|
Sørgjer for kanonfeiringar
Då folk reagerte på slurvete saluttering i samband med feiringa av prins Sverre Magnus sin fødsel, var det nok. No blir personar tilknytt Forsvaret sende på saluttkurs.
Av Thomas Gramstad, Forsvarets mediesenter og Vegar Schwartz (foto), HV-staben.
| | KURS MED FUTT I: 36 personar med tilknytning til Forsvaret var med på kurset som vart heldt fredag og laurdag førre veke på Kongsvinger. |
Det første kurset vart heldt i fjor av Artilleriets offisersforening. Fredag og laurdag i førre veke small dei gamle kanonane nok ein gong i Kongsvinger.
– Ein stor suksess, meiner kursleiar Svein Rune Hoksrød.
Forsvaret tek over
I år som i fjor var det 36 personar som gjennomførde saluttkurset. Dei fleste deltakarane er anten vernepliktige eller offiserar i Heimevernet. Forsvarssjefen har bestemt at Forsvaret er ansvarleg for saluttering på seksten av festningane rundt omking i landet. Dermed tek dei over for ulike foreiningar som sjølv har drive saluttering på festningar utan militært nærvær.
– Heimevernet har ansvaret for ti av festningane, medan Sjøforsvaret og Hæren skal sørgje for saluttering på høvesvis fire og to festningar, seier Hoksrød.
| | TRADISJONAR: Ifølgje Svein Rune Hoksrød dreier saluttering seg om århundrelange tradisjonar. Likevel vert det lagt stor vekt på tryggleik under kurset. |
Salutteringa følgjer dei offisielle flaggdagane og viktige storhendingar, og er tufta på gamle tradisjonar. Men det er ikkje heilt ufarleg å vere kanonoperatør.
Erfaring og teori
Med artillerioffiserar som instruktørar og ein lege klar til aksjon, fekk dei 36 deltakarane ei grundig innføring i bruken av dei gamle festningskanonane. Tryggleika har alltid høgaste prioritet.
– Med den førre ordninga, då diverse foreiningar skaut med desse kanonane, var trykkleiken ikkje god nok. Men no får vi folk som er trena til å handsame ordentlege salutteringar, fortel Svein Rune Hoksrød.
Det trengs to eller tre personar for å avfyre saluttar med festningskanonane. Éin har i oppgåve å telje kor mange skot som er blitt avfyrte. Ifølgje Hoksrød er den kongelege salutten på 21 skot den vanlegaste og det er ein slik som vert gjennomført 17. mai.
|
|
