Davviriikkaid
sámi giellabálkkášumi vuoitit – Gollegiella 2006
Ákkastallan
Jouni Moshnikoff
Jouni Moshnikoff oažžu 2006 Gollegiela bálkkašumi go son 1970-logu rájes lea árjjálaččat
rahčan ovddidit iežas eatnigiela, nuortalašgiela, ja lea ainge aktiivvalaččat
bargame dan buorrin.
Moshnikoffa
viiddis ja vuđolaš nuortalašgiela dovdamuš lea leamaš álo sámi servodaga
olámuttus, ja lohkameahttumat leat dat iešguđetlágan čoahkkimat ja
lávdegottit maidda son lea dáid bargguid olis oassálastán. Moshnikoff lea oaidnán
deaŧalažžan nuortalašgiela ja
kultuvrra bealušteami, doalaheami ja ovddideami das fuolakeahttá, ahte ii báris
agistis beassan vázzit skuvllaid ja gazzat oahpu iežas eatnigielas. Moshnikoffa
áššedovdamuš gokčá nu giellagáhtten- ja tearbmagažaldagaid go maiddái
nuortalaš báikenamaid ja kultuvrra iešguđetlágan beliid.
Moshnikoff
lea leamaš álggu rájes fárus hábmeme nuortalašgiela čállinvuogi ja
čálalaš geavaheami skuvllas ja servodagas. Suoma sámedikki giellaráđi
lahttun son lea leamaš jagi 1996 rájes ja sámi giellalága
ođasmahttinbargojoavkku lahttu jagi 1997 rájes. Lahttun Sámi
giellalávdagottis 1996 rájes Moshnikoff lea leamaš njunušolmmožin hukseme nuortalašgiella
fierpmádaga rájiid rastá Ruošša beale sámiiguin. Jouni Moshnikoff lea maid
leamaš álo hui árvvas juohkit iežas nuortalašgiela áššedovdamuša daidda geat
dan dárbbašit.
Jouni
Moshnikoff lea eahpitkeahttá olmmoš, gean mokta ja návccat jagiid
čáđa, leat jalgen bálgá nuortalašgiela čálalaš ovddideamis ja ovddidanbargguin
earenoamážit sátneráju dáfus.
Harald Gaski
Harald Gaski oažžu 2006
Gollegiela bálkkašumi su viiddes giellaovddidandoaimmaid ovddas. Son lea guhkit
áigge leamaš ávkkuheame sámegiellageavaheami servodagas ja son lea -
erenoamážit su dutkama bokte - leamaš mielde lokteme bajás sámi
girjjálašvuođá ja maiddá dahkame
dan ja sámegielaid dovddusin miehtá máilmmi.
Gaski lea
maiddá leamaš bures vaikkuheaddji dasa ahte sámegiella lea šáddan
ođđaáigášaš gulahallangaskaoapmin
Harald Gaski
lea guhká bargan Romssa universitehtas sámi giela ja girjjálašvuođa
oahpaheaddjin ja dan oktavuođas
movttiidahttán olu studeanttaid váldit alit oahpa dain surggiin ja son lea
maiddá guhká leamaš fárus ovddideamin daid oahppofágaid.
Gaski dutkan
sámi girjjálašvuođas leamašan vuođđun dasa ahte sámi
girjjálašvuohta dál lea sierra oahppofága Romssa universitehtas. Su dutkan lea
maiddá ožžon beroštumi olgolis Sámi ja son leage máŋgii leamaš olgoriikkas
doallame logaldagaid sámi girjjálašvuođa birra riikkaidgaskasaš
dutkankonferánssain.
Gaski lea
čállán sihke oahppogirjjiid, fágagirjjiid ja maiddá
čáppagirjjálašvuođa girjjiid sámegillii ja lea maid leamašan
doaimmaheaddji lullisámegiela antolgijai. Son lea maid jorgalan girjjiid sáme-,
dáro- ja eangalasgillii, erenoamáš deaŧálaš leamaš su bargu jorgalit ja
dulkot Áillohačča (Nils-Aslak Valkeapää) diktagirjjiid.
Harald Gaski
giellaovddidandoaimmat, maidda gullá sámi girjjálašvuohta, leamaš hui
mávssolaččat sámi servodahkii.
