Gisle Rostvåg har eit problem: han har /å/ i namnet sitt. Kva gjer ein med æ, ø og å i internettverda? På vevstaden har Gisle lagt ut eit lesarbrev der han skriv dette: 

"Finnes det noen normer/regler for å transkribere (oversette) norske navn til engelsk? Selv har jeg en "å" i navnet mitt. Når jeg da konstruerer epostadresser og liknende, får jeg stadig dilemmaet: Skal jeg skrive "aa" eller "a" istedenfor "å". På samme måte la jeg merke til at Drøbak Bluesfestival hadde ei hjemmeside med adressa "drobak…. " - og der kom internett-trollet og tok resten av innlegget frå Gisle.

Bruk helst ae, oe og aa
Eg har ikkje kjennskap til offisielle norske reglar for omsetjing av namn frå norsk til engelsk. Vi har brukt å skrive /ae/ for /æ/, /oe/ for /ø/ og /aa/ for /å/ når det ikkje har vore muleg å få brukt våre bokstavteikn, men dette ser ut til å endre seg. Det er nokre år sia eit stort, svensk selskap tok namnet Skanska i staden for Skånska, og det verkar som dei fleste med æ, ø eller å i namna sine bruker a, o og a i epost- og internettadresser. Dette er etter mi meining uheldig. For det fyrste fører det til at bokstaven a kan stå for både a, æ og å, og samanfallet dreg forenklinga for langt og kan skapa forvirring. For det andre kan over-bruken av a gjera det vanskelegare å orientere seg på nettet for dei som er van med at vi skriv ae, oe og aa for æ, ø og å. Sist, men ikkje minst: Når ein skriv ae osv., så får ein fram - iallfall for ein som kjenner norsk - kva for lydar det er tale om. Det har ein verdi i seg sjølv.

Språkrådet går (ikkje) føre
Det beste hadde vore om folk og institusjonar som ennå ikkje har fått fotfeste i nettverda, valde den "gamle" skrivemåten. Det vil ikkje fjerne forvirringa, og det vil dessutan skapa eit skilje mellom gamle og nye nettbrukarar. Akkurat det kan nok somme vera interesserte i! Ikkje alt det gamle er godt, men i dette tilfellet synst eg det er det. Men det er vel å håpe forgjeves så lenge til og med Norsk språkråd går føre med eksempelet www.sprakrad.no... 

Jon Peder Vestad, 18.8. 1999