Denne rapporten omtaler påpeikte avvik og merknader innan dei reviderte områda. Tema for tilsynet var om dei heimebuande eldre i Vågsøy får dei helse- og sosialtenestene dei har rett til. Systemrevisjonen omfatta følgjande område:

• Kartlegging av omsorgsbehov ved søknad om helse- og sosialtenester
• Utføring av vedtak om heimesjukepleie, heimehjelp/støttekontakt
• Kontroll med eiga verksemd

Verksemda har utarbeida rutinar for kartlegging av tenestebehov. Kartlegginga vert utført av personell med nødvendig kompetanse og som har fått nødvendig opplæring. Dei tilsette er godt i gang med bruk av IPLOS kartleggingsskjema i dette arbeidet. Søkar sitt opplevde behov vert kartlagt og dokumentert, og pårørande vert tekne med i kartlegginga av tenestebehovet når dette er nødvendig. Det vert teke omsyn til søkar sine fysiske, psykiske og sosiale behov.

Innhaldet i vedtaket vert gjort skriftleg kjent for tenestemottakar. Tenesteytarane vert informerte om innhaldet i vedtaket av avdelingsleiar eller gruppeleiar i rapportmøte. Tenestetilbodet vert i stor grad tilpassa den enkelte sin døgenrytme, og gruppeleiar har ansvar for å koordinere tenestene. Tenestene vert evaluerte fortløpande, og dei tilsette gjev tilbakemelding både skriftleg og munnleg til gruppeleiar eller avdelingsleiar. Ved større endringar i tenestebehovet vert det gjort nytt vedtak etter at behovet først er kartlagt. Tenesteytarane kontaktar lege ved behov, og det er lett å få tilgjenge til fastlege eller legevakt.

Verksemda har rutinar for opplæring av nytilsette og vikarar, det vert gjennomført internundervisning, og det er utarbeida opplæringsplan

Det vart gjeve eit avvik og tre merknader:

Avvik 1
Verksemda sine rutinar for legemiddelhandsaming er ikkje i samsvar med regelverket.

Merknad 1
Verksemda bør sikre gode rutinar for vurdering av samtykkekompetanse og dokumentasjon av avgjerd når slik kompetanse manglar.

Merknad 2
Verksemda bør vurdere om talet på tenesteytarar til enkelte tenestemottakarar kan reduserast, og om det kan gjerast meir føreseieleg for tenestemottakaren kven som kjem når for å gjere kva.

Merknad 3
Verksemda bør sikre at det på ein systematisk måte vert gjeve informasjon om individuell plan til alle tenestemottakarar som har rett til slik plan.

Dato: 18.04.06.

Rapporten er utarbeidd etter tilsyn i Vågsøy kommune i perioden 06.02.06 - 18.04.06, gjennomførd av Fylkesmannen og Helsetilsynet i Sogn og Fjordane. Tilsynet er del av Helsetilsynet og Fylkesmannen i Sogn og Fjordane si planlagde tilsynsverksemd for 2006.

Føremålet med tilsynet er å vurdere om verksemda oppfyller lovkrav innan dei tema tilsynet omfattar. Sjå nærare omtale av dette i kapittel 5.

Dette tilsynet omfattar både helsetenester etter helselovgivinga som er underlagt tilsyn frå Helsetilsynet i fylket og sosiale tenester etter sosialtenestelova som er underlagt tilsyn frå Fylkesmannen. Fylkesmannen, som er ansvarleg for tilsyn med sosiale tenester, og Fylkeslegen, som er ansvarleg for tilsyn med helsetenester, har oppnemnt eit felles tilsynslag til å gjennomføre tilsynet. Det er utarbeidd ein felles rapport. Oppfølgjinga av eventuelle avvik vil skje samordna frå Fylkesmannen og Helsetilsynet si side.

Tilsynet er utført som systemrevisjon. Ein systemrevisjon blir gjennomført ved gransking av dokument, ved intervju og ved verifikasjonar. Verifikasjon inneber å sjekke om rutinar, prosedyrar og instruksar blir følgde i praksis, og om dei fysiske tilhøva tilfredsstiller krava frå styresmaktene.

Rapporten omhandlar avvik og merknader som er avdekte under revisjonen.

• Avvik er definert som mangel på oppfylling av krav frå styresmaktene.
• Merknad er tilhøve som ikkje kjem inn under definisjonen av avvik, men der tilsynet med utgangspunkt i krav frå styresmaktene avdekkjer forhold som kan bli betre.

Vågsøy kommune er ein kystkommune med 6218 innbyggjarar der 16,3% av desse er over 67 år. Kommunen har organisert tenestene sine i ein tonivåmodell med ei leiargruppe og ti tenesteområde. Rådmannen har to kommunaldirektørar i toppleiarteamet sitt. Kommunaldirektør for helse og sosial har ansvar for fire tenesteområde med kvar sine tenesteleiarar. Pleie, rehabilitering og omsorg utgjer tre av desse tenesteområda. Familie og helse er det fjerde tenesteområdet.

Verksemda sin eigen dokumentasjon, tilsendt per post/e-post: 31.01.06.

• Organisasjonskart for verksemda - PRO område Bryggja, Vågsøy og Fastlandet
• Oversikt over tilsette, område Bryggja, Fastlandet og Vågsøy
• Prosedyre for kartlegging av behov og sakshandsaming for tildeling av tenester
• Mal for individuell plan
• Område Vågsøy:
  Innhaldsoversikt – ”Oppbygging av internkontroll- dokumentasjonen HMS og Helse i Helse og sosialtenesta”
  Leiaravtale mellom tenesteleiar og Vågsøy kommune
  Arbeidsbeskrivelse for avdelingsleiar
  Arbeidsbeskrivelse for gruppeleiar
  Oppgåver for primærkontakt
  Opplæringsplan, kurs og undervisning 2006, område Vågsøy
  Prosedyre: medikamenthåndtering
  medisinbestilling
  medisinromsansvarlig
  Meldeskjema ”feil i dosett ved kontroll”
  Sjølvrapporteringsskjema for avvik i administrasjon av legemiddel i høve til ordinasjon
  Skjema godkjenning til å sette insulin
  Skjema autorisasjon fra lege til å dele ut medikamenter
  Program for kurs i legemiddellære for hjelpepleiarar og omsorgsarbeidarar Vågsøy/Selje kommune
  Evalueringsskjema for praksis i medikamenthandtering
  Oversikt – organisering av kvalitetsarbeidet i PRO område Vågsøy
  Kopi av 5 vedtak om heimetenester
• Område Bryggja:
  Leiaravtale for tenesteleiar og Vågsøy kommune
  Arbeidsbeskrivelse avdelingssjukepleiar
  Arbeidsbeskrivelse gruppeleiar
  Oppgåver for primærkontakt
  Oppgåver for primærsjukepleiar
  Oppgåver for ansvarsvakt
  Prosedyre
  Medikamenthandtering for heimetenesta i område Bryggja
  Program kurs i legemiddellære for hjelpepleiarar og omsorgsarbeidarar i Vågsøy kommune
  Program praktisk opplæring i legemiddelhandtering i Vågsøy kommune
  Liste over tilsette med autorisasjon frå lege til å dele ut medikament ved Bryggja omsorgssenter
  Evalueringsskjema for praksis i medikamenthandtering
  Kvalitetsutval Område Bryggja
  Kopi av 3 vedtak om heimetenester
• Område Fastlandet:
  Innhaldsoversikt Oppbygging av Internkontroll dokumentasjonen
  Lederavtale for Vågsøy kommune
  Arbeidsbeskrivelse:
  avdelingssjukepleiar
  gruppeleiar
  nattevakt
  Oppgåver for primærkontakt
  Oppgåver for primærsjukepleiar
  Oppgåver for ansvarsvakt
  Kurs opplæring og undervisning 2006
  Organisering av kvalitetsarbeidet i PRO området Fastlandet
  Prosedyre:
  Medikamenthandtering for heimetenesta
  Program kurs i legemiddellære for hjelpepleiarar og omsorgsarbeidarar Vågsøy kommune
  Evalueringsskjema for praksis i medikamenthandtering
  Liste over tilsette med autorisasjon frå lege til å dele ut medikament i avdeling
  Plan for lukking av avvik
  Sjølvrapporteringskjema for avvik i administrasjon av legemidler i høve til ordinasjon
  Skjema for melding av avvik/tilløp til avvik og framlegg til forbetringstiltak
  Kopi av 3 vedtak om heimetenester

Dokumentasjon utdelt tilsynsdagen:

• Logg for melde avvik 29.07.05 - 11.02.06 legemiddelhandtering.
• Utarbeida, men ikkje godkjend prosedyre:
• ”Opplæringsplan for nytilsette og vikarar”
• ”Bestilling og henting av medikamnet og andre apotekvarer.”
• ”Tillaging av medikament”
• ”For lukking av avvik”
• Opplæringsplan for vikarar i område Vågsøy
• Informasjon ”Velkomen som tilsett i Vågsøy kommune”

Korrespondanse mellom verksemda og Fylkesmannen:

• Brev til Vågsøy kommune frå Helsetilsynet og Fylkesmannen i Sogn og Fjordane med melding om tilsyn av 20.12.05.
• Brev med vedlegg frå Vågsøy kommune til Helsetilsynet og Fylkesmannen i Sogn og Fjordane av 31.01.06.
• Brev med dagsorden frå Helsetilsynet og Fylkesmannen i Sogn og Fjordane til Vågsøy kommune av 06.02.06.

Systemrevisjonen omfatta følgjande aktivitetar:

Melding om tilsyn blei sendt ut 0.12.05.

Opningsmøte vart halde 16.02.06.

Intervju
6 personar vart intervjua.

Verifikasjonar
Følgjande verifikasjonar blei gjennomførde:

A. Vedtak om tenester

8 vedtak om heimesjukepleie og heimehjelp/støttekontakt til tenestemottakarar vart gjennomgått. I vedtaka vart det undersøkt om:

• søknaden var munnleg eller skriftleg
  Det er nytta standard søknadskjema, og det ligg føre skriftleg søknad i alle dei verifiserte sakene.
• søknaden var underskriven av søkar og/eller pårørande
  Søknaden var underskriven av søkar i 6 av sakene. I den eine av desse, var søknad underskriven av både søkar og pårørande. I dei to andre sakene var søknad underskriven av pårørande.
• søknaden inneheld opplysningar om tenestebehov
  Opplysningar om tenestebehov går fram av alle dei verifiserte sakene.
• det føreligg kartleggingsskjema eller anna dokumentasjon på brukaren sitt tenestebehov
  Det ligg føre IPLOS kartleggingsskjema i alle dei verifiserte sakene. I ei av sakene ligg det føre kartlegging av behov i referat frå heimebesøk, i fem av sakene ligg det føre opplysningar om behov på søknadskjema.
• det er samsvar mellom søknad om tenester og kartlagde behov
  Det er samsvar mellom kartlagde behov og søknad om tenester i alle dei verifiserte sakene.
• det er gjort vedtak i saka
  Det er fatta vedtak i alle dei verifiserte sakene. I nokre av vedtaka der det er tildelt heimehjelp og gjort vedtak om eigenbetaling, manglar opplysningar om klageretten på vedtaket som omhandlar eigenbetalinga. I eit av vedtaka om tilbod om dagopphald som eit avlastingstilbod, er vedtaket heimla i kommunale retningslinjer og ikkje vurdert etter sosialtenestelova §§ 4-2b/4-3. På søknad om kortidsplass som avlasting er tenesta tildelt etter kommunehelsetenestelova og ikkje vurdert etter sosialtenestelova §§ 4-2b/4-3. 
• vedtaket er i samsvar med vurderinga og om vedtaket er nødvendig konkretisert
  Alle dei verifiserte vedtaka tilseier at tenestemottakar har fått tildelt tenester som er i samsvar med vurdering av tenestebehovet til den einskilde, og fullgode opplysningar om kva tenester som er tildelt går fram i 7 av dei 8 vedtaka. I det eine vedtaket om heimesjukepleie manglar opplysningar om hjelp til legemiddelhandtering sjølv om det går fram av faktaopplysningane at denne hjelpa vert gjeve.
• det er utarbeida grunngjeving for vedtaket
  Alle dei verifiserte vedtaka er tilstrekkeleg grunngjevne.

B. Gjennomsyn av journalsystem/rapportsystem

Verksemda nyttar elektronisk rapportering og dokumentasjonssystem Unic Profil. Dette vert også nytta i sakshandsaming og tildeling av tenester etter kommunehelsetenestelova og sosialtenestelova. Alle tilsette har fått opplæring i bruk av rapporteringssystemet, og alle tilsette har ansvar for å rapportere pleierapportar fortløpande. Tenesta er framleis i ein overgangsperiode, gamalt kardexsystem vert no kun nytta på nokre få tenestemottakarar.

Det elektroniske medisinkortet er ikkje teke i bruk, medisinkort frå kardex vert framleis nytta.

C. Gjennomsyn av system for fordeling av tenestemottakar og oppgåver

Tenesteleiar gjev melding til gruppeleiar om vedtak som er fatta. Gruppeleiarar er ansvarleg for fordeling av tenestemottakarar og arbeidsoppgåver til den einskilde tenesteytar. Det vert utarbeida vekeplanar/oversikt der dette er fordelt. Alle tilsette møter på morgonrapport og får tildelt oppgåver. Dei tilsette nyttar også eigen dokumentasjon (”svarteboka”) dersom det er beskjedar eller oppgåver som skal utførast. Denne boka har alle eit ansvar for å lese.

D. Gjennomsyn – dokumentasjon for legemiddelforsyninga

Det er utarbeida skriftlege rutinar for legemiddelforsyninga. Alle sjukepleiarar har tilgang (kode) til medisinrommet. Sjukepleiarane legg medisinane i dosettar, og det vert utført dobbel kontroll av desse. Det vert ført eigen dokumentasjon på bruk av A og B preparat. Medisin vert tillaga etter kardex/medisinkort. Desse er ikkje underskrivne/signert av lege. A preparat til pasientar som det ikkje lenger vert gjeve tenester til, vert lagra i låsbart skap. A-preparat vert elles lagra saman med andre medikament i bakkar som er knytta til den einskilde tenestemottkarar.

Ferdig tillaga dosettar vert lagra i eige skap som også hjelpepleiarar/omsorgsarbeidarar har tilgang til. Dei hentar dosettar frå dette skapet og tek med seg ut til den enkelte tenestemottakar. Personell utan opplæring og delegasjon tek med seg enkeltdosar ut til pasientane. Hjelpepleiar/omsorgsarbeidar tek desse medikamenta frå dosettane og legg i godt merka plastikklommer.

E. Verksemda sitt internkontrollsystem

Verksemda sitt internkontrollsystem er under revisjon. Det er utarbeida prosedyre for melding av avvik i høve legemiddelhandtering. To ulike avviksskjema vert nytta; det eine til registrering av feil ved tillaging av dosettar, det andre ved andre feil i høve legemiddelhandsaminga. Frå 01.08.05 til 31.01.06 er det meldt om 51 feil i dosett v/kontroll og 16 andre avvik knytta til legemiddelhandteringa. Tenesta definerer ikkje oppdaga feil i samband med tillaging av dosett som avvik. Soneleiar har utarbeida statistisk oversikt over meldte avvik i høve til legemiddelhandsaminga for 2005.

Sluttmøte var halde 16.02.06.

Tema for tilsynet var om dei heimebuande eldre i Vågsøy får dei helse- og sosialtenestene dei har rett til. Tilsynet har fokusert på følgjande område:

Tilsynet har undersøkt om

• verksemda gjennomfører kartlegginga på ein systematisk måte og at den vert. utført av personell med nødvendig kompetanse.
• om samtykke og samtykkekompetanse vert vurdert.
• om brukaren vert teken med og vert høyrd i kartlegginga, og at brukar sine synspunkt /meiningar vert dokumentert.
• det vert teke omsyn til brukaren sine fysiske, psykiske og sosiale behov.

Gjennomføring av vedtak
Tilsynet har undersøkt om

• tenestetilbodet vert gjort kjend både for tenestemottkarar og tenesteytar, og at dei får ei felles forståing av innhaldet i vedtaket.
• tenestetilbodet vert tilpassa brukaren sine behov i høve døgerrytme/fleksible ordningar.
• tenestene er føreseielege og om det er kontinuitet i personalgruppa.
• tenestetilbodet vert evaluert i høve brukarbehovet.
• verksemda sikrar at tenestemottakarane får nødvendig legetilsyn/medisinsk behandling.
• legemiddelforsyninga er i samsvar med regelverket.

Kontroll med eiga verksemd, læring og forbetringsarbeid

Tilsynet har undersøkt om

• verksemda har tilsett personell med nødvendig kompetanse og har ordningar for nødvendig opplæring.
• verksmeda brukar eigne erfaringar og resultatdokumentasjon i forbetringsarbeidet.
• verksemda har ordningar for å handtere uhell og nestenuhell.

Verksemda har utarbeida rutinar for kartlegging av tenestebehov. Verksemda har tilsett personell med nødvendig kompetanse, og personell som deltek i kartleggingsprosessen har nødvendig kompetanse og dei har fått nødvendig opplæring. Dei tilsette er godt i gang med bruk av IPLOS kartleggingsskjema i dette arbeidet. Alle tilsette har gjennomgått opplæring i bruk av kartleggingsverktøyet og i bruk av Unic profil som dokumentasjonsverktøy. Brukar sitt opplevde behov vert kartlagt og dokumentert, og pårørande vert teken med i kartlegginga av tenestebehovet når dette er nødvendig. Det vert teke omsyn til søkar sine fysiske, psykiske og sosiale behov.

Tenestetilbodet som det vert gjort vedtak om vert skriftleg gjort kjendt for tenestemottakar. Tenesteytarane vert informert om vedtaket og innhaldet i dette av avdelingsleiar eller gruppeleiar i rapportmøte. Tenestetilbodet vert i stor grad tilpassa den enkelte sin døgenrytme, og gruppeleiar har ansvar for å koordinere tenestene. Tenestene vert evaluerte fortløpande. Dei tilsette gjev tilbakemelding både skriftleg og munnleg til gruppeleiar eller avdelingsleiar. Ved større endringar i tenestebehovet vert det gjort nytt vedtak etter at behovet først er kartlagt. Lege vert kontakta ved behov, og det er lett å få kontakt med enten fastlege eller legevakt.

Verksemda har rutinar for opplæring av nytilsette og vikarar, og det vert gjennomført internundervisning. Det er utarbeida opplæringsplan.

Avvik 1
Verksemda sine rutinar for legemiddelhandsaming er ikkje i samsvar med regelverket.

Avvik frå følgjande krav frå styresmaktene:

• Legemiddelforskrifta §§ 6, 8, jf forskrift om internkontroll § 4, bokstavane c og f-h.

Avviket er basert på følgjande revisjonsbevis:

• Gjennom intervju og ved verifikasjon gjekk det fram at dosettar til over 100 tenestemottakarar vert tillaga på grunnlag av medisinkort der skriftleg ordinasjon av lege ikkje er dokumentert. Medisinkorta er ikkje signert av lege.
• Dei intervjua sjukepleiarane opplyste om at endringar og seponering av medikament vert gjort på medisinkort på grunnlag av telefonisk henvending frå legekontoret eller på grunnlag av epikrise frå spesialisthelsetenesta utan at medisinkortet vert lagt fram for lege til signering.
• Den verifiserte narkotikaprotokollen synte at det ikkje var gjennomført dobbel kontroll/signatur ved uttak av A-preparat.
• Gjennom intervju og ved verifikasjon gjekk det fram at A-preparat til tidlegare tenestemottkarar / medikament som ikkje lenger er i bruk, vert lagra i eige skap og ikkje returnert til apotek for destruksjon.
• Gjennom intervju gjekk det fram at alle sjukepleiarane som arbeider i sona kjenner koden til medisinrommet og har dermed tilgang til legemiddellageret.
• Gjennom intervju og ved verifikasjon gjekk det fram at ikkje alle tilsette som deltek i utdeling av legemiddel til pasient har nødvendig opplæring og skriftleg delegasjon frå lege. Enkeltdosar som mellom anna hjelpepleiarane tek ut frå dosettar og legg over i plastlommer, vert delt ut til pasientane av hjelpepleiar/assistent utan delegasjon.
• Gjennom intervju og ved verifikasjon gjekk det fram at hjelpepleiarar lagar til enkeltdosar i plastlommer frå tillaga dosett utan at denne oppgåva går fram av skriftleg delegasjon.
• Ved verifikasjon av dei skriftlege delegasjonane som gjeld subcutane injeksjonar gjekk det fram at desse mangla opplysningar om kor lenge delegasjonen gjeld.

Merknad 1
Verksemda bør sikre gode rutinar for vurdering av samtykkekompetanse og dokumentasjon av avgjerd når slik kompetanse manglar.

Merknaden er basert på følgjande revisjonsbevis:

• Gjennom intervju gjekk det fram at ikkje alle dei tilsette som deltek i kartlegging av tenestebehov, sakshandsaming og utføring av tenester, var kjende med reglane om samtykkekompetanse i lov om pasientrettar.
• Det gjekk ikkje fram opplysningar i dokumentasjonen vi såg gjennom at det var gjort samtykkekompetansevurdering av nokon av søkarane. Ikkje alle søknadene var underskrive av søkjar.
• Ved verifikasjon og gjennom intervju gjekk det fram at registrering av opplysningar om vurdering av samtykkekompetanse og dokumentasjon av manglande samtykke som det var høve til å registrere i Unic profil ikkje var teke i bruk.

Kommentar: Helsepersonell sine oppgåver når det gjeld vurdering av samtykkekompetanse ved yting av helsehjelp, og kva som må gjerast når slik samtykkekompetanse manglar, går fram av lov om pasientrettar kap.4. Samtykkekompetansen kan falle bort heilt eller delvis av ulike årsaker, mellom anna senil demens. Dersom det vert teke avgjerd om manglande samtykkekompetanse i høve helsehjelpa som skal ytast, skal denne avgjerda vere skriftleg og grunngjeven, og den skal om mogleg straks leggjast fram for pasient og pårørande, jf lov om pasientrettar § 4-3. Det skal gå fram av journalen kven som samtykker på vegne av pasienten som manglar samtykkekompetanse, jf journalforskrifta § 8 bokstav c. Vi syner også her til internkontrollforskrifta § 4 bokstavane c, og f-h. Kven som skal reknast som næraste pårørande går fram av lov om pasientrettar § 1-3.

Merknad 2
Kommunen bør vurdere om talet på tenesteytarar til enkelte tenestemottakarar kan reduserast, og om det kan gjerast meir føreseieleg for tenestemottakaren kven som kjem når for å gjere kva.

Merknaden er basert på følgjande revisjonsbevis:

• Gjennom intervju gjekk det fram at enkelte tenestemottakarar må forhalde seg til relativt mange tenesteytarar i løpet av ei veke og at tenesteytarane sjølve har gjeve uttrykk for at dei opplever det slik.
• Dei intervjua opplyste om at tenestemottakarar som får hjelp fleire gonger for dagen, ikkje vert gjort kjende med kven dei kan vente neste gong.
• Dei intervjua opplyste om at det stort sett vert gjeve melding per telefon ved forsenkingar ut over ein time.
• Dei intervjua opplyste om at det ikkje vart skrive avviksmeldingar ved forsenkingar eller andre hendingar som gjer at avtalar måtte utsetjast eller endrast.
• Dei intervjua opplyste om at dei har prosedyre for å melde avvik, men at dette ikkje vert gjort slik det var tenkt, og at lite avvik vert melde.
• Gjennom intervju gjekk det fram at det var gjort ei brukarkartlegging, men at verksemda ikkje har nytta denne informasjonen på ein systematisk måte i forbetringsarbeidet.

Kommentar: Kommunen skal arbeide for å sikre at brukarar av pleie- og omsorgstenester får tilfredsstilt grunnleggjande behov, og det skal utarbeidast skriftlege nedfelte prosedyrar for å søke å sikre dette, jf kvalitetforskrifta § 3. Det å oppleve respekt og tryggleik, sjølvstende og styring av eige liv er nemnt som døme på grunnleggjande behov. Vi syner også til internkontrollforskrifta § 4, særleg bokstavane e-h.

Merknad 3
Verksemda bør sikre at det på ein systematisk måte vert gjeve informasjon om individuell plan til alle tenestemottakarar som har rett til slik plan.

Merknaden er basert på følgjande revisjonsbevis:

• Det var ikkje utarbeida individuell plan i nokon av dei sakene vi såg gjennom. Det gjekk heller ikkje fram opplysningar om at tenestemottakar har takka nei til å få utarbeida slik plan.
• Dei intervjua hadde ikkje ein felles forståing for korleis det vert gjeve informasjon om retten til individuell plan, eller kven som har eit ansvar for at dette arbeidet vert sett i gang.
• Den verifiserte dokumentasjonen inneheld mal for individuell plan, men ikkje det går ikkje fram opplysningar om det er utarbeida informasjon til tenestemottkarar om slik plan.

Kommentar: Alle tenestemottakarar med behov for langvarige og koordinerte helse og sosialtenester uavhengig av alder har rett til å få utarbeida individuell plan dersom dei ønskjer det, jf forskrift om individuell plan § 4, jf lov om pasientrettar § 2-3. Kommunen har ei tilsvarande plikt til at dette vert gjort, jf sosialtenestelova § 4-3a og kommunehelsetenestelova § 6-2a. For å sikre at alle med slike rettar får nødvendig informasjon om rettane sine, kan det vere føremålstenleg at informasjon om retten til indivduell plan vert gjeve på ein systematisk måte, og at informasjonen gjerne vert gjeve både skriftleg og munnleg. Vi syner også her til internkontrollforskrifta § 4 bokstavane f-h.

Oversikt over personar frå verksemda som var direkte involvert i revisjonen.

I tabellen under er det gitt ei oversikt over deltakarane på opningsmøte og sluttmøte, og over kva for personar som blei intervjua

Frå Fylkesmannen og Helsetilsynet i Sogn og Fjordane deltok:
Gudrid Buene, revisor
Anne Eli Wangen, revisjonsleiar