I august kom det ut ei forvitneleg bok på Norsk Bokreidingslag. Boka er ein biografi om dr. Georg J.J. Sauerwein, fødd i Hannover i 1831 og død i Kristiania i 1904.

Boka kom ut til det tredje internasjonale Sauerwein-symposiet på Dovre, der Sauerwein budde til saman sju år i tidsrommet 1881-1904. Han var på leit etter noko opphavleg, og tykte han fann det i fjellbygda og dølamålet. Frå Noreg kunne han dessutan føre striden for dei litauiske og sorbiske minoritetane i det tyske keisarriket utan sensur og avgrensa ytringsfridom. Sauerwein kjende fleire personar knytt til landsmålsrørsla, m.a. Ivar Aasen, Hans Ross, Matias Skard, Moltke Moe, Aasta Hansteen og Torleiv Hannaas.

Av kapitla kan nemnast: Språkgeni i strid for morsmålsretten, Sauerwein i Norden, Sauerwein i Noreg, Jørn Tyskar på Dovre, Sauerwein og norsk målstrid, Kristiania - "den lille by af store gadegutter" ... I 1885 gav Sauerwein ut samlinga "Frie Viso ifraa Vigguin sungje i Nørdre-Gudbrandsdalsk Dølamaal", dedisert "Aat Nestore iblandt Norske Sprokmeinnom, Symra-Skalde Ivar Aasen".

Boka er utgjeven med stønad frå m.a. Institusjonen Fritt Ord, Noregs forskingsråd, Norsk kulturråd og Longvafondet.

Oskar Vistdal:
Georg Sauerwein - europear og døl. Ein dokumentasjon
573 sider. 
Norsk Bokreidingslag 

Motteke frå Gudmund Harildstad, 29.9. 2000