|
Heidra med fortenestemedalje i gull
HAAKONSVERN: Onsdag blei dykkarlege Svein Eidsvik heidra med H. M. Kongens fortenestemedalje i gull for sin enorme innsats i norsk dykkarmedisin.
HEIDRA: Kommandørkaptein Svein Eidsvik (til høgre) var tydleg stolt over å motta fortenestemedaljen i gull av fylkesmannen i Hordaland, Svein Alsaker.
Av Vidar Hope og Magne Åhjem (foto)
Sidan Svein Eidsvik blei tilsett som lege i Marinen i 1973 har den noverande kommandørkapteinen sett store spor etter seg. For utan å vera sentral i oppbygginga av ein moderne militær dykkarteneste, har Eidsvik også gjort ein stor innsats retta mot all dykkarverksemd i det sivile samfunnet.
Heidra æresgjesten
Onsdag kunne ein tydleg rørt Eidsvik ta i mot gullmedaljen av fylkesmann Svein Alsaker ved UVB-senteret på Haakonsvern.
- Det sivile samfunnet har nytt godt av din kompetanse og erfaring på svært mange område. Dette gjeld blant anna av dykkarskadar, rådgjevnad, utarbeiding av offentlege forskrifter og prosedyrar for ervervsmessig dykking i Norge, utarbeiding av dykketabellar og vurdering og gransking ved sivile uhell og ulukker, sa Alsaker under sin tale til Eidsvik.
Eidsvik sitt engasjement i offshoredykkarane sine helseproblem i samband med dykking ved oljeinstallasjonane i Nordsjøen vart også nemnd i talen.
- Eg trur det er dekning for å seia at Eidsvik og hans kontor har vore eit kompetansesenter for all dykkarverksemd i landet vårt, fortalde fylkesmannen til heidersgjesten.
- Ein institusjon i Marinen
Hovudpersonen sjølv ser helst at fortenesta blir delt med dykkarmiljøet i Bergen.
- Det var svært hyggeleg å få denne medaljen, men eg trur at den kanskje var litt feiladressert. Heile det solide, faglege og gode miljøet i Bergen fortener denne medaljen. Men eg fekk vel den fordi at eg er eldst, seier ein beskjeden Eidsvik og legg til at han deler medaljen med Universitetet, Haukeland, Statens dykkerskole og Norsk undervannsinstitutt.
- Dette er ein markering til heile det dykkarmedisinske miljøet, seier han.
Også sjefen for saniteten i Sjøforsvaret, kommandør Jan Sommerfelt Pettersen, vil trekkje fram Eidsvik som ein svært viktig frontfigur gjennom 31 år i Marinen.
- Eg vil seia at Eidsvik er ein institusjon i Marinen innan sitt fagområde dykkarmedisin. Marinen fekk sin første dykkarlege i 1953, Eidsvik blei tilsett 20 år seinare og er i teneste enno. Han har dermed vore dykkarlege i over halvparten av stillinga si levetid, seier han.
Tek vare på folk
- I tillegg har han vore eit sentralt punkt i saniteten. Han er ein me alltid kan henvende oss til. Ta til dømes den såkalla ”Eidsvik-effekten” som me jobbar med å utvikle vidare. Den går ut på å ta skikkelig vare på folk uansett, når som helst. Eidsvik har alltid vore tilgjengeleg for folk. Når han har bestemt seg for noko, så fiksar han det, fortel Sommerfelt Pettersen.
”Eidsvik-effekten” blir no vidareført til Haakonsvern legesenter og skal vera ein institusjon for mannskapa og deira pårørande. Men Eidsvik er også ein viktig person for alle dykkarar i Norge, også dei sivile. Det har han prova spesielt når ulukker har oppstått.
- Eg vil framheve at når uhell skjer viser Eidsvik ein spesiell og eineståande evne til å handtere dykkemedisinske problemstillingar på ein fagleg utmerka måte. Han går grundig gjennom alle sider ved eit uhell, og går aldri av vegen for å ta opp eventuelle problem og prosedyrefeil som kan vera av betydning, seier Alsaker og legg til at det var ein glede og ære å overrekke fortenestemedaljen i gull.
|
|
