Intervjutips

Intervju er ein journalistisk formidlingsmåte som kan brukast i ulike sjangrar og format. Det er også ein journalistisk arbeidsteknikk. Her er nokre tips om intervjuteknikk:

1) Unngå ja/nei-spørsmål, og bruk dei først og fremst når det er klare ja/nei-svar du vil ha.

2) Spør om ein ting om gongen. Ikkje still lange, innvikla spørsmål, og spørsmål der det er underforstått at intervjuar og intervjuobjekt veit noko som publikum ikkje nødvendigvis kjenner til.

3) Ikkje legg svara i munnen på intervjuobjektet. Det er den du intervjuar som står i sentrum, og dei svara han eller ho kjem med. Dine resonnement og moglege svar hører heime på kommentarplass.

4) Ver klar med oppfølgingsspørsmål. Dei skal passe til det som blir svart, og det er lurt å ha slike spørsmål klare - eller i allfall moment til dei.

5) Avbryt når det er nødvendig. Det er ikkje uhøfleg å avbryte nokon, men da skal det finnast ein god grunn til det. Unngå avbrott midt inne i resonnement. 

6) Skap ein god atmosfære kring intervjusituasjonen. Det er ikkje forbode å godprate med intervjuobjektet viss den du skal intervjue er nervøs. Ei god stemning kan gje eit godt intervju.

7) Orienter om samanhengen intervjuet skal brukast i, ramma kring intervjuet. Det vil ikkje seie at du skal røpe akkurat korleis spørsmåla er, men her finst det unnatak.

8) Instruer intervjuobjektet varsamt om mikrofonbruk, blikkretning osv.

9) Bruk lytting aktivt som arbeidsmetode. Ver interessert, oppmerksam, og nysgjerrig, og ikkje leik verdsmeister eller betrevitar.

10) Ver godt førebudd. Ha klart for deg kva du er ute etter.

11) Tenk gjennom rekkjefølgja på spørsmåla. Det er ofte uheldig å begynne med spesielt viktige og vanskelege spørsmål.

12) Ver sakleg. Ikkje la dine eigne synspunkt skine gjennom i måten du møter intervjuobjektet og stiller spørsmål på.

13) Ver klar over kven du intervjuar - somme toler mindre enn andre.

14) Utfør alltid intervjuet slik at du kan intervjue same person på nytt.

15) Still det neste spørsmålet - det som byggjer på påstandar eller fakta intervjuobjektet kjem med: Korfor, kva meiner du med det, kva slags følgjer meiner du dette har, korleis kan du dokumentere dette?

Av Jon Peder Vestad

Lagt ut på nettet 27. mars 2002