Preassadieđáhus

Nr.: 06
Beaivi: 06.02.07

Sámeministtar Bjarne Håkon Hanssen:
Lihkku beivviin buot sámiide!

- Guovvamánu 6.b. – sámi álbmotbeaivi – lea mávssolaš beaivi sámi álbmogii, muhto dát beaivi lea maiddái mávssolaš olles riikii, dan dihte go oainnusmahttá sámiid erenoamáš sajádaga min riikkas, dadjá sámeministtar Bjarne Håkon Hanssen, gii dieđiha ođđa doaimmaid sámepolitihkas.

Čavčča beallái ovddida ráđđehus govdadis stuoradiggedieđáhusa sámepolitihkas. Okta fáddá lea Sámedikki váldi ja gaskavuohta eará stáhtalaš eiseváldiide, sámi ealáhusovddideapmi ja árvoháhkan, eananhálddašeapmi ja davviguovlopolitihkka.

-Árbevirolaš sámi ealáhus vuoittahallá dađistaga barttaid ja luondduvalljodagaid eará ávkkástallama ektui mii ruđalaččát gánnáha buorebut. Galgá go aivve nu leat ahte sámit vuoittahallet dan dihte go boazodoalus lea unnit ruhta go stuoraservodaga ealáhusdoaimmain? Ášši maid mii galgat digaštallat lea ahte galgá go Sámediggái stuorát váldi. Earret eará lea sáhka iešguđetlágan evttohusain das galgá go Sámedikkis mearridanriekti, dadjá Hanssen gii deattuha ahte ráđđehus ii leat loahpalaččat váldán oaivila guđege gažaldahkii.

Sámi álbmotbeaivi oainnusmahttá sámiid oktavuođa rastá riikkarájiid. Go sámit sihke Norggas, Ruoŧas, Suomas ja Ruoššas ávvudit dán beaivvi, de dát čájeha oktasaš sámi álbmoga máŋgga riikkas. Odne lea 90 jagi dan rájis go vuosttaš sámi riikkačoahkkin dollojuvvui Troandimis guovvamánu 6.beaivvi 1917. Dohko bohte sámit miehtá Davvi-riikkain digaštallat sámepolitihkalaš gažaldagaid. Sámi álbmotbeaivi lea ávvuduvvon 1993 rájis, ja 2004 rájis lea leamaš almmolaš levgenbeaivi Norggas.

- Sávan lihku beivviin odne buot sámiide!