Luftkrigsskulen i Trondheim ynskjer ei meir forskingsbasert undervisning, og har i den samanhang inngått ei avtale om samarbeid med forskingsgiganten SINTEF.

Av Frank Rosvoll, Forsvarets mediesenter

MEIR FORSKINGSBASERT: Framtidas kadettar ved Luftkrigsskulen vil få høve til å samarbeide med SINTEF.(arkivfoto)

Luftkrigsskulen i Trondheim meiner forsking og utvikling er sentralt i utviklinga av fagmiljøa innan luftmakt og luftmilitært leiarskap. SINTEF (Stiftelsen for industriell og teknisk forskning) i Trondheim har 1700 tilsette, og driv oppdragsforsking ved å finne intelligente og lønsame løysingar for kundar i næringsliv og offentleg forvalting. SINTEFs hovudsete er i Trondheim, der Luftkrigsskulen også er lokalisert. No har dei to kunnskapsorganisasjonene funne saman i eit samspel som skal gjere undervisninga ved Luftkrigsskulen meir forskingsbasert.

Vinn-vinn
Samarbeidsavtalen mellom Luftkrigsskulen og SINTEF blei formelt inngått 17. juni, og skal leie til at dei to institusjonane begge får tilført kompetanse. SINTEF har trong til å kunne forske i samarbeid med militærfaglege miljø, og avtalen med Luftkrigsskulen gjev ifølgje SINTEF moglegheiter til å kunne teste ut idear og konseptar i samband med leveransar til Forsvaret. Samarbeidet skal mellom anna romme forskingsprosjektar og fagseminar, slik at ein oppnår kompetansebygging på båe plassar. Det er dei to fagavdelingane ved skulen(Luftmakt og teknologi samt Leiing og internasjonalt samarbeid)som får direkte med SINTEF å gjere, gjennom den ferske avtalen. Fellesoperativt hovedkvarter (FOHK) og Transformasjonsinspektoratet på Rygge er også kopla inn, for å sjå til at forskingsprosjekta er relevant for Forsvaret, oppgjev major Morten Karlsen, hovudlærar ved Luftkrigsskulen.

Fokus på framtidas forsvar
Rådgjevar Hans Erik Swendgaard ved SINTEF meiner avtalen gjev Forsvaret eit godt høve til samspel med ein aktør utanfor dei "vanlege" aksane, og legg ikkje skjul på at SINTEF er nøgd med å ha formalisert eit slikt samarbeid.

- I Luftkrigsskulen finn vi eit sterkt militærfagleg miljø, som tilstrebar ei nyskapande og kreativ undervisning. Eg kjenner meg viss på at vi kan forsterke kvarandre. Major Karlsen seier til Forsvarsnett at han trur avtalen med SINTEF vil kunne bidra til å utvikle ny kunnskap og tematikk, til dømes innanfor område som kommando og kontroll i eit nettverkbasert forsvar.

Relevans
Ein annan vinst ved samarbeidet er at det kan bidra til å styre forskinga ved skulen i ei meir riktig retning.
- Vi ynskjer å kraftsamle forskinga ved Luftkrigsskulen i retning relevante tema. Luftkrigsskulen vil også etablere forskingsprosjekt knytta til KS-2-utdanninga, seier Karlsen.

Arbeid som kadettane gjer ved skulen, skal ein søkje å knytte opp mot SINTEF-samarbeidet, for å tilstrebe at det i enda større grad blir forskingsbasert. Resultata av arbeidet kan få innpass i framtidig undervisning ved skulen. Det heile handlar om å utvikle ny kunnskap.