| |
Nærings- og handelsdepartementet legg i proposisjonen fram forslag om å auke satsane for byggetilskot til skipsbyggingsindustrien.
Støttesatsane er i dag 7 % for nybygg med ein verdi over 10 mill. euro og 3,5 % for andre kontraktar, inkl. ombygging. Gjennom EØS-avtalen har vi det same regelverk som EU for støtte til skipsbygging. Dei tillate maksimalsatsar er i dette regelverket 9 og 4,5 %. Noreg hadde desse satsane til dei vart redusert frå 1998 av.
Skipsbyggingsindustrien er, etter
fleire gode år, i ferd med å komme i ein vanskeleg situasjon på grunn av
svak ordreinngang det siste året. Ordreinngangen har dei seinare åra vore:
| mrd kroner |
|---|
| 1992 | 1993 | 1994 | 1995 | 1996 | 1997 |
| 2,3 | 7,2 | 10,6 | 6,1 | 10,0 | 20,0 |
Rundt halvparten av verfta vil ha sin siste leveranse i løpet av året. Enkelte verft har allereie permittert delar av arbeidsstokken.
Skipsbyggingsindustrien er ei viktig næring i mange lokalsamfunn og ein viktig del av den maritime klynga. Det kan derfor få store konsekvensar, ikkje berre på eit lokalt plan, men òg for dei maritime næringane i det heile, dersom verfta ikkje greier å få inn nye ordrar.
Regjeringa vil understreka at det først og fremst er skipsbyggingsindustrien sjølv som har hovudansvaret for å sikra konkurranseevna til næringa gjennom tilstrekkeleg omstilling og omstrukturering. Regjeringa meiner likevel, for å medverke til at norske verft vert sikra oppdrag dei nærmaste åra, at støttesatsane bør aukast til 9 og 4,5 % for resten av 1999. Støttesatsane for år 2000 må vurderast i samband med statsbudsjettet for år 2000.
Ein ordreinngang på 8 mrd. kroner vil krevje eit fond på rundt 750 mill. kroner. 1999-fondet på 507,5 mill. kroner må dermed aukast med om lag 250 mill. kroner. Nærings- og handelsdepartementet gjer merksam på at overslaget er uvisst. Ordreinngangen kan bli større. Då kan ein auke på 250 mill. kroner bli for liten.
Fondet vil med støttesatsar på 9 og 4,5 %, dekke den anslåtte ordreinngangen på rundt 8 mrd. kroner. Vert ordreinngangen større, kan det bli naudsynt med tilleggsløyvingar.