|
Nye feltuniformer bestilte
Hæren skal ha nye feltuniformer, og har nett hatt ute eit anbod på desse. No har Helly Hansen fått tilslaget på å produsere membranuniformene.
Av Åge Andre Breivik, Forsvarets mediesenter
MEMBRANUNIFORMER: Spesialstyrkane til Forsvaret har allereie teke uniforma i bruk. Her Hærens Jegerkommando under Joint Winter 2004. Arkivfoto: Torbjørn Kjosvold, Forsvarets mediesenter.
Spesialstyrkane i Forsvaret har brukt membranuniformer i fleire år, og den modellen som no er bestilt til Hæren er same typen som spesialstyrkane har brukt siste åra. Produksjonen av uniformene har no vore ute på anbod, og til slutt var det Helly Hansen som fekk tilslaget.
Beste tilbod
- I utgangspunktet skulle alle i Hæren ha denne uniforma i løpet av 2004, men av ymse årsaker er dette forseinka, seier Thrude Leirvik i Forsvarets Logistikkorganisasjon/Intendanturavdelinga. Ho kan fortelje at Helly Hansen hadde det beste tilbodet både når det gjaldt kvalitet og pris.
MANGE MED BOD:
Det var 14 selskap som var inne med anbod på uniformene
Høve til utviding
- Denne typen uniform har vore ute på anbod ein gong tidlegare, då spesialstyrkane til Forsvaret fekk nye uniformer i 2003, seier Leirvik. I tillegg til i overkant av 10000 uniformer skal Helly Hansen levere om lag 3000 varmedressar til Forsvaret, alt til ein verdi av om lag 23 millionar kroner.
Kontrakten som Forsvaret no har med Helly Hansen er ei treårskontrakt, med høve til utviding i ytterlegare to år.
- Det er ikkje dagleg kost for oss å få så store kontraktar, seier Tor Willy Nilsen i Helly Hansen. Dei satsar sterkare på arbeidsklede no, og har kjempa for å kome seg attende til å få levere til Forsvaret.
I utvikling
- Dei er ute etter teknisk avansert utstyr, så det er heilt klart ein krevjande kunde, seier Nilsen. Kontrakten dei no har med Forsvaret er ikkje dagleg kost, men likevel har Helly Hansen hatt liknande før.
- Me leverte uniformer til alle dei frivillige tilsette ved dei olympiske leikane på Lillehammer i 1994, og har i tillegg levert redningsdrakter til Statoil, avsluttar Nilsen, som meiner Helly Hansen utviklar seg på grunn av utfordringane rundt kontrakten med Forsvaret.
Kontrakten mellom Helly Hansen og Forsvaret inneber:
- 10 000 feltuniformer (levering i 2004)
- 3 000 varmedressar (levering i 2004)
- Høve til utviding i to år etter treårsperiode.
|
|
