|
Fyrste ubåtøving med ny fregatt
Ubåten KNM Uredd er på øvingsveke saman med andre norske marinefartøy. Den nye fregatten KNM Fridtjof Nansen skal øvast mot alle tenkelege truslar. Mest frykta av alle er ubåten med det klingande namnet Uredd.
Av Kapteinløyntnant Nils Nordstrand, skipssjef KNM Uredd (tekst og foto)
| | STRIDSKLARE: Alle våpen og sensorsystema til ubåten er bemanna og alle er klare til innsats. |
I sør skrik sonarane håst om bord på KNM Fridtjof Nansen og den gamle fregatten KNM Narvik. Det har dei stort sett gjort heile ettermiddagen og kvelden.
Sonaroperatørane om bord på Uredd har hatt stort fokus retta mot Nansen og brukt all ledig tid på vakt til å analysere lydane frå sonar. Sensoroffiser Husby var fyrstemann til å høyre sonaren til Nansen om bord på Uredd. Han har alt gjort seg nokre tankar om kva som skil den frå Narvik sin.
Gode ører
For eit utrent øyre kan dei høyrast ganske like ut, men ikkje for Husby. Han veit at det er han og sonaren som faktisk styrer den grøne torpedoen som går lydlaust mot målet sitt der i sør. Eller i alle fall hadde vore på veg dersom det ikkje var ei øving.
I sentral er angrepslaget på plass. Våpen- og sensorsystema er bemanna og operatørane arbeidar konsentrert for å skaffe tilstrekkeleg informasjon for å styre torpedoen mot måla.
KNM Fridtjof Nansen har prioritert. Dei nye fregattane representerar eit skifte i norske sjømilitære kapasitetar. Fregatten er ikkje berre eit einskild fartøy, den er eit kompleks våpensystem som må bort dersom ubåten Uredd skal løyse oppdraget sitt.
Som katt og mus
Uredd har alt lurt seg forbi både maritime patruljefly og helikopter, men må fjerne Nansen skal den lykkast å trenge seg inn i dei norske fjordane. Der inne kan ubåtane operere aleine i vekevis utan å bli oppdaga. Ingen andre nasjonar er i stand til operere ubåtar i slike områder.
Våpenoffiser Tronrud står i torpedorommet. Den fyrste torpedoen har han alt skote mot Nansen, den neste skal mot Narvik. Torpedorøyret er vassfylt og bauglemen er open. Med eit bestemt slag med handflata fyrar Tronrud den andre torpedoen, vel vitande om at våpenet han sender ut er det mest effektive i heile det norske forsvaret.
| | AVFYRING: Det er et krafteg slag med håndflata til Våpenoffiser Tronsrud som sender avgarde torpedoen mot målet. |
Manuell avfyring
Til tross for ein båt fullstappa av elektronikk, hydrauliske og mekaniske system, vert sjølve fyringa gjort manuelt. Det sikrar at ingen datavirus eller tekniske feil kan sende den dødelige torpedoen på veg mot eit tilfeldig, uskuldig offer på havet.
I maskinrom arbeider elektrikar Hilleren hektisk med å stenge igjen skrogventilar. Trykkbølgja som spreier seg i sjøen når torpedoen eksploderar og skroget til fregatten kollapsar, kan skade systema om bord på Uredd.
Satsar på Sjøforsvaret
Sjøvassventilane vert difor stengt igjen. Her tel tempo og presisjon og Hilleren veit godt at bidraget hans kan vere avgjerande for at Uredd kan løyse oppdraget.
Elektrikaren gjennomførte fyrstegongstenesta si på ein annan ubåt av same klasse, og lika seg så godt at han tok ekstra utdanning for å kvalifisere seg for ei stilling om bord som befal. No ser han for seg ei karriere i Sjøforsvaret.
| | LAV ÅLING: Det er ikkje alle skrogventilane i ein ubåt som er like lette å komma til |
Simulerer treff
Våpensystema i sentral syner tydeleg korleis torpedoane går mot måla sine. For å sikre maksimal overrasking og effekt blir torpedoane styrt slik at dei treff måla samstundes. Sonaroperatøren simulerer lyden av stål som blir vrengt og skott som kollapsar på grunn av det auga vasstrykket på veg ned mot havbotn.
Skipssjefen tar båten opp til periskopdjupne. Det er viktig å evaluere skadane som torpedoane har gjort. Fyrste anti-ubåt øving, eller casex på fagspråket, byrjar snart og Uredd skal koordinere med Fridtjof Nansen i forkant.
Angrepslaget var berre ei intern øving om bord på Uredd. No byrjar sjølve øvinga og testane av dei nye våpensystema. Om bord på Fridtjof Nansen er dei lukkeleg uvitande om øvinga om bord på Uredd nede i havdjupet.
|
|
