|
Drypande ferske livreddarar
RENA: For å auke vernebuinga i tilfellet ulukker har Forsvaret no utdanna eigne redningsdykkarar. I går fekk dei nye livreddarane det hektisk då kurset vart avslutta med ein eksamen.
Av Thomas Gramstad og Jon Anders Skau (foto), Forsvarets mediesenter
| | I VATNET: Hæren sine nye redningsdykkarar hadde ein avsluttande prøve i går. Den besto dei med glans. |
I samarbeid med Falck Aak Rescue og Falck Nutec har Hæren arrangert eit ni dagars langt kurs for dykkarar i forsvarsgreina. Målet var å skolere dei for å kunne handsame ulukker kor personar hamnar i vatnet.
Eldprøve i vatnet
Dei ti nyutdanna redningsdykkarane er meinige, grenaderar og befal stasjonerte i heile landet. Under rettleiing av to instruktørar frå Falck Aak Rescue har dykkarane trena på alle moglege situasjonar – alt frå kjøretøy som hamnar i vatnet til personsøk.
– Redningsdykkarane har kompetanse til å drive søk på ei rekkje område, mellom anna i elver og i islagte vatn, fortel løytnant Anders Bjørkheim ved Hærens våpenskole.
Og det var ikkje mangel på nett kompetanse då dykkarane hadde ein avsluttande prøve på Rena i går. I alt tre personar var hamna i vatnet. Ein var fanga inni ein bil på havsens botn.
– Øvingane er svært realistiske. Dykkarane er alltid letta og nesten rørte når dei finn og reddar markørane, seier Bjørkheim.
I laupet av få minutt var situasjonen under kontroll. Alle vart redda og eksamen var bestått.
| | NØGD: Løytnant Anders Bjørkheim er særs nøgd med innsatsen til dykkarane. |
Meir enn berre dykking
Kurset, som gjekk over ni dagar, fann stad i Bergen og på Rena i Hedmark. Forutan å øve i vatnet, har deltakarane hatt førelesningar med krisepsykologar og rettsmedisinarar. Redningsdykking handlar vel så mykje om psyke som dykkarferdigheiter.
– Det er viktig at mannskapet kan takle usikkerheit, psykisk stress og andre sine reaksjonar på ein skadestad. Forsvaret har tidlegare nytta skipsdykkarar til redningsoperasjonar i vatnet – utan at dei hadde vorte trena på desse momenta, seier Leif Linde, dagleg leiar ved Falck Aak Rescue.
I laupet av halvanna minutt skal redningsdykkarane vere klare til å hoppe i vatnet for å yte bistand – til militært personell så vel som sivilistar. Det gjer dykkarane etterspurte. 
| | REDNING: Redningsdykkarane fekk i laupet av kort tid henta opp alle frå det kalde vatnet. |
Ettertrakta vare
Det er liten tvil om at dei nye redningsdykkarane er ein naudsynt kapasitet. Til vanleg er det brannvesenet sine dykkarar som rykkar ut til ulukker. Ingeniørdykkarane i Hæren, som elles driv arbeid for Forsvaret, skal no stå på vernebuing og er klare til å aksjonere viss det er naudsynt. Men førebels er det ikkje teke stilling til korleis desse livreddarane skal verte disponerte av Forsvaret.
– Det kan eg ikkje svare på. Men eg skal i alle fall gjere mitt for at fleire dykkarar i Forsvaret får denne utdanninga, lovar løytnant Anders Bjørkheim.
|
|
