Emne NO101 Språket som struktur

Semesterplan (tilrettelegging og gjennomføring) hausten 2006

Nordisk institutt ved Høgskulen i Volda ønskjer deg velkomen til nettstudium i språk, anten du er ein rutinert student som var med oss i vår, eller du er nyregistrert student som tek til no.

Faglærarene på NO101 hausten 2006 er Terje Aarset (taa@hivolda.no, tlf. 70 07 51 39) og Ann-Kristin Molde (akm@hivolda.no, tlf. 70 07 50 67). Molde er faglærar på tyngdepunkt 1 og 2 og Aarset på tyngdepunkt 3 og 4.

Emneansvarleg på NO101 er Terje Aarset. Han svarer på e-post og telefonar av fagleg karakter som gjeld emnet som heilskap, i tillegg til faglege spørsmål om tyngdepunkt 3 og 4. Molde har kontakt med studentane innanfor tyngdepunkt 1 og 2.

Når det gjeld spørsmål av praktisk eller formell karakter, kan du vende deg til studiekoordinator Sylvi Gulla Hovdenakk (sgh@hivolda.no, tlf. 70 07 50 15).

Omfang

Emne NO101 utgjer ein fjerdepart av årsstudiet i norsk (nordisk). Arbeidsmengda kan reknast som ein halvtidsjobb. Tek du eitt emne pr. semester, er du halvtidsstudent. Om du i tillegg ønskjer å følgje emne NO103, Tekst og struktur, er du å rekne som fulltidsstudent.

Pensum

Full orientering om pensum, arbeidskrav og eksamen får du i fagplanen, som du finn på nettet (www.hivolda.no, klikk deretter på Humanistiske fag/nettstudium).

Pensumbøkene kan kjøpast/tingast hos Studentbokhandelen i Volda (sfsbok@hivolda.no), hos Haugen Bok i Volda (www.haugenbok.no) eller der det måtte høve best for deg. Ver tidleg ute med å skaffe deg bøkene, så du har dei når tyngdepunkta tek til!

Leksjonar

Emne NO101 er sett saman av i alt 25 leksjonar som fordeler seg slik:

·        Introduksjon, 1 leksjon, ved Ann-Kristin Molde.

·        Tyngdepunkt 1: Morfologi og semantikk, 5 leksjonar, ved Ann-Kristin Molde og Leif Ramsdal.

·        Tyngdepunkt 2: Fonetikk og fonologi, 6 leksjonar, ved Ann-Kristin Molde og Peter Hallaråker.

·        Tyngdepunkt 3: Syntaks, 9 leksjonar, ved Terje Aarset.

·        Tyngdepunkt 4: Språkbruk, 4 leksjonar, ved Terje Aarset.

Vekeplanen på siste sida viser korleis leksjonane er fordelte utover i semesteret.

Som du ser i vekeplanen, får du minst to leksjonar i språk kvar veke.   

Samlingar i Volda

Det blir to samlingar i språk i Volda hausten 2006, i veke 38 (22. og 23. september) og i veke 42 (21. og 21. oktober). Undervisninga blir då fredag kl. 17.15–21.00 og laurdag kl. 10.00–14.00. Programmet for samlingane blir lagt ut i Classfronter nokre veker før samlingane.

Kollokviegrupper

Nettstudentane blir oppmoda om å ta kontakt med kvarandre på nettet ved å nytte                                        Forum eller Prat i Classfronter. Dei som bur i nærleiken av kvarandre, kan danne kollokviegrupper på heimstaden sin.

Studentar som held til i Volda-området, blir inviterte til å delta på eit lærarstyrt kollokvium torsdagar kl. 12.15–14.00 på rom 157 på Berte Kanutte-huset.

Oppgåveskriving og rettleiing

For kvart av dei fire tyngdepunkta skal du skrive ei godkjenningsoppgåve (om lag tre sider). Dette er arbeidskrav på emnet. Formålet med godkjenningsoppgåvene er at du skal arbeide aktivt med pensumstoffet, utvikle analyseteknikk og få skrivetrening.

Oppgåvene skal leverast innan fristar undervegs i semesteret. Du vil så få rettleiing av ein faglærar, og kvar oppgåve vil bli godkjend eller ikkje godkjend. Om du ikkje får godkjent oppgåva ved første innlevering, får du inntil to nye forsøk. Oppfylte arbeidskrav er eit vilkår for å få gå opp til eksamen.

Vi har stipulert arbeidsmengda i ei godkjenningsoppgåve til tre dagar. Oppgåvene blir gitt fredag morgon, og du har då denne dagen, måndag og tysdag fram til midnatt til disposisjon. Treng du helga, har du den òg. Sidan det er relativt korte fristar, er det viktig at du arbeider målretta frå starten av kvart tyngdepunkt med å lære deg fagstoffet, slik at du er best mogleg førebudd til oppgåvearbeidet.

Dersom du av ein eller annan grunn ikkje er i stand til å halde innleveringsfristen, kan du få eit par dagars utsetjing. I så fall må du ta kontakt med studiekoordinator Sylvi Gulla Hovdenakk for å gjere avtale om dette. Ta også kontakt med Hovdenakk om du på grunn av sjukdom eller andre hindringar treng lengre utsetjing.    

Studentar som ikkje er aktive frå semesterstart og leverer godkjenningsoppgåver, blir kopla av studiet etter innleveringsfristen for det andre tyngdepunktet. Det same gjeld studentar som ikkje oppfyller dei to siste arbeidskrava.

Eksamen

I slutten av semesteret kjem ein to vekers heimeeksamen. Du får to oppgåver å velje mellom. Oppgåvene kan gå på tvers av tyngdepunkta.

Oppgåva blir evaluert med bokstavkarakter. Legg stor vekt på god språkføring, for språket tel mykje for karakterar på årsstudiet i norsk.

Viktige datoar

Studiestart: 21. august

Innlevering av oppgåver til rettleiing:

Tyngdepunkt 1:            12. september 

Tyngdepunkt 2:            3. oktober

Tyngdepunkt 3:            31. oktober

Tyngdepunkt 4:            7. november

Utlevering av eksamensoppgåver: onsdag 15. nov. (med atterhald om endring)

Innlevering av eksamensoppgåve: onsdag 29. nov. (med atterhald om endring)

Sensur: veke 51

Sjå elles vekeplanen på neste side.

Ta kontakt om du har spørsmål. Vi ser fram til eit givande og inspirerande semester!