|
Travelt for 330-skvadronen
Sumaren er tradisjonelt ei travel tid for mannskapa i 330-skvadronen. 2007 har ikkje representert noko unnatak for skvadronen med redningshelikoptra.
Av Frank Rosvoll, Forsvarets mediesenter
| | HEKTISK SUMAR: Oppdraga har omtrent stått i kø for mannskapa i 330-skvadronen. Foto: Luftforsvaret. |
– Sumaren i år er kjenneteikna av ei uvanleg stor mengde oppdrag, seier oberstløytnant Rolf Folland, sjef for 330-skvadronen.
Arbeidsmengda hos mannskapa i skvadronens fem Sea King-helikopter er på sett og vis omvendt proporsjonalt med vanlege folk i ferietida.
Stor pågang
Når andre nordmenn tek sumarferie og utanlandske turistar vitjar Noreg, veit redningstenesta at det blir ekstra mykje å gjere for dei.
– Kort fortalt er det langt fleire som ferdast på fjellet og på sjøen. Det har stor påverknad på skvadronen sitt aktivitetsnivå. I år har vi hatt ekstremt mange oppdrag slik eg vurderer det, seier Rolf Folland.
Redningsoperasjonane i sumar
Eit utal av søkje- og redningsoperasjonar og ambulanseoppdrag knytt til båt- og bilulukker har verkeleg gjort sitt til ein travel sumar for mannskapa til Folland. Skvadronen har fem helikopter i beredskap – kvar med eit mannskap på seks mann.
Oppdrag frå 1. januar til 7. august:
SAR er search and rescue (søk og redning) og AMB er ambulanse.
Sola: SAR 128, AMB 81
Rygge: SAR 84, AMB 12
Bodø: SAR 43, AMB 122
Ørland: SAR 69, AMB 115
Banak: SAR 25, AMB 104
Oppdrag frå 1. juni til 7. august:
Sola: SAR 43, AMB 30
Rygge: SAR 36, AMB 8
Bodø: SAR 25, AMB 41
Ørland: SAR 29, AMB 48
Banak: SAR 12, AMB 45
330-skvadron
Luftforsvarets operatør av redningshelikoptre. Primæroppgåvene er å gjennomføre søk- og redningsoppdrag i tillegg til ambulanseoppdrag.
Skvadronleiinga er lokalisert på Sola flystasjon.
Skvadronen har fire avdelingar plassert på følgjande basar: Banak, Bodø, Ørland og Sola. I tillegg finnes det eit detasjement på Rygge.
330-skvadronen sine oppgåver:
– redningsteneste
– ambulanseflyging
– katastrofehjelp
– spesialoperasjonar
|
|
