|
Klart for befalsopptak
Måndag startar opptaket til befalsskulane i Forsvaret. I år er det fyrste året at fleire skular har opptak saman. Målet er at dette skal effektivisere prosessen, og kome søkjaren til gode.
Av Åge Andre Breivik, Forsvarets mediesenter
KREVJANDE: Kandidatane skal gjennom både fysiske og psykiske testar på Kjevik dei neste tre vekene. Arkivfoto: Arne Flaaten, FMS
I år er både Luftforsvarets Befalsskule (LBSK) på Kjevik, Forsvarets skole i etterretning og sikkerhet (FSES) og Hærens Ingeniørskole (HIS) samla på Kjevik til inntak. Dei vel 500 søkjarane skal gjennom tre veker finne ut om dei er kvalifiserte til å kome inn på desse skulane.
Fleire alternativ
For å sikre effektiviteten rundt opptaket av befalselevar er det no bestemt at ein skal samle opptaket på ein plass.
- På denne måten kan ein gje eit betre og breiare tilbod til søkjarane, seier kaptein Kim Gulbrandsen ved marknadsavdelinga til Forsvarets mediesenter. Han legg til at dersom ein søkjar manglar kvalifikasjonar for å kome inn på ein av skulane, kan han berre gå ned i gangen til neste skule.
Kvar av søkjarane får nemleg søkje på fleire skular, i prioritert rekkefylgje. Med fleire skular på same opptaket kan altså alle skulane sine opptaksintervju gå føre seg i same bygget.
Over 500 kandidatar
Kjevik er leiren som har fått oppdraget med å vere vertskap for denne seleksjonsprosessen. Alle dei naudsynte fasilitetane er på plass, og no ventar innrykket av vel 500 håpefulle kandidatar neste veke.
I samband med opptaket skal Dagbladet fylgje tre framandkulturelle søkjarar i prosessen. Dagbladet hadde ein liknande reportasjeserie då politiskulen i Oslo i vår hadde inntak. Der fylgde ein to framandkulturelle søkjarar under trening og førebuing, samt opptaket. Båe elevane kom inn på skulen, og vil truleg verte fylgde av Dagbladet også framover.
Dagbok på internett
Forsvaret skal delta i det same konseptet, og på denne måten skildre søknadsprosessen og opptaket med søkjarane sine eigne ord og opplevingar.
- Tanken bak det å delta er mellom anna å avlive ein del myter rundt det å vere framandkulturell i Forsvaret, seier Gulbrandsen (biletet). Dei framandkulturelle er nemleg ein viktig ressurs for Forsvaret, legg han til.
- Det er ikkje særleg spesielt at framandkulturelle søkjer seg til befalsskulane, og det vil me setje søkjelyset på, seier kapteinen. Dei tre søkjarane skal fortelje om sine opplevingar undervegs, for å vise korleis opptaket fungerer. Kandidatane vil ha dagbok på Dagbladet sine nettsider, der opplevingane vil kome ut frå måndag i neste veke.
Klargjer til befalsskule
Gjennom sitt prosjekt tidlegare i år drog politiet mykje god respons, og det var difor Forsvaret også gjekk inn for dette.
- Kandidatane vil ikkje få noko spesiell behandling, men vil vere med på alt som dei andre er med på. All kontakt med Dagbladet vil kome i tillegg til den ordinære tenesta i perioden, seier kaptein Gulbrandsen.
Inntaket til befalsskulane startar allereie sundag, men i motsetnad til tidlegare år, då opptaka har vart i seks veker, har ein i år planlagt at det berre skal ta tre veker. Deretter er kandidatane klare til eit år på befalsskule.
|
|
