INNHALD

Samandrag
1 Innleiing
2 Om verksemda - særlege tilhøve
3 Dokumentunderlag
4 Gjennomføring
5 Reviderte område og funn
6 Deltakarar ved tilsynet

Vedlegg 1 – Dokumentasjon

Frå 1. september 2003 er all verksemd i Helse Fonna HF organiserte i klinikkar og Valen sjukehus inngår i Psykiatrisk klinikk. Alle som deltok ved tilsynet uttrykte uro over ikkje å kjenne til framtidig organisering og oppgåver. Sjukehuset har siste året også vore gjennom ein intern omorganiseringsprosess med team knytt til dei einskilde postane. Det har samstundes vore liten kontinuitet i leiarfunksjonen ved sjukehuset. Teamorganiseringa har ikkje funne den endelege forma. Omorganiseringa har påverka oppfølging av andre oppgåver. På akuttpostane har det mellom anna vore mindre høve til internundervisning og gjennomgang av rutinar.

Tilsynet har vist at styringssystemet er mangelfullt i høve til å sikre at pasientane sin rett til informasjon og medverknad blir tilfredsstillande ivareteken. Lengre tids kjennskap til uheldige forhold på akuttpostane synest hittil ikkje å vere følgd opp i tilstrekkeleg grad. Det omfattar forhold som også blei påpeikte ved det tilsynet Fylkeslegen i Hordaland gjennomførte i 2001. Ved sjukehuset er det i liten grad praksis for å trekkje alle tilsette med i evaluering av tenestetilbod og drøfting av ulike faglege synspunkt.

Tilsynet etterlet tvil om friviljug opphald blir prøvd i tilstrekkeleg grad. Dette er blant dei forholda som også blei påpeika ved tilsyn frå Fylkeslegen i Hordaland i 2001. Ved sjukehuset er det tradisjon for å leggje til rette og ha stor omsorg for pasientane. Fleire tilsette er merksame på dei uheldige sidene ved å ”vite for godt kva som er best” for pasientane og dei uheldige sidene ved i for stor grad å ta ifrå pasientane tillit til sjølve å kunne meistre.

Pasientar som sjølve oppsøkjer sjukehuset eller som blir tilviste som øyeblikkeleg hjelp, blir tekne imot og vurderte. Akuttpostane har rutinar for å følgja opp pasientar som blir innlagt etter sjølvmordsforsøk. Arbeid med å definere retningsliner for å sikre vurdering av sjølvmordsfare, blei påbegynt same dag som tilsynet byrja. Ved etablering av tvunge psykisk helsevern får pasientane munnleg informasjon om dette og om retten til å klage på vedtaket. Ved vedtak om tvangsmedisinering blir det gitt munnleg og skriftleg informasjon. Det ligg ikkje føre individuelle planar for alle pasientar som er tvangsinnlagde på akutt/mottakspostane og det kan gå lang tid innan det blir sett mål for behandlinga. Når det blir gitt avslag på søknad om innlegging i sjukehuset, er svaret til tilvisande instans mangelfullt, og pasienten blir ikkje informert. Ved planlagde innleggingar blir det gjort avtale om innleggingstidspunkt med tilvisande instans. Det ligg ikkje føre retningsliner eller avtaler om overføring av pasientar mellom verksemder i helseføretaket.

Bemannings- og bygningsmessige tilhøve er ikkje optimale i høve til individuell tilrettelegging av tilbod. Sjukehuset har til ei kvar tid pasientar som kunne vore skrivne ut til kommunane. På grunn av pasientane sine til dels omfattande behov for tenester, vegrar einskilde kommunane seg for å ta imot dei. Dette påverkar plassforhold og pasientflyt i sjukehuset slik at pasientar til tider blir liggjande lenge i akutt/mottakspost.

Sjukehuset har hittil lagt til rette for internundervisning, etter- og vidareutdanning. Rutinar for avviksbehandling er sette i verk og kjende.

Sjukehuset har regelmessige møte med kommunane og gir rettleiing om einskildpasientar. Samarbeid med kommunar og distriktspsykiatriske senter om einskildpasientar fungerer godt, men det er ikkje oppretta faste samarbeidsfora med dei distriktspsykiatriske sentra.

Ved tilsynet påpeikte Helsetilsynet i Hordaland tre avvik og gav fire merknader:

Avvika er:

1. Pasientar som blir tvangsinnlagde får ikkje skriftleg vedtak om etablering av tvunge psykisk helsevern

Avvik frå: Forskrift om etablering av tvunge psykisk helsevern § 6

2. Ved avslag på søknad om innlegging går det ikkje fram at rett til naudsynt helsehjelp er vurdert. Svaret blir ikkje alltid gitt innan 30 dagar. Det er ikkje opplyst om klagerett. Det blir ikkje sendt svar til pasienten og vedkomande blir ikkje gjort kjent med klagerett etter Lov om pasientrettigheter § 7-1 og § 7-2

Avvik frå:

Lov om spesialisthelsetjenesten § 3-11 og Lov om pasientrettigheter § 2-2, jf. § 2-1

3. Ikkje alle pasientar som er tvangsinnlagde på akuttpostane, har individuell plan

Avvik frå: Lov om etablering og gjennomføring av psykisk helsevern § 4-1 og Forskrift om individuell plan § 6

Merknadene er:

1. Opplysningar mottekne ved tilsynet etterlet uvisse om vilkåra for å halde

pasientar tilbake med tvang alltid er oppfylte og om friviljug opphald er prøvd i tilstrekkeleg grad

2. Knapp bemanning på akuttpostane reduserer høvet til individuell tilrettelegging og oppfølging av innlagde pasientar

3. Bygningsmessige tilhøve på akuttpostane E og F, med få einerom, er uheldig, særleg for pasientar som er tvangsinnlagde

4. Tverrfaglege møte blir i liten grad brukte til prinsipielle drøftingar og evaluering av eiga verksemd

Dato: 21. oktober 2003

Rapporten er utarbeidd etter tilsyn ved akutt/mottakspostane E og F ved Valen sjukehus, Psykiatrisk klinikk, Helse Fonna HF 25. og 26. september 2003. Tilsynet inngår i det landsomfattande tilsynet i 2003 med helsetenester til vaksne med psykiske problem.

Tilsynet blei utført som systemrevisjon. Føremålet med systemrevisjon er å vurdere korleis verksemda nyttar internkontroll til å oppfylla krav frå styresmaktene. Revisjonen omfattar undersøking av om

• aktivitetar blir utførde slik dei er framstilte skriftleg og munnleg
• verksemda når måla sine og driv verksemda innanfor dei rammene styresmaktene har sett.

Ein systemrevisjon blir gjennomførd ved gransking av dokument, ved intervju og ved verifikasjonar. Verifikasjon inneber å undersøkje om rutinar, prosedyrar og instruksar blir følgde i praksis, og om dei fysiske tilhøva tilfredsstiller krava frå styresmaktene.

Rapporten omhandlar avvik og merknader som er avdekte under revisjonen.

• Avvik er definert som mangel på oppfylling av krav frå styresmaktene.
• Merknad er tilhøve som ikkje kjem inn under definisjonen av avvik, men der tilsynet med utgangspunkt i krav frå styresmaktene avdekkjer potensial for betring.

Frå 1. september 2003 er alle verksemder i Helse Fonna HF organisert i ni klinikkar, kvar leia av ein klinikkdirektør. Medio september 2003 blei framlegg til framtidig organisering av verksemdene i Psykiatrisk klinikk sendt på ei vekes intern høyring. Avgjerd om organisering i klinikken, herunder framtidige funksjonar og organiseringa av desse ved Valen sjukehus var ikkje kjende for personell ved sjukehuset då tilsynet blei gjennomført. Valen sjukehus har konstituert avdelingsleiar i perioden 1. august til 31. desember 2003.

Miljøpersonell på postane er leia av avdelingssjukepleiar som rapporterer til avdelingsleiar. Behandlarar; legar, psykologar og sosionomar, er organiserte i team knytt til dei einskilde postane. Behandlarane rapporterer administrativt til avdelingsleiar. Faglege spørsmål kan leggjast fram for fagrådet som er leia av sjeflege. Alle stillingsomtalar gjeld fram til utgangen av september 2003.

Teamorganiseringa har vore i funksjon sidan årsskiftet 2002/2003 og er enno under innarbeiding. Samansettinga av kvart team skal spegle behovet til pasientane på den aktuelle posten. Kvart team er leia av teamleiar; overlege eller psykologspesialist. Teamet har det faglege ansvaret for tilbod til dei einskilde pasientane. Forventningar om at teamleiar i større grad ville vere tilgjengeleg på akuttpostane har hittil ikkje slått til. Den interne omorganiseringa er under evaluering.

Valen sjukehus har i dag 104 plassar. Over 80 % av pasientane blir innlagt som øyeblikkeleg hjelp. Dei to akutt/mottakspostane er lukka postar, kvar post har 12 plassar. Valen sjukehus fekk permanent godkjenning for tvunge psykisk helsevern med og utan døgnsopphald i 2002. Folgefonn DPS som blei oppretta frå 1. januar 2003 er enno ikkje i funksjon og manglar sengeplassar. Ein del pasientar som elles kunne vore innlagt i døgnavdeling ved dette senteret er innlagt i sjukehuset. Det er døgnavdeling ved Jonatunet. Einskilde pasientar blir lagt inn ved døgnavdelinga ved DPS Stord.

Sjukehuset er godkjent som utdanningsinstitusjon for inntil to år av spesialiteten i psykiatri og har som regel ein eller fleire psykologar som held på med spesialisering.

• Dokumentasjon frå Valen sjukehus i ekspedisjon av 2. juli 2003 med vedlegg. Oversikt over dokumentasjon går fram av vedlegg 1.
• Dokumentasjon som blei lagt fram ved tilsynet. Oversikt over dokumentasjon går fram av vedlegg 1.
• Korrespondanse mellom Helsetilsynet i Hordaland og helseføretaket går fram av kapittel 4.

Systemrevisjonen omfatta følgjande aktivitetar:

Melding om tilsyn blei sendt 30. mai 2003. Melding om endra dato blei sendt 24. juni 2003

Program blei sendt 20. august 2003.

Opningsmøte blei halde 25. september 2003

Intervju: 12 personar blei intervjua. Intervju med direktør for Psykiatrisk klinikk, Helse Fonna HF blei gjennomført 15. september 2003.

Verifikasjonar
Følgjande verifikasjonar blei gjennomførde:

Vurdering av tilvisingar – resultat av vurdering – svar til pasient og tilvisande instans:

• Det blei gjennomgått 17 pasientjournalar der søknad om innlegging resulterte i innlegging. Alle avslag (10) på søknad om innlegging i 2003 blei gjennomgått.

Oppfølging av pasientar innlagt etter sjølvmordsforsøk – psykiatrisk og somatisk undersøking ved innlegging

• Åtte pasientjournalar blei gjennomgått.

Vedtak om etablering av tvunge psykisk helsevern – informasjon til pasient

• Ti pasientjournalar blei gjennomgått.

Individuell plan – tvangsinnlagde pasientar

• Ti pasientjournalar blei gjennomgått. Av desse var to pasientar nyleg innlagde.

Sluttmøte blei halde 26. september 2003.

Område 1: Styring og leiing

Merknad 1 Opplysningar mottekne ved tilsynet etterlet tvil om vilkåra for å halde pasientar tilbake med tvang alltid er oppfylte og om friviljug opphald er prøvd i tilstrekkeleg grad

Merknaden er basert på følgjande observasjonar:

• Det blei gitt ulike opplysningar om det blir gjort ei kontinuerleg vurdering av om pasientar som er tvangsinnlagde, framleis treng opphald under tvunge psykisk helsevern. Det blei opplyst at det i det daglege arbeidet på akuttpostane ikkje blir vurdert om pasienten har friviljug opphald eller ikkje. Spørsmål om behov for å halde den einskilde pasienten under tvunge psykisk helsevern kan takast opp på teammøte, men miljøpersonellet tek ikkje opp dette spørsmålet og deira vurdering er sjeldan etterspurt.
• Av pasientjournalar som blei gjennomgått gjekk det ikkje alltid fram kva som var grunnlaget for å oppretthalde tvunge psykisk helsevern.
• Det blei opplyst at bruk av tvang ikkje har vore drøfta på generelt grunnlag på akuttpostane, til dømes med utgangspunkt i årsrapport frå kontrollkommisjonen, og at tverrfaglege møte i liten grad er forum for å drøfte ulike faglege synspunkt, sjå også merknad 4.
• Pasientstatistikk for første halvår 2003 og andre halvår 2002 (tal i parantes) viser at av i alt 65 (76) pasientar innlagt på post E og F blei 39% (30%) tvangsinnlagde. I løpet av første halvår 2003 blei 25 pasientar tvangsinnlagde på akuttpostane. Av desse blei 11 overført frå tvunge psykisk helsevern til friviljug opphald. På dei andre postane var 83 % ( 79%) tvangsinnlagde.
• Frå om lag halvparten av pasientane som søkjer friviljug innlegging blir det bede om samtykke til å vere undergitt reglane etter Lov om etablering og gjennomføring av psykisk helsevern § 3-1 i inntil tre veker frå etableringa av vernet, jf. Lov om etablering og gjennomføring av psykisk helsevern § 2-2.
• Tilsyn ved sjukehuset i 2001 etterlet tvil om vilkåra for å halde pasientar tilbake med tvang alltid var oppfylte og om friviljug opphald var prøvd i tilstrekkeleg grad, jf. rapport av 16. november 2001 (www.helsetilsynet.no).

Merknad 2 Knapp bemanning på akuttpostane reduserer høvet til individuell tilrettelegging og oppfølging av innlagde pasientar

Merknaden er basert på følgjande observasjonar:

• Det blei opplyst at akuttpostane har minimumsbemanning, særleg på nattevakt, seinvakter og i helger, og at dette gjev mindre høve til å følgje opp den einskilde pasienten, til dømes med samtaler eller følgje ut for å delta i aktivitetar utanom posten. Knapp bemanning på postane har og innverknad på høve til oversyn og observasjon av einskilde pasientar, og til å førebyggje eller dempe uro dersom slike situasjonar oppstår. I samband med rapport ved vaktskifte har det tidlegare hendt at personell ikkje har vore til stades ute i posten.
• Akuttpostane har siste tida jamleg hatt overbelegg. Pasientar som treng langtidsopphald blir grunna mangel på plass på langtidspostar verande på akuttpostane. Behov for individuell tilrettelegging og oppfølging som desse pasientane treng er til dels svært forskjellige frå pasientar som er i ein akutt sjukdomsfase. Grunna plassforhold på postane kan det bli mykje skifte av rom og av kva pasientar som må dela rom, sjå merknad 3.
• Ved behov for særskilt tilsyn med einskilde pasientar blir det teke inn ekstravakter. Omfang av bruk av ekstravakter blei ikkje konkretisert/talfesta ved tilsynet, men det blei opplyst at det hittil regelmessig har vore leigd inn ekstravakter.
• I årsrapport for Valen sjukehus 2002 til Helse Fonna HF er minimumsbemanning på postane omtalt. Det blei opplyst at spørsmål som gjeld bemanning på postane er tekne opp med og har vore kjende for leiinga i lengre tid. Leiinga er kjent med at det er overbelegg på akutt/mottakspostane.

Merknad 3 Bygningsmessige tilhøve på akuttpostane E og F, med få einerom er uheldig, særleg for pasientar som er tvangsinnlagde

Merknaden er basert på følgjande observasjonar:

• Det blei opplyst at akuttpostane har 12 sengeplassar. Av desse er det to einerom ved kvar post. I særskilte tilfelle blir dobbeltrom nytta til ein pasient. Ved behov for skjerming blir eit dobbeltrom nytta til slikt formål. Det er ikkje alltid høve til å skjerme pasientar som treng dette så lenge som ønskjeleg grunna mangel på eige skjermingsrom og behov for plass til pasientar som blir innlagde. Når ein ny pasient kjem inn, kan det medføre at pasientar må bytte rom, frå einerom til dobbeltrom eller frå eit dobbeltrom til eit anna. Om lag 80% av pasientane som blir lagt inn ved Valen sjukehus blir i første omgang innlagt i akuttpostane. Første halvår 2003 var gjennomsnittleg liggetid i dei to postane 40 dagar.
• Dei bygningsmessige tilhøva blei også påpeikte ved tilsyn i 2001, jf. rapport datert 16. november 2001 (www.helsetilsynet.no).

Merknad 4 Tverrfaglege møte blir i liten grad brukte til prinsipielle drøftingar og evaluering av eiga verksemd

Merknaden er basert på følgjande observasjonar:

• Det blei opplyst i intervju at forskjellige tverrfaglege møte, til dømes teammøte på postane og det daglege morgonmøtet[1] for alle behandlarar og avdelingssjukpleiarar, sjeldan blir nytta til prinsipiell drøfting av faglege spørsmål og praksis. Kvalitetsutvalet[2] si vurdering og eventuelle planar for vidare arbeid for av betring av resultat i høve til kvalitetsindikatorar som blir rapporterte til det regionale helseføretaket, var ikkje kjende.

Område 2: Pasientrettar

Avvik 1 Pasientar som blir tvangsinnlagde får ikkje skriftleg vedtak om etablering av tvunge psykisk helsevern

Avvik frå følgjande krav:

• Forskrift om etablering av tvunge psykisk helsevern § 6

Avviket er basert på følgjande observasjonar:

• Det blei opplyst i intervju at pasientane blir munnleg informerte om vedtak om etablering av tvunge psykisk helsevern og om klagerett. Det skriftlege vedtaket blir lagt fram for kontrollkommisjonen.
• Det går ikkje fram av pasientjournalar som blei gjennomgått at pasienten får skriftleg informasjon om vedtaket om etablering av tvunge psykisk helsevern.

Avvik 2 Ved avslag på søknad om innlegging går det ikkje fram at rett til naudsynt helsehjelp er vurdert. Svaret blir ikkje alltid gitt innan 30 dagar. Det er ikkje opplyst om klagerett. Det blir ikkje sendt svar til pasienten og vedkomande blir ikkje gjort kjent med klagerett etter Lov om pasientrettigheter § 7-1 og § 7-2.

Avvik frå følgjande krav frå styremaktene:

• Lov om spesialisthelsetjenesten § 3-11 og
• Lov om pasientrettigheter § 2-2, jf. § 2-1

Avviket er basert på følgjande observasjonar:

• Alle avslag på søknad om innlegging i 2003 blei gjennomgått. Av desse galdt fire søknad om overføring av pasientar frå anna sjukehus til Valen sjukehus. Det blei opplyst at Helse Fonna HF ikkje har gjort klart om Valen sjukehus skal ta imot pasientar frå andre sjukehus i helseføretaket og at Valen sjukehus inntil vidare difor tek inn pasientar frå sitt tidlegare opptaksområde og pasientar frå Bergen, jf. tidlegare avtale[3].
• I tilbakemelding til tilvisande instans er avslaget grunngitt med mangel på kapasitet. Svaret blir ikkje alltid gitt innan 30 dagar. Det går ikkje fram at behovet for helsehjelp er vurdert og det er ikkje opplyst om klagerett. Pasienten får ikkje tilbakemelding, heller ikkje når tilvisande instans særskilt har bedt om dette.

Område 3: Samhandling og samanheng i tenestetilbod

Avvik 3 Ikkje alle pasientar som er tvangsinnlagde på akuttpostane, har individuell plan

Avvik frå følgjande krav:

• Lov om etablering og gjennomføring av psykisk helsevern § 4-1 og Forskrift om individuell plan § 6

Avviket er basert på følgjande observasjonar:

• Det blei opplyst at arbeidet med individuelle planar er i gang, men at det ikkje blir gjennomført som føresett. Det kan gå lang tid innan det blir sett mål for behandlinga under opphaldet.
• Av i alt åtte pasientjournalar var det to som inneheldt ferdig utarbeidde individuelle planar. Tre planar var under arbeid, men dette var kome kort. Tre pasientar hadde ikkje individuell plan.

I tabellen under er det gitt ei oversikt over deltakarane på opningsmøte og sluttmøte og over personar som blei intervjua.

• Frå Helsetilsynet deltok:
  
  Grude, Paul, seniorrådgjevar, Helsetilsynet i Rogaland
• Robøle, Anne Grete, rådgjevar, Helsetilsynet i Hordaland (revisjonsleiar)
• Stafsnes, Agnes Maria, ass.fylkeslege, Helsetilsynet i Hordaland
• Tang, Bjørg Eikum, rådgjevar, Helsetilsynet i Sogn og Fjordane
• Ånestad, Torild Trane, rådgjevar, Helsetilsynet i Rogaland
• Johansen, John Agnar, seniorrådgjevar, Statens helsetilsyn (observatør)
  
  

Dokumentasjon motteken frå Valen Sjukehus, Helse Fonna HF, i brev datert 2.07.03 – Tilsyn 25. og 26. september 2003:

1. CD – skriftlig dokumentasjon internkontrollsystem Valen sjukehus

2. Helse Fonna: Mål- og strategiplan Helse Fonna, datert desember 2002

3. Rapport frå psykiatrigruppa og/eller forarbeid til Psykiatriplan for Helse Fonna, Utgåve: 15:11

4. Helse Vest: Styringsdokument 2003 Helse Fonna HF

5. Helse Vest: Bestilling 2003 – Vedlegg til styringsdokument 2003 – Helse Fonna HF

6. Årsmelding Valen sjukehus 2002

7. Medisinsk årsmelding for Valen sjukehus for året 2001

8. Fullmakt frå direktør ved sjukefråver, datert 27.01.03

9. Stillingsoversikt pr. 01.06.03

10. Vaktlister poster Valen sjukehus pr. mai 2003 og juni 2003

11. Oversikt over stipendutbetaling

12. Helse Fonna – Valen sjukehus: Vedr. opplæringsplan for leger, datert 20.06.03

13. Valen sjukehus: Brev til Den norske Legeforening vedr. Utdanningsvirksomhet i psykiatri – Valen sjukehus, datert 20.02.02

14. Undervisningsprogram for legar og psykologar våren 2003, datert 03.01.03

15. Oversikt over interne kurs hausten 2002 og vår 2003, datert 18.06.03

16. Gruppeleiarkompetanse i kunnskapsbasert familiearbeid, datert 17.05.03

17. Veiledere i det tverrfaglige utdanningsprogrammet SEPREP (brosjyre vedlagt)

18. Valen sjukehus: ”System for avvikskontroll i sjukehus – kan det fungere som eit godt verkty i internkontrollen?” Rapport om effekten av utvikling og innføring av eit heilskapleg system for avvikskontroll ved Valen sjukehus, datert 02.08.01

19. Sak 10/02 i kvalitetsutvalet– Oppsett av handlingsplan for risikoområder etter registreringsgruppe, datert 02.04.02

20. Helse Fonna – Valen sjukehus: Eksempel på brev vedr. svar på søknad

21. Pasientstatistikk for 2. halvår 2002 og 1. halvår 2003 for Valen sjukehus

22. Stillingsoversikt pr. 01.06.03

23. Valen sjukehus: Samarbeidsutvalget i Sunnhordland (SUSU) – Vedlegg: Mål og mandat for SUSU, datert 27.06.03

24. Formaliserte samarbeidsmøter hver 3. måned med kommunar

25. Helse Fonna – Valen sjukehus: Brev vedr. samarbeidsmøte mellom Valen sjukehus, Odda, Ullensvang, Eidfjord og Jondal kommune, Jonatunet og Psykiatrisk poliklinikk i Odda, datert 28.04.03

26. Helse Vest – Helse Bergen HF – Psykiatrisk divisjon – Askviknes VPS: Referat – samarbeidsmøte på Askviknes VPS 5. 03.03 mellom Valen, Solli, Askviknes og kommunane Austevoll, Fusa, Os og Samnanger og Fana bydel, datert 06.03.03

27. Referat fra samarbeidsmøte mellom Solli, Valen sjukehus, Askviknes samt kommunane Os, Fusa og Austevoll, Samnanger og Fana bydel onsdag 17.04.02, datert 18.04.02

28. Valen sjukehus: Plan for evaluering av omorganisering ved sjukehuset, datert 19.06.03

Dokumentasjon motteken i e-post 12.08.03

29. Opplysningar om post E og post F

Dokumentasjon motteken i e-post 15.08.03

30. Opplysningar om avdelings- og teamleiarfunksjonane m.v.

Dokumentasjon mottekn i møte med direktør Psykiatrisk klinikk, Helse Fonna HF 15.09.03

31. Høringsutkast –Organisasjionsstruktur nivå 2 – 3, frå klinikkdirektøren, datert 15. 09.03

Dokumentasjon motteken ved tilsynet 25.09.03

32. Sak 09/03 Kvalitetsindikatorar i avtalen med Helse Vest RHF, referat sak 09/03

33. Sak 14/03 Kvalitetsindikatorar – prioritering av innsatsområde og tiltaksplan, referat frå sak 14/03

34. Venteliste elektive innleggingar Valen sjukehus

35. Oversikt tal på pasientar innlagt i og utskrivne frå post E og F i perioden 1.06 – 1.09.03; innlagt 68, utskrivne 44

36. Oversikt pasientar overført frå tvunge psykisk helsevern til friviljug opphald på akuttpostane i perioden 1.01 – 30.06.03

37. Arbeidsdokument: Arbeid med å definere retningsliner som sikrar vurdering av suicidalitet og dokumentasjon av det

[1] Daglege møte for alle behandlarar, legar, psykologar, sosionomar og avdelingssjukepleiar frå postane E og F. Ein dag kvar veke deltek også avdelingssjukepleiarane frå dei andre postane ved sjukehuset.

[2] Tilsynet omfatta ikkje arbeidet i kvalitetsutvalet, men om sjukehuset (her akuttpostane), bruker opplysningar og data om eiga verksemd, til regelmessig evaluering av praksis.

[3] Dei fire søknadane frå andre sjukehus om å få overført pasientar til Valen sjukehus blei difor haldne utanom.