| |
Utanriksdepartementet viser i proposisjonen til EØS-komitéavgjerd nr. 87/97 av 9. desember 1997, som gjeld innlemming i EØS-avtala av europaparlaments- og rådsdirektiv 96/57/EF av 3. september 1996. Direktivet gjeld energieffektivitetskrav til nye nettdrivne hushaldskjøleskap, -fryseskap og -fryseboksar eller kombinasjonar av slike som er meinte for næringsmiddel. Kjøleutstyr til kommersiell bruk fell utanfor verkeområdet til direktivet.
Departementet viser til at føremålet med direktivet skal vere å fremje ei meir fornuftig energiutnytting. I innleiinga til direktivet er det såleis vist til ei rekkje vedtak og målsetjingar i samband med miljøpolitikken, m.a. kravet om reduserte utslepp av CO2 . Når det gjeld elektriske hushaldsapparat, som krev ein monaleg del av elektrisitetskapasiteten i Fellesskapet, er målet å oppmuntre forbrukarane til å velje apparat og utstyr med høg elektrisitetseffektivitet og dessutan å betre effektiviteten til apparata. Direktivet har òg som mål å fjerne tekniske handelshindringar ved at lovgjevinga i medlemslanda vert harmonisert.
Departementet viser til at gjennomføringa av direktivet krev lovendring, men det finst i dag inga eigna lov under Olje- og energidepartement som gjev heimel for forskrifter om krav til energieffektivitet. Ein har etter ei grundig vurdering kome til at det er føremålstenleg å nytte produktkontrollova som ei slik heimelslov, og eit framlegg er gjort i ein eigen odelstingsproposisjon frå Olje- og energidepartementet om endring av produktkontrollova, jf. Ot.prp.nr.42 (1998-1999) om lov om endringer i lov av 11. juni 1976 nr. 79 om kontroll med produkter og forbrukertjenester. Forslaget i odelstingsproposisjonen inneber at føremålet til produktkontrollova vert utvida til å omfatte energibruk, samt at det vert innført ein ny artikkel 4a i produktkontrollova som gjev Kongen fullmakt til å utferde forskrifter om energieffektivitetskrav.
EØS-komitéavgjerda og direktivet i norsk omsetjing følgjer som trykte vedlegg til proposisjonen.