Sunnmørsprisen 2001 til Finn Øglænd

Forfattaren Finn Øglænd får Sunnmørsprisen 2001 for boka Dei penaste jentene på tv. Dette er ei samling dikt og tekstar som tek ungdom ved tusenårsskiftet på alvor, skriven med varme, innleving, humor og innsikt. 

I Dei penaste jentene på tv møter vi verda gjennom auga og kjenslene til ein tenåringsgut, og det på ein truverdig måte. Finn Øglænd fører lesarane inn i tenåringsverda der store og små spørsmål knytt til livet blir presentert side om side, med alvor og humor. Det meste krinsar om jenter og ein meir eller mindre oppnåeleg kjærleik, utan at emneavgrensinga gjer det slitsamt for lesarane å komme seg gjennom boka. Tvert om. Finn Øglænd greier både å finne nye og overraskande vegar inn til emnet, og han greier å få lesarane til å kjenne seg att:

Eg tenkjer at eg må gjere meg kostbar

Eg tenkjer at eg må gjere meg kostbar,

for eksempel ta ned det biletet av henne

som eg ikkje fekk før eg tigga meg til det.

Eg tenkjer at eg i det minste må ta ned

det biletet, gøyme det i ein skuff,

slutte å skrive og ringe henne

kvar dag, slutte å gå så tafatt omkring

som om det ikkje fanst anna enn henne,

nå når eg skjønar at ho ikkje er interessert.

Øglænd skriv ein naturleg og levande nynorsk, og skrivestilen er prega av forteljelyst meir enn trong til å ekperimentere eller presse endingar som rimar på dikta og tekstane. Vi finn ikkje noko påtatt ungdommeleg eller tilgjort ”moderne” over skrivestilen som kunne øydeleggje formidlinga. Den kvardagslege stilen Øglænd har valt, kler det han skriv om:

Dei kule jentene

Dei kule jentene er altfor sikre på at dei har

draget. At dei kjem til å imponere nokon.

Når du berre går forbi dei heilt likeglad,

blir dei ikkje så skuffa som du hadde trudd.

Dei går berre vidare, sikre

på at dei kjem til å ha draget på nokon.

Og brått står dei ein stad og er uimotståelege

for nokon,

akkurat som dei har trudd.

Dei penaste jentene på tv er gitt ut av Det Norske Samlaget og fortener heidersnemninga brukskunst. Sunnmørsprisnemnda til Sunnmøre Frilynde Ungdomssamlag, med Reidun Langvatn, Hilde Osdal og Jon Peder Vestad som medlemmer, takkar forfattaren for ei gjennomarbeidd og fengjande bok, og håper at ikkje berre unge gutar vil lese Dei penaste jentene på tv, men også jenter – og det i alle aldrar. Dei som har lagt ungdomstida bak seg, kan sjå at ”ungdommen no til dags” ikkje er så ulik det han var før:

Kjærleikens pølsebu

Vi står utanfor Kjærleikens pølsebu, det er

kanskje på Rudlå, vi kjøper ei kvar med alt, skal

kanskje på kino, går langs Løkkeveien, all

trafikken der. Vi nektar ikkje for at vi er ganske

lykkelege. Vi likar å gå langt og snakke om alt. På

kinoen stansar det nesten opp. Vi sit jo ikkje og

kyssar eller noko, vi følgjer med på filmen. Og så

går vi heim. Og alt er greitt på denne merkelege

måten ting er forholdsvis greie på.  

Finn Øglænd er ein av dei nynorskforfattarane som for tida gjev ut flest bøker. Han skriv i ulike sjangrar og for fleire målgrupper, og er ei viktig røyst i den nynorske bokheimen. Det er ei glede for bokprisnemnda til Sunnmøre Frilynde Ungdomssamlag å gje Finn Øglænd Sunnmørsprisen 2001 for ungdomsboka Dei penaste jentene på tv.

Av Jon Peder Vestad. Lagt ut på nettet 5. juli 2001.