Ráđđehus áigu váldit davveguovlluid atnui

- Ráđđehus áigu váldit davveguovlluid buorebut atnui. Dat addá bargosajiid, buoret birrasa ja sihkkarastá norgalaš mearridanválddi ja buori ránnjávuođa, cealká stáhtaministtar Jens Stoltenberg.

Odne Ráđđehus bidjá ovdan Romssas iežas ollislaš davveguovlostrategiija. Dat lea riikkalaš strategiija mas leat riikkaidgaskasaš ulbmilat mat gokčet sihke olgoriikkalaš ja riikka siskkáldas politihkalaš fáttáid.

– Dát ii leat duššefal davi vástesaš prošeakta. Dat lea prošeakta olles riikka ja Davvi-Eurohpá várás – ja mearkkašupmi olles kontinentii. Dát lea olgoriikapolitihkka ja riikka siskkáldas politihkka, cealká Stoltenberg.

Olles ráđđehus lea leamaš mielde válmmašteamen strategiija, masa leat váikkuhan deaŧalaš oasálaččat mat gullet Davvi-Norgga máhttobirrasiidda ja riikka máhttobirrasiidda muđui.

Ráđđehus áigu

buoridit buohkaid eallindilálašvuođaid, eallinvejolašvuođaid ja eallindási davvin,
geavahit mearridanválddi davvin jáhkehahtti, konsekventa ja árvidahtti vuogi mielde,
jođihit Norgga riikkaidgaskasaš njunušvuhtii das mii gullá davveguovlluid vástesaš máhttohuksemii,
bargat dan badjelii ahte Norga lea davveguovlluid birrasa ja luondduresurssaid ovddimus hálddašeaddji
láhčit nu ahte Barents-ábi petroleumdoaimma lea vejolaš ovddidit eambbo
váikkuhit dasa ahte álgoálbmogiid eallinvuođđu, ealáhusat, historjá ja kultuvra gáhttejuvvojit,
buoridit ránnjávuođa Ruoššain.

Oktasaš vuođđun lea máhttobuorideapmi. Máhttu lea ieš namma davveguovlopolitihkkii, ja dat suorgása árvobuorideapmái, resursageavaheapmái ja birashálddašeapmái. Strategiija deattuha deaŧalažžan buoridit máhtu davveguovlluid birra, davveguovlluin ja davveguovlluid várás.

Stategiijas dieđihuvvo ahte Davvi-Norgga máhttobirrasat galget nannejuvvot. Strategiija buktá maid ovdan čielggadeami mii galggašii čájehit makkár dárbu norgalaš dutkanbirrasiin lea beassat geavahit ođđa jiekŋagierdi dutkanfatnasiidda.

Gaskavuohta Ruššii lea guovdil davveguovlopolitihkas. Politihkka mii jođihuvvo Ruošša ektui galgá leat pragmáhtalaš, beroštusvuđot ja ovttasbargodáhtolaš. Áigumuš lea nannet ovttasbarggu Ruoššain ee. Barents-ábi resursa- ja birashálddašeamis ja energiijaáššiin.

Ovttasbargu galgá nannejuvvot Ruoššain ja eará riikkaiguin bissehan dihte lobihis bivdimiid Barents-ábis..

Ráđđehus áigu gánnáhahtti vuogi mielde eambbo ovddidit petroleumdoaimma Barents-ábis. Oadjebasvuohta meara alde, oljosuodjedoaibma ja meara birrasa bearráigeahčču galget buoriduvvot.

Válmmaštuvvo dasage, ahte ealáhuspolitihkka galgá buoriduvvot ja ulbmilsuorggit leat ee. industriijas, mátkedoaimmain, guollebiepmahagain ja mariidna bioprospektemis (meara organismmaid ávkkálaš biologalaš iešvuođaid kártemis).

Arvat dain prošeavttain mat váldojuvvojit ovdan strategiijas, gullet Barents 2020 nammasaš máhttobuorideapmái.