Merima Maja Brkic: Stans denne natta! Dikt frå Bosnia
Tenåringen Merima har skrive ei sterk diktsamling om krig og
sorg. Dikta er inderlege, klare og inntrengjande. Dette er brukslyrikk
som alle kan forstå og ta inn over seg, men i lengda kan det bli
slitsamt å lesa så mye trist... - for oss som er vane
med fred og overflod. Ei slik "luksusinnvending" kan ikkje gjera
denne diktsamlinga noko mindre verdt - på grunn av ektheit, «nerve»
og ærend.
Ingvild Røstbø Kausland: Armholemørker
Dikta i denne boka handlar om morskap og kjærleik. Somme av dikta
er fine bilde, og gjev både attkjenning, aha-opplevingar og
noko til ettertanke. Det skjer likevel berre unnataksvis for meg. I alt
blir dikta anten for spede (uklare) eller konsentrerte for meg, og heile
samlinga kan verke nærast som ein parodi på moderne lyrikk.
Det heng mye saman med oppsettet, der tekstmengda per side er temmeleg
sparsam.
Ann Kavli: Akvatinter
Diktsamling med «skulpturelle» og «synlege»
dikt. Somme av dei fengjer og har eit idé eller eit motiv
som gjev meg noko, men ein del av dikta verkar berre rare på meg.
Nokre dikt er nydelege, og til saman: mye originalt og ujamt, vil eg seia.
Helge Torvund: Umerkeleg, merkeleg
Denne diktsamlinga fall eg for. Diktaren følgjer året,
seg sjølv og livet med ord som får tankane til å
tenkje både på musikk og måleri. Og lyrikk! Dette er
dikt som har noko å formidle, om nærheit og avstand, om livet
og døden - altså om typiske emne for diktekunst. Likevel er
ikkje dette noka likegyldig diktsamling. Dikta er vakre, velutforma og
gjevande. Denne diktsamlinga passar til tonesetjing!
Jan Inge Sørbø: Den sjette timen. Bibeldikt
Dette er dikt med motiv og handlingar henta frå Bibelen. Dikta
er innhaldsrike, tek ofte overraskande vendingar til vår tid,
og er inderlege, Guds-søkjande. Somme av dei ber slamar eller
songar i seg. Dei fleste tekstane kan lesast med utbytte utan særleg
kjennskap til Bibel-tekstane forfattaren skriv over. Det er ei fin samling
dikt, rett og slett.
JPV 6/98