtaket. Med unntak av funksjonsjournal frå heimesjukepleien (i tre av seks saksmapper) inneheldt saksmappene ikkje opplysningar om søkjar sin helsetilstand.
• Ingen av dei verifiserte saksmappene på dei søkjarane som hadde fått avslag på søknad om plass i sjukeheim inneheldt vedtak om tildeling av heimesjukepleie for tida etter at søkjar fekk avslag.

Møtebok med referat frå møte i inntaksnemnda for Velferdssenteret blei verifisert.

Fire pasientjournalar ("legejournal" og kardex) frå avdeling A (demensavdeling) blei verifiserte. Det blei sett etter:

• kva undersøkingar og vurderingar som låg til grunn for diagnosen aldersdemens.
• om det var treft avgjerd om manglande samtykkekompetanse i høve til helsehjelp og om det i slike høve var innhenta samtykke frå pårørande.
• om namn på næraste pårørande gjekk fram av pasientjournalen.

Utskrift av legejournal pr. 21 januar 2002 frå eit legekontor i kommunen var lagt inn i alle journalmappene, også dei som ikkje blei nærare verifiserte. Utan desse utskriftene var det svært få relevante og oppdaterte opplysningar om helsetilstand og diagnose i mappene. Ved å lese gjennom utskriftene let det seg gjere å finne opplysningar om diagnosar. I to av mappene var det nokre korte notat, men det nyaste notatet var nær to år gammalt. Tidspunkt for innlegging i sjukeheimen kunne ikkje verifiserast i "legejournalane", men i tre av fire kardexar.

Opplysningar om status ved innlegging i sjukeheimen kunne ikkje verifiserast. Det låg utfylt sjekkliste for årsundersøking av nyare dato i to av mappene, men ingen notat med vurdering av mental og somatisk status. Det kunne ikkje lesast ut av desse sjekklistene kva som faktisk var gjort og vurdert og kva som var konklusjonen.

Grunnlag for diagnosen aldersdemens:

Grunnlag for diagnosen aldersdemens gjekk fram i to av dei fire journalutskriftene som blei verifiserte. Diagnosen var fastsett etter utgreiing i spesialisthelsetenesta, etter henvisning frå primærlege. Det gjekk fram av journalutskrifta at også dei to andre pasientane var utgreidde i spesialisthelsetenesta med spørsmål om aldersdemens, men diagnosen som sto i kardex var ikkje i samsvar med resultatet av denne utgreiinga. Det var ingen andre opplysningar om kva undersøkingar og vurderingar som låg til grunn for diagnosen i kardex hos desse to pasientane.

Opplysningar om medisinsk oppfølging av demenssjukdommen etter at diagnosen var stilt, kunne ikkje verifiserast.

Opplysningar om innhenta komparentopplysningar, eventuell avgjerd om manglande samtykkekompetanse, namn på næraste pårørande og eventuelt dokumentasjon av innhenta samtykke kunne ikkje verifiserast i "legejournalar". Namn på pårørande sto i kardex. Dokumentasjon av eventuell informasjon til pårørande om helsetilstand eller helsehjelp kunne ikkje verifiserast.

"Legevisittboka" er ei notatbok for meldingar mellom pleiepersonalet og tilsynslegen. Boka inneheld personidentifiserbare opplysningar om mange pasientar for perioden 21.11.00 til og med 24.01.02.

System av skriftlege prosedyrar, jfr. kvalitetsforskrifta § 3, kunne ikkje verifiserast.

7. Avvik

Avvik 1: Det går ikkje fram av vedtak om avslag på søknad om plass i sjukeheim kva faktiske forhold som ligg til grunn for avgjerda.

Avvik frå:

• Forvaltningslova § 25 jfr. kommunehelsetenestelova § 2-1, 4. ledd

Følgjande observasjonar ligg til grunn for avviket:

• Fire av seks avslag var grunngitt med at pasienten kunne få dekt sitt behov for naudsynt helsehjelp frå den heimebaserte omsorga i kommunen.
• To av seks avslag var grunngitt med at det ikkje var medisinsk grunnlag for å tildele plass i sjukeheim
• Med unntak av funksjonsjournal frå heimesjukepleien inneheldt ikkje saksmappene opplysningar om søkjar sin helsetilstand, jfr. verifikasjon pkt. 6.1
• Ingen av dei verifiserte saksmappene til dei pasientane som hadde fått avslag på søknad om plass i sjukeheim inneheldt vedtak om tildeling av heimesjukepleie for tida etter at søkjar hadde fått avslag.

Kommentar:
Kva krav som kan stillast til grunngjevinga for eit enkeltvedtak går fram av forvaltningslova § 25. Det følgjer av § 25, 2. ledd at vedtaket skal nemne "de faktiske forhold som vedtaket bygger på". Kva som ligg i dette seier Arvid Frihagen noko om i boka Forvaltningsrett – Bind II: Saksbehandling;

Avvik frå:

• Kommunehelsetenestelova § 1-3a, § 6-3 og § 2-1 jfr. kvalitetsforskrifta § 3

Følgjande observasjonar ligg til grunn for avviket:

• I intervju blei det opplyst at ein eller fleire av pasientane med størst hjelpebehov må liggje til sengs heile dagen fordi det ikkje er nok personale til å hjelpe alle opp. Det blei opplyst at dette skjer kvar veke.
• Pasientane på avdeling B og C ikkje får dusje/bade oftare enn ein gong annankvar veke og personale kan ofte ikkje hjelpe pasientane på toalettet når dei ber om det.
• Personalet som ikkje har vore på vakt slik at dei muntleg har fått rapport etter legevisitt (d.v.s. ettermiddagsvakt same dag eller tidlegvakt dag etter legevisitt), er ikkje alltid kjent med om det er gjort endringar i den medisinske behandlinga av pasientane.
• Det er regelmessig hjelpepleiarar som går ansvarsvakter. Hjelpepleiarane har stort ansvar, både i stell og observasjon av pasientane.
• Det er omfattande bruk av ufaglærte vikarar på sjukeheimen. Vikarane går tre vakter "på topp" ( to dagvakter og ei kveldsvakt) for å sjå korleis oppgåver blir utførte. Det er ikkje organisert opplæring eller oppfølging av vikarane ut over dette.
• Det er ikkje alltid tilstrekkeleg personale på vakt, og på vakter med mange ufaglærte har det hendt at pasientar og oppgåver er "gløymde".
• Pasientane blir lite aktiviserte og det er lita tid til samver med pasientane ut over det som er i samband med stell.
• Alle pasientane skal ha pleieplanar, men desse blir ikkje oppdaterte eller brukte.

Avvik frå:

• Kommunehelsetenestelova § 1-3a og § 6-3, 3. ledd, jfr. tilsynslova § 3

Følgjande observasjonar ligg til grunn for avviket:

• I intervju blei det opplyst at døra inn til demensavdelinga berre unntaksvis er ulåst og at det ikkje alltid er tid og personale til å følgje pasientane ut av avdelinga når dei ønskjer det. Ved daglege rapportar i samband med vaktskifte blir pasientane i demensavdelinga låst inne utan tilsyn.
• Det er knapt med personale til dagleg stell og pleie av pasientane. Det er ofte ufaglærte på vakt i avdelinga. Manglande stabilitet i personalet påverkar pasientane og fører tidvis til meir uro.
• Det følgjer av vedlegg 3 at det skal vere to personar på dagvakt i avdelinga. I intervju kom det fram at ein tilsett på vakt i frå demensavdelinga ofte blir til flytt frå denne og til ei av dei andre avdelingane til dømes når det er vakante vakter der. (Sjukdom og/eller mangel på folk til å dekkje vakta). Det er såleis ikkje uvanleg at ein tilsett er åleine med åtte til 10 pasientar på denne avdelinga.
• Bortsett frå skjerming frå dei andre pasientane ved sjukeheimen har ikkje demensavdelinga eit særskilt tilrettelagt tilbod for aktivisering og stimulering av pasientane. Det blei gitt uttrykk for at det er behov for dette.

Kommentar:
Avdelinga er ikkje definert som skjerma eining etter sjukeheimsforskrifta § 4-7, men den fungerer i praksis slik ut frå at pasientane som får plass skal vere utgreidde og ha fått diagnosen aldersdemens. Det blei opplyst i intervju at pasientane som blir tekne inn i avdelinga har utagerande og/eller vandrande åtferd, jfr motteke framlegg til retningsliner for inntak og utskriving frå kommunale institusjonar/omsorgsbustader.

Avvik frå:

• Helsepersonellova §§ 39 og 40 jfr. pasientjournalforskrifta

Følgjande observasjonar ligg til grunn for avviket:

• Utskrift av legejournal pr. 21 januar 2002 frå eit legekontor i kommunen var lagt inn i alle journalmappene på Velferdssenteret. Utan desse utskriftene var det svært få relevante og oppdaterte opplysningar om helsetilstand og diagnose i journalmappene, jfr. verifikasjon punkt 6.3.
• Grunnlaget for diagnosen aldersdemens kunne ikkje alltid verifiserast.
• Det gjekk ikkje fram av dei verifiserte pasientjournalane at komparentopplysningar var innhenta.
• Det var ikkje opplysningar om vurdering og eventuell avgjerd om manglande samtykkekompetanse, dokumentasjon av innhenta samtykke til helsehjelp eller om informasjon til pårørande om helsetilstand eller helsehjelp.
• Opplysningar om status ved innlegging i sjukeheimen kunne ikkje verifiserast i pasientjournalane.
• Det blei opplyst i intervju at alle pasientane blei undersøkt av legen kvart år (årsundersøking). I dei pasientjournalane det var sjekkliste for gjennomført undersøking kunne det ikkje verifiserast kva som faktisk var gjort og vurdert, og kva som var konklusjonen.
• Det var ikkje alltid samsvar mellom diagnosar i "legejournal" og kardex.
• "Legevisittbok" for peridoden 21. november 2000 til og med 24. januar 2001 inneheldt personidentifiserbare opplysningar om ulike pasientar, jfr. verifikasjon punkt 6.4

Avvik frå:

• Pasientrettslova kapittel 3 og 4

Følgjande observasjonar ligg til grunn for avviket:

• Reglane om pasientane sin rett til medverknad, informasjon og samtykke i samband med helsehjelp var ikkje kjende.
• Det var ingen rutinar for vurdering av om pasientane har samtykkekompetanse, for dokumentasjon av avgjerd om manglande samtykkekompetanse eller for dokumentasjon av at samtykke var innhenta frå pårørande.
• I intervju blei det gitt opplysningar om helsetilstanden til enkelte pasientar som tyder på at dei ikkje er samtykkekompetente. Det kunne ikkje verifiserast at samtykkekompetanse var vurdert og at det var fatta avgjerd om manglande samtykkekompetanse. Dokumentasjon på informasjon til og/ eller innhenta samtykke frå pårørande kunne ikkje verifiserast, jfr. verifikasjon punkt 6.3.

Avvik frå:

• Tilsynslova § 3 og kvalitetsforskrifta § 3

Følgjande observasjonar ligg til grunn for avviket:

• Rutinar for avviksbehandling er ikkje utarbeidde.
• System av skriftlege prosedyrar som skal søkje å sikre at pasientane sine grunnleggjande behov blir dekte, er ikkje utarbeidde.
• Det er ikkje gitt opplæring om krav i "nye" helselover, jfr. avvik 5.
• Det blei opplyst i intervju at personalet ikkje alltid har naudsynt fagleg kompetanse til å ivareta oppgåvene dei blir sette til å utføre.

8. Merknader

Merknad 1: Tid avsett til tilsynslege ved sjukeheimen er knapp og arbeidsforholda er lite tilrettelagde

Følgjande observasjonar ligg til grunn for merknaden:

• Det er opplyst i intervju at det er avsett knapt med tid i høve til oppgåvene ved sjukeheimen og at tilsynslege ikkje er til stades kvar veke. Dette blir noko kompensert ved telefonkontakt.
• På sjukeheimen er det ikkje kontor for lege. Journal/notat som blir skrivne, blir skrivne for hand eller på legekontoret der tilsynslegen har praksis, jfr. verifiasjon punkt 6.3.

Følgjande observasjonar ligg til grunn for merknaden:

• I intervju blei det opplyst at pasientar med mental svikt skal undersøkast og diagnostiserast i spesialisthelsetenesta, fortrinnsvis før innlegging i sjukeheimen. Det blei opplyst at enkle undersøkingar av og til blir utførte på sjukeheimen. Det kunne ikkje verifiserast i pasientjournalar at komparentopplysningar var innhenta. MMS og MADRS er tenkt tekne i bruk. Det er ikkje etablert praksis eller skriftlege rutinar for utgreiing og tverrfagleg samarbeid ved mistanke om mental svikt hos pasientane på sjukeheimen.

Vedlegg 1

DOKUMENTASJON MOTTEKEN FRÅ RADØY KOMMUNE I SAMBAND MED TILSYN 24. JANUAR 2002

Dokumentasjon motteken i ekspedisjon av 28. mai 2001:

• HMT, pleie og omsorg Radøy kommune: Kapittel 2.1.1 Mål for pleie og omsorg, datert 28. mai 2001
• HMT, pleie og omsorg Radøy kommune: Kapittel 2.1.1 Mål i høve til HMT,datert 28. mai 2001
• HMT, pleie og omsorg Radøy kommune: Kapittel 1.0 Pleie og omsorg, innleiing, datert 28. mai 2001
• HMT, pleie og omsorg Radøy kommune: Kapittel 1.1 Pleie og omsorg, organisasjonskart, datert 28. mai 2001
• HMT, pleie og omsorg Radøy kommune: Kapittel 2.4.1 Sjukeheim, Velferdsenteret, omtale og målsetjing, datert 28. mai 2001
• Turnusplan Velferdssenteret
• Årsmelding Radøy kommune 2000
• Stillingsomtale for spesialkonsulent pleie og omsorg i rådmannens stab, datert 13. mars 2001
• HMT, pleie og omsorg Radøy kommune: Kapittel 1.2 Stillingsbeskriving avdelingssjukepleiar på institusjon
• Internkontrollsystem, Radøy kommune, helseavdeling: Stillingsbeskriving for tilsynslege ved Velferdsenteret og Hordabøheimen, datert 23. mai 2001
• Retningsliner for handtering av legemiddel m.v. ved velferdssenteret, ikkje daterte
• Innhaldsliste internkontrollsystem for helsetenestene

• HMT, pleie og omsorg Radøy kommune: Kapittel 2.5.10 Inntaksreglement for institusjonar, datert 4. mars 1997
• IKS pleie og omsorg, Radøy kommune, FRAMLEGG til reglement for inntaksnemnda i Radøy kommune, datert 8. januar 2002
• IKS pleie og omsorg, Radøy kommune, FRAMLEGG til retningsliner for inntak og utskriving frå kommunale institusjonar/omsorgsbustader, datert 8. januar 2002
• Søknad A om langtidsopphald i sjukeheim og korttidsopphald i institusjon og vedtak av 11. desember 2001 om tildeling av langtidsopphald ved Velferdssenteret – Manger
• Søknad B om korttidsplass i instiusjon og vedtak av 2. november 2001 om tildeling av langtidsopphald på Velferdssenteret – Manger
• Søknad C om langtidsopphald i sjukeheim og vedtak av 23. oktober 2001 om tildeling av langtidsopphald på Velferdssenteret – Manger
• Søknad D om langtidsopphald i sjukeheim og vedtak av 3. oktober 2001 om avslag på søknad om langtidsopphald i sjukeheim. Klage på avslag av 10. oktober 2001 og saksopplysningar frå lege, udatert
• Søknad E om langtidsopphald i sjukeheim og vedtak av 2. november 2001 om avslag på søknaden
• Søknad F om langtidsopphald i sjukeheim og vedtak av 1. november 2001 om avslag på søknaden
• Sjekkliste for dobbeltkontroll av medisin i dosettar
• Skjema 8B for retting av avvik
• Skjema 8A for avviksrapportering, skjema i HMT – arbeidet i Radøy kommune

• Status iverksetjing av internkontrollsystem for helsetenestene jfr. Lov om statleg tilsyn med helsetenestene § 3, kartlegging september 2001
• Plan for pleie- og omsorgstenestene i Radøy kommune 1998-2001, vedteken 25. mai 1998

Vedlegg 2

DELTAKARAR VED TILSYN I RADØY KOMMUNE, VELFERDSENTERET 24. JANUAR 2002

Frå Fylkeslegen i Hordaland:
Ass. fylkeslege Agnes Maria Stafsnes
Førstekonsulent Anne Kristine Breivik
Rådgjevar Anne Grete Robøle, revisjonsleiar

Vedlegg 3

TILSYN VED VELFERDSSENTERET, RADØY KOMMUNE 24. JANUAR 2002

(fylt ut av avdelingssjukepleiar og ass. avdelingssjukepleiar)