|
Budd for Middelhavet
BERGEN: – Dykk er vel budd på oppdraget, og dykk har regjeringa og folket i ryggen, sa forsvarsminister Anne-Grethe Strøm Erichsen til personellet frå 22. MTB-skadron som bur seg på FN-oppdrag i libanesiske farvatn.
Av Frank Rosvoll
og Torgeir Haugaard (foto), Forsvarets mediesenter
| | SJØFOLK I KAKI: Når Sjøforsvarets personell skal tenestegjere i subtropiske farvatn, er det i kakiuniform. |
Forsvarsministeren tok seg god tid til å prate med einskilde bland personellet som var oppstilt inne på Haakonsvern i dag, i anledning avreisa til Frankrike i morgon. Der skal dei delta i ei sertifiseringsøving for Natos reaksjonsstyrkar, ”Brilliant Midas”, som finn stad i Middelhavet.
| | LEIAR SKVADRONEN: Orlogskaptein Narve Nordanger og 22. MTB-skvadronen er budd for tenesta som ventar aust i Middelhavet. |
Nyttar øvinga i oppkjøringa
– Me skulle uansett ha vore med på denne øvinga, men me nyttar den også som ledd i førebuingane til deltakinga i den maritime FN-styrken som er under skiping lengre aust i Middelhavet, seier orlogskaptein Narve Nordanger, som leiar 22. MTB-skvadron.
Han legg til at øvinga gjev anledning til å trene på moment som kan syne seg relevante i høve til FN-tenesta i dei libanesiske farvatna. Både sjefen sjølv og mannskapa er klare for å starte på jobben med å bidra til stabiliteten i Midt-Austen.
– Ein vil alltid kunne sjå ting som kunne vore enda meir finpussa, men me er no så klare som me kan vere, seier han.
Viktig å følgje opp på heimebane
Johannes Helgesen er marineprest og skal vere med skvadronen ned til tenesta som ventar mannskapa. Han seier at det er ei klar målsetting at soldatane skal kome godt i gjennom oppdraget, og at dei skal ”lande trygt” når dei kjem heim.
– Ikkje minst er det viktig for Forsvaret å følgje opp dei pårørande, familiane der heime. Det er viktig for mannskapane å vite at dei heime har det bra. Samstundes er det viktig at me sørgjer for at dei pårørande er informert om korleis dei som skal tenestegjere har det. Dette heng sjølvsagt saman, seier Helgesen.
|
|
