Meir om radio finn de på Mål og middel
 
 

Dei siste åra er det gitt ut nokre små bøker som er veleigna som gåver til folk om er opptekne av radiomediet. Desse skriftene er ikkje så godt kjende, men vil sikkert gle radiotar og andre som er opptekne av ulike sider ved radiomediet.

Ketil Jarl Halse 
har gitt ut boka Radiojournalistikk mellom teknikk og politikk, med undertittelen Dei første radioåra (Arbeidsrapport nr. 61). Dette er ei bok om tek for seg dei utviklinga av radiomediet på 1920- og 30-talet. Halse skriv om korleis radio vart eit massemedium og korleis journalistikken fann sin plass i det nye mediet. Det er lagt mest vekt på det som skjedde i Noreg, men Halse gjev også ein presentasjon av utviklinga i USA, Storbritannia, Sverige og Danmark. Radioen fekk ulike oppgåver ulike stader - i USA dominerte " "public interest", i Storbritannia "public service" og i Noreg vart radioemediet sett som ein viktig kulturfaktor.

Ketil Jarl Halse er amanuensis ved Avdeling for mediefag på Høgskulen i Volda. Boka er gitt ut av Høgskulen i Volda og Møreforskiing Volda. Ho er på 117 sider og kan tingast frå Haugen Bok i Volda.

Lars Nyre 
har gitt ut Radioen og det lydlege. Undertittelen er Om nokre føresetnader for studiet av mediepersepsjon (Rapport nr. 34), og boka tek for seg dei soiale, sanselege og teknologiske rammene som finst for radiolyttinga. Nyre har ei fenomenologisk tilnærming til emnet, og legg vekt på kroppslegheit, sansing og språk. Her ser han på lydlege sider ved produksjon av radioinnhald og formidling gjennom radioen, og kva rolle lyttinga har i forståinga. I boka syner Nyre kva nytte ein kan ha i mediefag av å utforske den språklege og kulturelle verda blir utforska på. 

Lars Nyre er stipendiat ved Avdeling for mediefag på Høgskulen i Volda. Boka er gitt ut av Institutt for medievitskap ved Universitetet i Bergen. Ho er på 150 sider og kan tingast frå Institutt for medievitskap, Universitetet i Bergen, Fosswinckelsgate 6, 5007 Bergen.   

Ord og uttrykk i norsk radiojournalistikk 
(Arbeidsrapport nr. 59) er ei samling av faguttrykk knytt til radiomediet. Kring 1150 ord er samla og forklart i denne boka, som er den fyrste av sitt slag for radiomediet i Noreg. Føremålet med ordboka er dels å forklare uttrykk som blir brukt i radioarbeid, dels å dokumentere fagspråk knytt til radiomediet. Somme av faguttrykka er standardiserte faguttrykk, medan andre er meir uformelle omgrep brukt i ulike radiomiljø. Boka inneheld også tilleggslister. Ei inneheld uttrykk knytt til amatørradio, piratradio, radiolytting som hobby (DX-ing) og anna medieverksemd enn kringkasting, ei anna gjeld organisasjonar og institusjonar i medie-Noreg. Til sist er om lag 130 faguttrykk frå norsk journalistikk forklart.    
Boka er skriven av Jon Peder Vestad (ja da, inhabil til tusen!) og gitt ut av Høgskulen i Volda og Møreforsking Volda. Ho er  på 104 sider, og kan tingast frå Haugen Bok i Volda.  

Av Jon Peder Vestad. Lagt ut på nettet 10.11. 1999.