Fylkesmannen i Hordaland har gjennomført tilsyn i Austevoll kommune. Tilsynet vart utført som systemrevisjon. Fylkesmannen har under tilsynet hatt merksemd på korleis kommunen sikrar at forholda blir lagt til rette for tenesteyting med minst mulig bruk av tvang og makt, og om tenestemottakarane sitt tenestetilbod blir endra i samsvar med endring i hjelpebehov.

Denne rapporten gjer greie for avvik og merknader som blei påpeika innanfor dei reviderte områda. Systemrevisjonen gjaldt følgjande område:

• Om kommunen sikrar at tenestemottakar får eit forsvarleg tenestetilbod etter sosialtenestelova § 4-3 jf. § 4-2 bokstav a-d, i samsvar med eventuelle endra hjelpebehov og uavhengig av endra rammer.
• Om kommunen sikrar utføring av tenester etter sosialtenestelova § 4-2 bokstav a-d for personar med utviklingshemming utan bruk av tvang og makt som er i strid med reglane i kapittel 4A.

Det blei under tilsynet funne grunnlag for følgjande avvik:

• Austevoll kommune sikrar ikkje at tenester etter sosialtenestelova § 4-2 bokstav a-d til personar med utviklingshemming er i samsvar med reglane i sosialtenestelova kapittel 4A.

Fylkesmannen fann ikkje grunnlag for merknader innanfor dei kontrollerte områda av verksemda.

Dato: 04.05.06

Rapporten er utarbeidd etter systemrevisjon ved Austevoll kommune i perioden 13.-14.mars 2006. Revisjonen er ein del av det landsomfattande tilsyn med bruk av tvang og makt mot personar med psykisk utviklingshemming som Statens Helsetilsyn har fastsett skal gjennomførast for 2006 og går inn som ein del av den planlagde tilsynsverksemda hos Fylkesmannen i Hordaland dette året.

Fylkesmannen har fullmakt til å føre tilsyn med sosialtenesta etter lov om sosiale tenester § 2-6.

Formålet med systemrevisjonen er å vurdere om verksemda tek hand om ulike krav i lovgivinga gjennom internkontrollen sin. Revisjonen omfatta å undersøkje om:

• kva tiltak verksemda har for å avdekkje, rette opp og førebyggje brot på lovgivinga innanfor dei tema tilsynet omfattar
• tiltaka blir følgde opp i praksis og om nødvendig korrigerte
• tiltaka er gode nok for å sikre at lovgivinga blir følgd

Ein systemrevisjon blir gjennomført ved å granske dokument, ved intervju og andre undersøkingar.

Rapporten handlar om avvik og merknader som er avdekte under revisjonen og gir derfor inga fullstendig tilstandsvurdering av det arbeidet verksemda har gjort innanfor dei områda som tilsynet omfatta.

• Avvik dreier seg om at krav som er gitt i eller i tråd med lov eller forskrift, ikkje er oppfylte
• Merknad er forhold som ikkje er i strid med krav som er fastsette i eller i tråd med lov eller forskrift, men der tilsynsorganet finner grunn til å påpeke betringspotensial

Ansvaret for tenestetilbodet til personar med utviklingshemming er lagt til helse og sosialetaten og er delt på tre fagområde. Sosialkontor/barnevern har ansvar for støttekontakt og avlastning. Avdeling for heimetenester sone sør og nord har ansvar for heimesjukepleie og heimehjelp til personar med uviklingshemming i eigen bustad i sonene. Eidsbøen bufellesskap har ansvar for heimetenester til 16 personar med psykisk utviklingshemming.

Fylkesmannen hadde i forkant av tilsynet møte med Helse Bergen v/Habiliteringstjenesten og telefonsamtaler med representantar frå Austevoll NFU.

Systemrevisjonen omfatta følgjande aktivitetar:

Revisjonsvarsel blei sendt ut 18.01.06.

Opningsmøte blei halde 13.03.06.

Intervjuar
8 personar blei intervjua.

Oversikt over dokumentasjon som blei gjennomgått under revisjonsbesøket, er gitt i kapitlet Dokumentunderlag.

Sluttmøte blei halde 14.03.06.

I dette tilsynet har merksemd vore retta mot om kommunen sikrar at forholda leggjast til rette for tenesteyting med minst mogeleg bruk av tvang og makt jf. § 4A-4 , og om tenestemottakar sitt tenestetilbod etter § 4-2 bokstav a-d blir endra i samsvar med endring i hjelpebehov.

Tilsynet omfattar følgjande område:

• Om kommunen sikrar at tenestemottakar får eit forsvarleg tenestetilbod etter sosialtenestelova § 4-3 jf. § 4-2 bokstav a-d, i samsvar med eventuelle endra hjelpebehov og uavhengig av endra rammer.
• Om kommunen sikrar utføring av tenester etter sosialtenestelova § 4-2 bokstav a-d for personar med utviklingshemming utan bruk av tvang og makt som er i strid med reglane i kapittel 4A.

Område 1:
Sosiale tenester til personar med psykisk utviklingshemming – ved endring i hjelpebehov

Fylkesmannen fann ikkje grunnlag for avvik eller merknader på dette området.

Område 2:
Bruk av tvang og makt mot personar med psykisk utviklingshemming.

Avvik:
Austevoll kommune sikrar ikkje at tenester etter sosialtenestelova § 4-2 bokstav a-d til personar med utviklingshemming er i samsvar med reglane i sosialtenestelova kapittel 4A.

Avvik frå:

• Sosialtenestelova § 4A-4 jf § 2-1 og forskrift om internkontroll i sosial- og helsetenesta § 4 bokstav c og g.

Kommentar: I lov om sosiale tenester § 4A-4 er det bestemt at kommunen plikter å sørgje for at forholda vert lagt til rette for minst mogeleg bruk av tvang. Det er presisert at tenesteytarane skal sikrast nødvendig opplæring og fagleg rettleiing. Slik nødvendig opplæring kan vera grunnleggjande opplæring for personell som ikkje har gjennomgått nokon opplæring i lov om sosiale tenester kapittel 4A, og det kan vera vidare- eller etterutdanning for personell som treng kunnskap for å ajourføre eller vidareutvikle kompetanse for det arbeidet dei skal utføre.

Avviket bygger på følgjande observasjonar:

• Kommunen har delt ansvar for sakshandsaming og tildeling av tenester til personar med utviklingshemming etter sosialtenestelova § 4-2 bokstav a-d på fleire fagavdelingar utan å sikre at dei som utfører desse oppgåvene har tilstrekkjeleg kunnskap om reglane i kapittel 4A.
• Kommunen har ikkje ein opplæringsplan og der er heller ikkje gitt opplæring til alle tilsette i reglane i kapittel 4A.
• Det vert brukt varslingssystem knytt til to tenestemottakarar utan at det er føretatt vurderingar mot reglane i kapittel 4A, under dette vurdering av tenestemottakarane si samtykkekompetanse.
• Av tilsendt dokumentasjon og intervju under tilsynet kom det fram at kommunen ikkje har tilstrekkjelege rutinar for eigenkontroll med å overhalda reglane i kapittel 4A.

• Lov om sosiale tenester av 13.12.91, kapittel 4 og 4A
• Forvaltningslova
• Forskrift om internkontroll i sosial- og helsetenesta av 20.12.02

Dokumentasjon frå verksemda knytt til den daglege drifta og andre viktige forhold som blei send over da revisjonen blei førebudd:

• Organisasjonskart for Austevoll kommune
• Økonomireglement for Austevoll kommune
• Årsmelding 2004
• Delegasjonsreglement
• Stillingsinstruks for sosial- og barnevernsleiar
• Stillingsinstruks for avdelingsleiar ved Eidsbøen bufellesskap
• Kopi av 10 einskildmeldingar om bruk av tvang
• Kopi av 10 meldingar om truslar og /eller vold retta mot tilsette
• 8 stk enkeltvedtak om tildeling av tenester etter § 4-2, a-d
• Rutinar for internkontroll kapittel 4A
• Oversikt over kven som har oppgåver knytt til personar med utviklingshemming
• Avtaledokument om dagaktivitetstilbud for yrkeshemmede datert 01.10.04.

Dokumentasjon som blei gjennomgått under revisjonsbesøket:

• 12 mapper/journaler
• Sjekkliste for nyansatte ved Eidsbøen bufellesskap
• Rutinar for handsaming av avvik innan helse- og sosialetaten datert 09.09.02
• Opplæringsplan for helse og sosialetaten i Austevoll kommune, jf rekrutteringsplanen for helse- og sosialpersonell ajourført pr. april 2005.

Korrespondanse mellom verksemda og Fylkesmannen:

• Revisjonsvarsel datert 18.01.06
• Brev frå Austevoll kommune datert 30.01.06 med namn på kontaktperson
• Oversending av dokumenter frå kommunen datert 16.02.06
• E-mail av 01.03.06 frå Austevoll kommune med ytterlegare informasjon
• Utsending av program for revisjonen pr. e-post datert 09.03.06

Tabellen under gir ei oversikt over deltakarane på opningsmøte og sluttmøte, og over kva personar som blei intervjua.

Frå Fylkesmannen i Hordaland deltok:
Torill Vebenstad, revisjonsleiar
Vibeke Herskedal
Ellen H. Aarrestad