|
Minedykkarane smelte til på Island
Minedykkerkommandoen har uskadeleggjort terrorbomber saman med amerikanarar og britar. - Denne øvinga var svært viktig og reell opp i mot dagens mineoperasjonar.
USKADELEGGJER BOMBER: Operatørane fekk bryne seg på utfordrande oppgåver under øvelse "Northern Challenge". (Foto: Minedykkerkommandoen)
Av Vidar Hope
Dette meiner sjefen for Minedykkerkommandoen (MDK), orlogskaptein Morten A. Høvik. Øvelse ”Northern Challenge” på Island blei svært viktig trening for Minedykkerkommandoen sine seks deltakande operatørar. Fire svært aktive døgn med uskadeliggjering av terrorbomber har gjort meirsmak for dei norske minedykkarane, som ynskjer å melde seg på også til neste år.
Den årlege Nato-øvinga ”Northern Challenge” blei arrangert av den islandske kystvakta og deira dykke- og eksplosivryddelag frå måndag til torsdag i førre veke. Islendingane blei støtta av stabspersonell frå Norge, Storbritannia og USA. På deltakarlista stod hær- og marinerepresentantar frå USA, Danmark, Storbritannia, Norge og Island.
- Den mest effektive øvinga
Målet med øvinga var å uskadeleggjere terrorbomber som i all hovudsak låg på landsida.
- Trusselen var retta mot baser og infrastruktur som er av kritisk karakter, dette inkluderar blant anna oljeterminalar og fartøy, forklarer Høvik som legg til at dette er den mest effektive øvinga han har delteke i på fleire år.
TRANSPORT: Minedykkarane og tenestebilen blei transportert i eit av Forsvaret sine Hercules-fly. (Foto: MDK)
- I praksis var me i full aktivitet frå klokka sju om morgonen til nærar to om natta, så det blei tøft for oss. Me handla innan eit komplekst området og fekk verkeleg testa motivasjonen, seier han. Norge deltok med fattige sju representantar, inklusivt to stabsoffiserar, men Høvik er likevel trygg på at dei rette operatørane har fått med seg viktig erfaring.
- Nøkkelpersonane stilte jo. No har me eit godt grunnlag for å øve vidare og ikkje minst til å tilrettelegge for andre, meiner han.
Afghanistan- og Irak-bomber
”Northern Challenge” fann stad på den amerikanske Keflavik-flybasen. Basen er litt større enn Marinens hovudbase i Bergen og rommar heile 4 500 personar. Fleire av dei britiske og amerikanske deltakarane drog umiddelbart til internasjonal teneste etter øvinga. I følgje Høvik blei det trena på scenario som dei allierte har opplevd det siste året.
- Me haldt fokus på dei bombene som er blitt brukt i høvesvis Afghanistan og Irak, seier han.
Flesteparten av dei 40 deltakande personane på øvinga har erfaring frå skarpe internasjonale operasjonar. Nivået på det norske mannskapet blei tidleg akseptert.
- På trass av moderat øvingsnivå før ”Northern Challenge”, så ligg me tilnærmingsrikt like langt framme som dei andre, seier minedykkarsjefen.
- MAKSIMALT UTBYTTE: Minedykkarsjef Morten A. Høvik har ikkje opplevd ei så effektiv øving på fleire år som på Island i førre veke. (Foto: Vidar Hope)
- Me kan bli betre
Høvik trur også at Norge ville hatt godt av å ”adoptere” ei liknande øving til internt bruk.
- Det er viktig for Marinen å være i stand til å takle denne asymmetriske terrortrusselen. Det er etter mi meining den mest aktuelle problemstillinga når det gjeld trussel mot eigne fartøy, seier han.
- Me har ressursar i Marinen på denne sida, men eg ser behovet for å intensivere samtrening. Me held eit høgt nivå, men me kan alltid bli betre, meiner han.
Men Høvik kjenner seg tryggare i Norge enn lengre sør på kontinentet.
- Sjølv om ein er i venlegsinna hamner og land er det ein terrortrussel til stade. Dette er meir aktuelt i sør, i kjerneområdet for Nato, enn det er heime. Og dei enklaste måla vert tatt først. Me skal ikkje vera det enklaste målet, slår han fast.
|
|
