Møt på kulturkveld fredag 5. november!
Volda mållag held fram hausttradisjonen med å stelle til bygdakveld i ei av grendene i kommunen. I år står sentrum for tur, og fredag 5. november klokka 19.00 er det duka for kulturkveld i Samfunnshuset. Lyrikaren, songaren og målkvinna Marie Lovise Widnes skal syngje og tale for oss denne kvelden. Jostein Fet presenterer den nye boka si om folkemusikken i Møre og Romsdal, med musikk av Magnar Melle attåt. På ein slik kveld høyrer det med allsong og utlodning, forutan ei matøkt. Det er fri inngang, og me håper at medlemmer og andre kulturinteresserte møter opp. Velkomne, kjære målfolk!

Fleire medlemmer, mindre pengar
Medlemstalet til Volda mållag har auka i haust, men framleis er det mange medvitne og ihuga målfolk i Volda som ikkje er med. Noregs Mållag har telefonnummer 22 47 71 00 og epost-adresse noreg@newmedia.no, så det er enkelt å gjere noko med den saka! Volda mållag etterlyser både dei som vil stø målsaka ved å stå som medlemmer, og dei som kan tenkje seg å ta eit tak iblant for nynorsken, målføra og lokal kultur.   
Dei magre kulturløyvingane frå kommunen og bortfallet av ølpengane er merkbart for laget. Fleire framstøytar for å få det nye ølfondet til å dele ut midlar til breidda i det lokale organisasjonslivet, har ikkje ført fram. 

Jamn aktivitet i laget  
I Dravlausbygda stelte Volda mållag til kulturkvelden Nynorsk vår 1. juni. I juli møtte Anne Steinsvik Nordal for laget på landsmøtet til Noregs Mållag i Florø. På ein stand i Gatå laurdag 11. september oppmoda me folk i Volda til å velje nynorsk, me delte ut Norsk Barneblad, Dag og Tid og Norsk Tidend, og fekk sju nye medlemmer. 

Styret i Volda mållag
Leiar er Anne Steinsvik Nordal, nestleiar Ingebjørg Osdal, kasserar Ola Svein Sætre, skrivar Jon Peder Vestad, lotteriansvarleg Hilde Brænne, og Klaus Egge er styremedlem. Varamedlemmer: Astrid Gjersdal, Asbjørn Hustadnes, Odd Harald Sundal, Oddrun Torvanger og Inger Årflot. 

Vil du selje lodd?
Volda mållag sel lodd i kulturlotteriet til Noregs Mållag fram til jul. Hos Hilde Brænne (tlf 70 07 30 03) kan du få loddbøker. For kvart selde lodd, får Volda mållag ni kroner - og det er kjærkomne pengar!

Festspela treng lokale krefter   
- Vi treng Dei Nynorske Festspela som eit levande og mangfaldig uttrykk for nynorskkulturen. Det seier Anne Steinsvik Nordal i eit intervju i Norsk Tidend. I intervjuet peiker Nordal på at festspelstyret må få fleire medlemmer frå lokalmiljøet, og ho ønskjer at lokale krefter vert dregne meir med i arbeidet. 
- Ein kan til dømes engasjere songkor, ungdomslag, danselag, pensjonistlag, ungdomsklubbar, skular, barnehagar og kulturkontoret, føreslår Nordal. Volda mållag har ikkje folk i styringsorgana til festspella.

Møre folkehøgskule fylte 100 år
i haust. Volda mållag gratulerer jubilanten, som er ein av mange viktige byggjesteinar i nynorsk-Noreg.

Ivar Aasen-senteret
I Hovdebygda tek form, og me er spent på kva Ottar Grepstad og gode støttespelarar får til. Volda mållag har sendt brev til leiinga for senteret og fortalt kva aktivitetar og tilbod me håper på i det nye, viktige nynorsksenteret.   

Nynorskkurs i Volda
Kringkastingsringen - laget som arbeider for meir nynorsk i radio og fjernsyn - held kurs i Volda 3. til 5. november. Då skal kring tretti påmelde få lære meir om kringkastingsnynorsk av mellom andre Ingolf Håkon Teigene og Linda Eikrem frå NRK. Håvard Sporsheim og Jon Peder Vestad er også kurslærarar.

Vestmenn i Volda
I Volda vart det i haust starta lokallag av Vestmannalaget, Sunnmøre Vestmannalag. Laget arbeider for høgnorsk, det som ofte vert kalla i-mål eller konservativ nynorsk. Svein E. Kvamsdal er formann i laget. 

Mange lokale forfattarar i haust
Det er mange frå Søre Sunnmøre på bokmarknaden i haust. Anne Bjørkedal gjev ut romanen Dråpen og begeret, og Jan Inge Sørbø har skrive `Over dype svelg`, om samfunnsdebattanten og forfattaren Ronald Fangen. Jan Ove Ulstein gjev ut både diktsamlinga Ropet i halsen, ord på tunga, og barneboka Nåde deg, sa Espen. 
Fagbokforfattarar er det mange av i Volda, og ikkje alle kan nemnast her. Atle Døssland er medforfattar til Strilesoga. Band 4. Jostein Fet har gitt ut Folkemusikk i Møre og Romsdal, og Jostein Nerbøvik kjem med band 5 (1860-1914. Eit bondesamfunn i oppbrot) i serien Norsk historie. 
Arne Mo frå Ørsta gjev ut novellesamlinga Mannfolk, og Enok Kippersund frå Bjørke har lagt ut den interaktive romanen Eigaren på http://home.sol.no/~enkipper. Oddgeir Bruaset, med sterke band til Volda, har komme med boka Sunnmøre og sunnmøringen.
  
Mykje nynorsk på nettet
Det er ikkje lenger eit sjeldsyn med nynorsk på Internettet. Noregs Mållag har flunkande nye og flotte sider på www.nm.no, og Norsk målungdom finn ein på http://skriv.nynorsk.no (!). Om du er på utkik etter siste nytt frå nynorsk-Noreg, kan du klikke deg til www.nynorsk.no, og Kringkastingsringen finn du på www.kringkastingsringen.no. Norsk Barneblad finst på www.norsk-barneblad.no, medan "ungdomsstaden" Magasinett ligg på www.magasinett.no. Av lokale nettstader kan me nemne informasjonsstadene www.volda.org og www.volda.com, og på www.hivolda.no/jpv kan du mellom anna lese dette haustbrevet. Det siste er nettstaden til skrivaren i mållaget. Men det finst altså mykje meir!
   
JPV 29.10. 1999. Lagt ut på nettet 2.11. 1999.