Forsking og utvikling / Dr.gradsstudentar / Regelverk for stipendiatar / Regelverk for stipendiatar ved HVO

Vedteke av Forskingsutvalet 02.02.06.

1. Regelverket byggjer på Utdannings- og forskingsdepartementet sine retningslinjer for tilsetting som stipendiat ved universitet og høgskular, fastsett 10. juni 2003, og Kunnskapsdepartementets forskrift* om tilsettingsvilkår for stillingar som m.a. stipendiat, fastsett 31. januar 2006.
                         
2. Utlysing/søknadsfase: HVO skal lyse ut stipendiatstillingar med tilstrekkjeleg lang søknadsfrist til at søkjarar kan utarbeide grundige prosjektskisser. I utlysinga skal det krevjast fråsegn om opptak på doktorgradsprogram, eller at det skal leggjast ved søknad om opptak.
                    
3. HVO skal arbeide aktivt for å lage institusjonelle avtalar med dr.gradsinstitusjonar i inn- og utland slik at opptak av våre stipendiatar og avtalar med rettleiarar vert enklare.
                
4. Stipendiaten har likevel eit sjølvstendig ansvar for å ta kontakt med rettleiar og sørge for opptak på program innan tre måndader etter tilsetjing, jf. UFD sine retningslinjer pkt. 2.
                
5. Det skal utarbeidast ein arbeidsavtale mellom stipendiaten og HVO, jf. UFD sine retningslinjer, pkt. 4. Ansvaret for dette ligg til den instansen som har det formelle arbeidsgivaransvaret, som regel avdelingsleiinga ved den avdelinga stipendiaten er tilsett. Ut over det som UFD sine retningslinjer seier om pliktarbeid m.v., skal det i arbeidsavtalen peikast ut ein lokal kontaktperson (mentor) i samråd med stipendiaten som skal følgje opp dei faglege sidene av arbeidet til stipendiaten. Mentor kan vere formell rettleiar eller birettleiar, men treng ikkje vere det. Mentor skal gi stipendiaten tilgang til sitt faglege nettverk, nasjonalt og internasjonalt.
                  
6. Alle stipendiatar ved HVO skal følgjast opp med medarbeidarsamtalar minst ein gong i året. Arbeidsgivar har ansvaret for gjennomføring av medarbeidarsamtalen. Denne kan ta utgangspunkt i stipendiaten sin årlege rapport til dr.gradsinstitusjonen.
                    
7. HVO vil skipe til faglege forum der stipendiatar og andre kan møtast og legge fram arbeida sine, få kommentarar til desse og slik bli tettare integrert i forskingsmiljøet i Volda. Aktiviteten i slike faglege forum skal også omfatte seminar og gjesteforelesingar og ulike typar opplærings- og utviklingstiltak, som t.d. publiseringsseminar.

* Kunnskapsdepartementet sendte 07.04.06 ut eit brev til institusjonane der delar av forskrifta blir utdjupa, m.a. stipendiatane sine rettar ved fråver. 

Skriv ut