|
Framleis alvorleg for gasten
HAAKONSVERN: Tilstanden for gasten som vart funnen i sjøen ved Haakonsvern for ei veke sidan var fredag føremiddag framleis alvorleg, men stabil.
- Tilstanden for gasten er framleis alvorleg, men stabil, fortel Oddgeir Nordbotten, skvadronsjef for 22. MTB-skvadron.
(Foto: Endre Hopland)
Av Katrine Gramshaug, Kysteskadren
Mannskapet på MTB-en som 19-åringen høyrde til har hatt tilnærma normal aktivitet denne veka, men har heile tida vore orientert om tilstanden til kameraten.
- Me har hatt tett kontakt med familien denne veka, fortel skvadronsjef på 22. MTB-skvadron, Oddgeir Nordbotten. I tillegg til at fleire av skipskameratane til den skadde har vore på vitjing på sjukehuset, har også familien til 19-åringen vore på Haakonsvern fleire gonger den siste veka.
- Støttelaget har følgt opp dei mannskapane som var tettast på hendinga og har også hatt samlingar for alle, fortel Nordbotten. Mannskapet har fått jamlege orienteringar om kva tilstanden til skipskameratene har vore.
Trass i at ulykka har prega aktivitetane til 22. MTB-skvadron denne veka har dei også gjennomført mest mogleg av den normale aktiviteten. - Me skal snart ha generalmønstring og har arbeida hardt for å gjera fartøyet klart til det, seier Nordbotten.
Det var vakthavande befal som ved 0510-tida fredag 9. mai merka at den menige skiltvakta var borte og starta straks søk etter han. 19-åringen vart funne i vatnet ca 10 minuttar seinare. Mannskapet starta straks opplivingsforsøk og fekk varsla Alarmsentralen på Haakonsvern. Mannskap frå Brannstasjonen på Haakonsvern, var i tillegg til Luftambulanse og ambulanse raskt på staden og fortsette behandlinga før gasten vart frakta til Haukeland universitetssjukehus.
Tilstanden på 19-åringen har av intensivavdelinga på Haukeland universitetssjukehus heile veka vore vurdert til å vera alvorleg, men stabil. Slik var også situasjonen fredag formiddag.
Laksevåg lensmannskontor er no foreløpig ferdig med å etterforska saka og avventar eventuelt vidare etterforsking til granskingskommisjonen som er satt ned av Kommandøren for Sjøstridskrefene er ferdig.
- Det er ikkje noko som tyder på at det har skjedd noko straffbart eller at det har vore svikt i rutinane ved basen. Rutinane ser ut til å vera følgt, uttaler politioverbetjent Tore Salvesen ved Laksevåg lensmannskontor.
|
|
